Fakatahatahaʻi Fāitaha Fakataha
1 Kuo tuʻo lahi fēfē haʻo ofoofo ʻi he faʻunga pōtoʻi ʻo e sino fakaetangatá? (Sāme 139:14) Ko e mēmipa taki taha ʻo e sinó ʻoku ngāue feongoongoi ia mo e ngaahi mēmipa kehé. ʻOku fakatatau ʻe he Folofola ʻa e ʻOtuá ʻa e fakatahaʻanga Kalisitiané ki ha sino ʻoku fāitaha lelei. ʻI he malumalu ʻo e ʻUlú, ʻa Kalaisi, ko e ngaahi mēmipa kotoa ʻo e fakatahaʻangá ʻoku ‘fakatahatahaʻi fāitaha fakataha pea ʻai ke fengāueʻaki ʻi he fehokotakinga kotoa ʻa ia ʻokú ne ʻomai ʻa e meʻa ʻoku fiemaʻú.’ (Ef. 4:16a, NW) Ko ia ai, ʻoku malava ʻe Sihova ke ngāueʻaki ʻene kakai fāʻūtahá ke fakahoko ʻa e ngaahi meʻa fakaofo.
2 Ko e ngaahi mēmipa ʻo e fakatahaʻanga ʻi he ʻuluaki senitulí naʻa nau ngāue “loto taha” ʻi he fetokangaʻaki ki heʻenau ngaahi fiemaʻu fakalaumālié mo fakamatelié. (Ng. 2:44-47) ʻI he poupou ʻa Sihová, naʻa nau fehangahangai mo ikuʻi fakataha ai ʻa e fakafepaki kakahá. (Ng. 4:24-31) Naʻa nau talaki ʻa e pōpoaki ʻo e Puleʻangá ʻi ha feituʻu pē naʻa nau ʻalu ki ai, ʻo kāpui ʻa e māmani ne ʻiloa he taimi ko iá ʻaki ʻa e ongoongo leleí. (Kol. 1:23) ʻI onopooni, kuo fakahoko fāʻūtaha ai ʻe he fakatahaʻanga Kalisitiané ʻa e ngaahi meʻa tatau ko ení ʻi ha tuʻunga ʻoku toe lahi ange. Ko e hā ʻa e ngaahi meʻa tefito ʻoku tokoni ki he taha ko ení?
3 Fakafāʻūtahaʻi Fakataha ʻe he Akoʻi Fakaʻotuá: Takatakai ʻi he kolopé, ʻoku fakafāʻūtahaʻi ai kitautolu ʻe heʻetau lotú. ʻOku malava fēfē ení? ʻOku tau ʻiloʻi ʻa e fouʻanga hā mai ʻa Sihova ki hono tokonaki mai ʻa e “meʻakai [fakalaumālié] ʻi hono taimi totonu.” (Mt. 24:45) ʻOku tau toe fakamahuʻingaʻi lahi ʻa e “meʻaʻofa ʻi he kau tangata” kuó ne foaki mai ko e kau faiako ʻi he fakatahaʻangá. ʻI heʻetau tali anga-fakatōkilalo ʻa e ngaahi tokonaki ʻa Sihova ke fafangaʻi fakalaumālie kitautolú, ʻoku tupu ai ʻetau mahinoʻi ʻa e Folofola ʻa e ʻOtuá pea langaʻi ai ʻi loto ʻia kitautolu ha holi lahi ke faʻifaʻitaki kia Sīsū ʻi he tuʻunga ko ʻene kau ākonga. Kuo pau ke tau hokohoko atu hono ako ʻa e Folofola ʻa e ʻOtuá, ʻo feinga tōtōivi ke “aʻu . . . ki he tuʻunga taha ʻi he tuí.” (Ef. 4:8, 11-13, NW) ʻOkú ke pouaki ʻetau fāʻūtaha fakalaumālié ʻaki hono lau fakaʻaho ʻa e Tohitapú?
4 Fāʻūtaha ʻi he Feohi Faka-Kalisitiané: ʻOku fakafāʻūtahaʻi kitautolu ʻe he ʻofá ʻi he feohi vāofi ʻi he ngaahi fakataha faka-Kalisitiané. ʻI he ngaahi fakataha ko ení, ʻoku tau “fetokangaʻaki” ai. (Hep. 10:24, 25) ʻOku kau ki he meʻá ni ʻa e sio fakalaka atu ʻi he ngaahi fōtunga ʻi tuʻá pea hoko moʻoni ʻo ʻiloʻi hotau fanga tokouá, ʻo sio kia kinautolu ʻi he founga ʻo e vakai ʻa Sihova kia kinautolú, ʻoku nau mahuʻinga. (Hak. 2:7, NW, lalo.) ʻI heʻetau fanongo ki heʻenau fakahaaʻi ʻenau tuí, ʻoku loloto ai ʻetau ʻofa kia kinautolú pea ʻoku ʻai ai ke mālohi ʻetau fāʻūtahá. ʻOku ʻiloa koe ko e tokotaha ʻoku kau maʻu pē ʻi he ngaahi fakataha ʻa e fakatahaʻangá?
5 Kaungāngāue ʻi he Malaʻé: Ko hono malangaʻi ʻo e ongoongo leleí fakataha mo e kaungātuí ʻoku fakafāʻūtahaʻi ai kitautolu ʻi hono fai ʻa e finangalo ʻo e ʻOtuá. Naʻe mahuʻingaʻia ʻa e ʻapositolo ko Paulá ʻi hono “[kaungā]ngaue maʻa e Puleʻanga ʻo e ʻOtua.” (Kol. 4:11) Ko e vahevahe ʻo e ngaahi meʻa naʻe hokosiá mo e fetokoniʻaki lolotonga ʻa e ʻi he ngāue fakafaifekaú ʻoku tokoniʻi ai kitautolu ke fakahoko ʻetau ngāue faka-Kalisitiané pea fakaivimālohiʻi ai ʻa hotau noʻo ʻo e fāʻūtahá.—Kol. 3:14.
6 Tākiekina Fakaefāʻūtaha ʻo e Laumālie Māʻoniʻoní: ʻI heʻetau fai tōtōivi ʻa hono finangaló, ʻoku tāpuakiʻi kitautolu ʻe Sihova ʻaki hono laumālié. ʻOku tokoni ʻa e meʻá ni ke fakaleleiʻi ʻa e ngaahi faikehekehé pea nofo fakataha ai ʻi he fāʻūtaha. (Sāme 133:1) ʻOkú ne ueʻi kitautolu “ke tauhi ʻaki ʻa e noʻo ko e melino, ʻa e taha kuo fakatupu ʻe he Laumalie.” (Ef. 4:3) Ko kitautolu taki taha ʻe lava ke tau pouaki ʻa e feongoongoi ʻoku ʻi ai ʻi he lotolotonga ʻo e kakai ʻa e ʻOtuá ʻaki hono fakahāhā ʻa e fua ʻo e laumālié ʻi heʻetau feangainga ʻia kitautolú.—Kal. 5:22, 23.
7 Ko e ngāue fakataha fāʻūtaha ʻi he malumalu ʻo e tuʻunga-ʻulu ʻo Kalaisí “ʻoku hoko ʻo tupu ai ʻa e sinó ki hono langa hake ʻo ia tonu ʻi he ʻofá.” (Ef. 4:16e, NW) ʻIkai ngata aí, ʻoku fakalāngilangiʻi ai ʻa Sihova “koe Otua oe melino.”—Loma 16:20, PM.