Tokoniʻi ʻa e Niʻihi Kehé Ke Nau Fakalāngilangiʻi ʻa Sihova

¹ ʻOku fanongonongo ha pōpoaki mātuʻaki mahuʻinga ki he kakai ʻi he māmaní kotoa: “Mou manavahē ki he ʻOtua, pea tuku kololia kiate ia; he kuo hokosia ʻa e taimi oʻene fakamāu: pea mou hū kiate ia naʻa ne ngaohi ʻa e langi mo e fonua mo e tahi mo e ngaahi matavai ʻo e ngaahi vaitafe.” (Fkh. 14:​6, 7) Ko hotau monū ia ke kau ʻi he fanongonongo ko iá. Ko e hā ʻoku fiemaʻu ke ʻiloʻi ʻe he kakaí fekauʻaki mo Sihova koeʻuhi ke nau manavahē ai mo lotu kiate iá?

² Ko Hono Huafá: ʻOku fiemaʻu ke malava ʻe he kakaí ʻo fakafaikehekeheʻi ʻa e huafa ʻo e ʻOtua moʻoni pē tahá mei he ngaahi ʻotua loi tokolahi ʻoku fai ki ai ʻa e lotu he ʻaho ní. (Teu. 4:​35; 1 Kol. 8:​5, 6) Ko hono moʻoní, naʻe ngāueʻaki ʻe he kau hiki Tohitapú ʻa e huafa ʻiloa ʻo Sihová ʻo laka hake he tuʻo 7,000. Lolotonga ʻoku tau ngāueleleiʻaki ʻa e ʻiloʻiló ʻi he taimi ʻoku tau ngāueʻaki ai ʻa e huafa ʻo e ʻOtuá, ʻoku ʻikai ʻaupito totonu ke tau fufū ia pe fakaʻehiʻehi mei hono ngāueʻaki iá. Ko e finangalo ʻo e ʻOtuá ki he faʻahinga ʻo e tangatá kotoa ke nau hoko ʻo ʻiloʻi hono huafá.​—Sāme 83:18.

³ Ko Hono ʻUlungāngá: Ke fakalāngilangiʻi ʻa Sihova, ʻoku fiemaʻu ke ʻiloʻi ʻe he kakaí pe ko e faʻahinga ʻOtua fēfē ia. Kuo pau ke tau ʻai ke nau maheni mo ʻene ʻofa tuʻu-ki-muʻá, poto māʻolungá, fakamaau totonu haohaoá, mo e mālohi māfimafi-aoniú, fakataha mo ʻene mēsí, ʻaloʻofá, mo hono ngaahi ʻulungaanga fakaofo kehé. (Eki. 34:​6, 7) Kuo pau ke nau toe ako ke maʻu ha manavahē lelei ki he ʻOtuá, ke ʻapasiaʻi ia, ʻo ʻiloʻi ko ʻenau moʻuí tonu ʻoku fakatuʻunga ia ʻi hono maʻu ʻa e hōifua ʻa Sihová.​—Sāme 89:7.

⁴ ʻUnuʻunu Ofi ki he ʻOtuá: Ke fakahaofi ʻi he fakamaau ka hoko mai ʻa e ʻOtuá, kuo pau ke ui ʻa e kakaí kia Sihova ʻi he tui. (Loma 10:​13, 14; 2 Tes. 1:8) ʻOku kau ki heni ʻa e meʻa lahi ange ia ʻi hono maʻu pē ha ʻilo fekauʻaki mo e huafa pea mo e ʻulungaanga ʻo e ʻOtuá. Kuo pau ke tau tokoniʻi ʻa e kakaí ke nau fakatupulekina ha vahaʻangatae fakafoʻituitui mo Sihova, ʻo falala kiate ia ʻaki honau lotó kotoa. (Pal. 3:​5, 6) ʻI heʻenau ngāueʻaki ʻa e meʻa ʻoku nau akó, hanga ki he ʻOtuá ʻi he lotu fakamātoato, pea aʻusia ʻene tokoní ʻi heʻenau moʻuí, ʻe tupulekina ai ʻenau tuí, ʻo tokoniʻi ai kinautolu ke ʻunuʻunu ofi kia Sihova.​—Sāme 34:8.

⁵ ʻOfa ke tau talaki faivelenga ʻa e huafa ʻo e ʻOtuá pea tokoniʻi ʻa e niʻihi kehé ke nau falala kakato mo manavahē kiate ia. ʻOku kei malava ke tau tokoniʻi ʻa e tokolahi ange ke nau hoko ʻo ʻiloʻi ʻa Sihova pea fakalāngilangiʻi ia ʻi he tuʻunga ko honau “ʻOtua fakamoʻuiʻanga.”—Sāme 25:5.