Ngaʻunu ki Muʻa ʻa e Polokalama Langa Fale Fakatahaʻangá
1 ʻI he 1987, naʻe fakahaaʻi ai ʻi he fakalahi ʻo e Kingdom Ministry ʻo Meé ʻe fokotuʻu ha paʻanga tokoni makehe ke pouaki ʻa e langa mo hono toe fakaleleiʻi ʻo e ngaahi Fale Fakatahaʻangá ʻi he kotoa ʻo Nuʻu Silá. Naʻe siʻi ʻetau ʻiloʻi ʻa e ngaahi tāpuaki ʻe iku ki ai mei he fanga kiʻi kamakamata ko iá. Naʻe kamata ke tau aʻusia kakato ange ʻa e meʻa ʻoku fakahaaʻi mātuʻaki totonu ʻe he Sāme 92:4 (PM): “He kuo ke fakafiefiaʻi au, E Jihova, i hoo gaue: teu vikiviki i he gaahi gaue a ho nima.”
2 ʻOku tau fiefia lahi he taimí ni ʻi he meʻa kuo lavaʻí. ʻI ha faʻahinga founga pē, ko kitautolu kotoa kuo tau maʻu ʻa e monū ʻo e kau ki he ngāue ko ení. ʻOku tau fai ia ʻaki hono fai ha ngaahi tokoni fakapaʻanga lahi pe siʻisiʻi ke tokoni ki hono fakapaʻanga ʻa e langa ʻo e ngaahi feituʻu faiʻanga lotu lahi ange ʻi he kotoa ʻo Nuʻu Silá. ʻOku toe loto-lelei ʻa e fanga tokoua tokolahi ke ngāueʻaki ʻenau meʻangāué pea pehē ki honau taimí, ngaahi malavá, mo e pōtoʻí ʻi he fekauʻaki mo e ngaahi ngāue peheé. Ko e lavameʻa ʻo e fokotuʻutuʻú fakakātoa ʻoku tupu ia mei he tataki, poupou, mo e tāpuaki lahi ʻa Sihova ki heʻetau ngaahi feinga fāʻūtahá.—Sāme 127:1.
3 ʻI he ngaahi Fale Fakatahaʻanga ʻi he kotoa ʻo Nuʻu Silá ʻoku ʻi ai ha puha ʻa ia ʻoku tuku ki ai ʻe he kau malangá ʻenau ngaahi tokoni ki he Paʻanga Fale Fakatahaʻangá. Ko e paʻanga ko ení ʻoku tuku tefito ia ke fakapaʻanga ʻaki ʻa e ngaahi ngāue langa fakalotofonua pē ʻi loto Nuʻu Silá. Talu mei hono fokotuʻu ʻa e Paʻanga Fale Fakatahaʻanga ʻa e Sōsaietí ʻi he 1987, kuo tokoni nima-homo ʻa e fanga tokouá, ʻo malava ai ke fai ʻa e ngaahi nō ki he langa Fale Fakatahaʻangá. Kuo ʻosi maʻu ʻaonga ʻa e fakatahaʻanga ʻe 77 ʻi he fonuá ni mei he fokotuʻutuʻu ko ení. Ka ne taʻeʻoua ia naʻe ʻikai lava ʻa e ngaahi fakatahaʻanga lahi ke langa ha ngaahi Fale Fakatahaʻanga foʻou pe fakaleleiʻi ʻa e ngaahi Fale Fakatahaʻanga naʻe fiemaʻu ke monomonó.
4 Kae kehe, kuo hoko mai ʻa e taimi ke fakalahi ai ʻetau vīsoné ʻo fakalaka atu ʻi heʻetau ngaahi fiemaʻu fakalotofonuá. ʻI he ʻahó ni ʻoku fakahoko ai ha polokalama langa Fale Fakatahaʻanga fakautuutu ʻi māmani lahi. ʻOku ʻi ai ha fiemaʻu fakavavevave ke tokoniʻi ʻa e ngaahi fakatahaʻanga ʻi he ngaahi fonua masiva ange fakaʻekonōmiká. ʻI hotau feituʻu vaʻá tonu, kuo fiemaʻu ai ʻa e tokoni fakaepaʻanga mo fakaelanga ki Niuē, Lalotonga pea mo Tonga. ʻI he lolotonga ní, ko e paʻanga ʻi he Paʻanga Fale Fakatahaʻanga ʻa e Sōsaietí ʻe lava ke ngāueʻaki pē ia ki he ngaahi ngāue langa ʻi Nuʻu Silá. Kuo fai ʻa e ngaahi fengaʻunuʻaki ki heʻetau tohi aleapau fakalaó ke malava ai ʻa e paʻanga tokoní ʻo ʻave ki he ngaahi ngāue ʻi he ngaahi fonua kehé. Lolotonga iá, kapau ko hoʻo holí ia ke tokoni ki he ngaahi ngāue langa fakateokalati ʻi mulí, ʻi Nuʻu Silá kātaki ʻo siekeʻi ia ki he “Watch Tower Society” pea fakaʻilongaʻi mahino ʻi mui ʻi he foʻi sieké ko e paʻanga tokoni ko ení ki he “overseas projects.” Tuku ʻa e sieké ʻi he puha “Ngaahi Meʻaʻofa ki he Ngāue ʻa e Sōsaietí−Mātiu 24:14,” pe ʻave hangatonu ia ki he ʻōfisi vaʻá. Ko e ngaahi tokoni peheé ʻe ʻikai lava ke tali totongi ia ki he taumuʻa ko hono maʻu ha ʻaonga fakaetukuhau. Ko e ngaahi tokoni ko ia ʻoku tuku ki he puha “Paʻanga Fale Fakatahaʻanga” ʻi Tongá ʻoku faʻa ngāueʻaki pē ia ki he ngaahi ngāue langa ʻi Tongá.
5 ʻOku ʻi ai ha fiemaʻu hokohoko ki he langa Fale Fakatahaʻanga ʻi māmani lahí. Ko e lahi ʻo e ngaahi fakatahaʻanga ko ení ʻoku ʻi ʻAfilika, ʻĒsia, ʻAmelika Lotoloto mo ʻAmelika Tonga, pea mo ʻIulope Hahake. Kuo ʻosi lavaʻi ʻa e meʻa lahi tupu mei he ngaahi tokoni nima-homo ʻa e fanga tokoua mo e fanga tuofāfine ʻi he māmaní kotoa. Naʻe līpooti ʻi he 2001 Yearbook: “ʻI he fokotuʻutuʻu ko ení, ʻi he fonua ʻe 30 ʻi he aʻu mai ki he taimi ko ení, kuo fakakakato ai ʻa e Fale Fakatahaʻanga ʻe 453, pea ko e ngaahi fale kehe ʻe 727 ʻoku lolotonga langá. Kuo fai ʻa e fakamamafa ki hono faʻu ha ngaahi palani Fale Fakatahaʻanga ko e sīpinga ia ki he fonua taki taha ʻa ia ʻoku ngāueʻaki ai ʻa e ngaahi nāunau langa mo e ngaahi founga fakalotofonuá. ʻI Keniā, ʻoku ngāueʻaki ai ʻa e maka mei he keliʻanga maká; ʻi Toko ʻoku anga-maheni ʻaki ai ke ngāueʻaki ʻa e pilikí; ʻi Kameluni ʻoku manakoa ai ʻa e ngaahi fuʻu lauʻi sima ʻa ia ʻoku toki palasitaaʻi ki mui. ʻI he foungá ni, ʻoku malava vave ai ʻa e fanga tokoua fakalotofonuá ke nau maʻu ʻa e ngaahi pōtoʻi ʻoku fiemaʻu ke fakahokoʻaki ʻa e ngaahi ngafa tefito ʻi ha polokalama fakafonuá.”
6 Ko e fakamoʻoni ʻo e ngaahi tāpuaki ʻa Sihova ʻi he polokalama ko ení ʻoku lava ke maʻu ia ʻi he konitinēniti lahi ʻo ʻAfiliká. ʻI hoʻo sio hifo ki he ngaahi fakatātā ʻo e niʻihi ʻo e ngaahi Fale Fakatahaʻanga kuo langá, fakaʻuta atu ki he maongo kuo fai ʻe he langa peheé ki he ngāue ʻa e Kau Fakamoʻoni ʻa Sihová! ʻOku hoko moʻoni eni ʻi he ngaahi tafaʻaki makehe ʻe tolu—ko e fāʻūtaha ʻo ʻetau fetokouaʻaki ʻi māmani lahí, ko e ola ki he feituʻu fakalotofonuá, pea mo e tupulaki ʻo e kau ki he ngaahi fakataha ʻa e fakatahaʻangá. Lolotonga ʻoku fakaeʻa ʻe he fakalahi ko ení ʻa e ngaahi Fale Fakatahaʻanga naʻe langa ʻi ʻAfiliká, ko e ngaahi pulusinga ʻo ʻEtau Ngāue Fakafaifekau ʻo e Puleʻanga ʻi he kahaʻú ʻe fakahangataha ia ki he founga ʻo e ngaʻunu ki muʻa ʻa e polokalama langa Fale Fakatahaʻangá ʻi he ngaahi feituʻu kehe ʻo e māmaní.
[Fakatātā ʻi he peesi 3]
LEPUPILIKA ʻAFILIKA LOTOLOTO
Bimbo, Bangui
Begoua, Bangui
[Fakatātā ʻi he peesi 4]
Ukonga, Tenisania
[Fakatātā ʻi he peesi 4]
Accra, Kana
[Fakatātā ʻi he peesi 4]
Salala, Laipīlia
[Fakatātā ʻi he peesi 4]
Karoi, Simipāpuē
[Fakatātā ʻi he peesi 4, 5]
Allada, Penini—Fale Fakatahaʻanga ki muʻa
Allada, Penini—Fale Fakatahaʻanga foʻou
[Fakatātā ʻi he peesi 5]
Kpeme, Toko
[Fakatātā ʻi he peesi 5]
Sokodé, Toko
[Fakatātā ʻi he peesi 4, 5]
Fidjrosse, Penini
[Fakatātā ʻi he peesi 6]
Lyenga, Semipia—Fale Fakatahaʻanga ki muʻa
[Fakatātā ʻi he peesi 6]
Lyenga, Semipia—Fale Fakatahaʻanga foʻou
[Fakatātā ʻi he peesi 6]
Kinshasa, Kongo
[Fakatātā ʻi he peesi 6]
Musambira, Luanitā