Fanongonongo ʻa e Pōpoaki ʻo e Puleʻangá
1 “Kuo pau ke u ʻave ʻa e ongoongolelei ki he ngaahi kolo kehe foki, ʻo tala ʻa e Puleʻanga ʻo e ʻOtua; he naʻe fekau mai au ki he meʻa ko ia.” (Luke 4:43) ʻI he ngaahi lea ko iá, naʻe fakahaaʻi pau ai ʻe Sīsū ʻa e kaveinga ʻo ʻene ngāue fakafaifekaú—ko e Puleʻanga ʻo e ʻOtuá. Ko e pōpoaki ʻoku tau fanongonongo ʻi he ʻaho ní ʻoku toe fakatefito ia ʻi he Puleʻangá, ʻo hangē ko ia naʻe tomuʻa tala ʻi he Mātiu 24:14: “ʻE ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngahi kakai kotoa pe, pea toki hoko ʻa e ngataʻanga.” Ko e hā ʻa e ngaahi moʻoni fekauʻaki mo e Puleʻanga ʻo e ʻOtuá ʻoku fiemaʻu ke fanongo ki ai ʻa e kakaí?
2 Ko e Puleʻanga ʻo e ʻOtuá ʻoku pule ia he taimí ni mei hēvani pea kuo vavé ni ke ne fetongi ʻa e tuʻunga-pule kotoa ʻa e tangatá. Kuo ʻosi kapusi ʻa e Tēvoló mei hēvani, pea ko e fokotuʻutuʻu lolotonga ʻo e ngaahi meʻá kuo hū atu ia ki hono ngaahi ʻaho fakaʻosí. (Fkh. 12:10, 12) Ko e fokotuʻutuʻu fulikivanu motuʻa ʻa Sētané ʻe fakaʻauha fakaʻaufuli ia, ka ko e Puleʻanga ʻo e ʻOtuá ʻe ʻikai ke ueʻi. ʻE tuʻu ai pē ia ʻo taʻengata.—Tan. 2:44; Hep. 12:28.
3 ʻE fakatōliʻa ʻe he Puleʻangá ʻa e ngaahi holi lelei ʻa e faʻahinga talangofua kotoa ʻo e tangatá. Te ne ʻomai ʻa e fakanonga mei he faingataʻa naʻe fakatupunga ʻe he taú, faihiá, fakafeʻātungiá, mo e masivá. (Sāme 46:8, 9; 72:12-14) ʻE ala maʻu ʻa e meʻakai lahi fau ʻe he tokotaha kotoa. (Sāme 72:16; Ai. 25:6) Ko e ngaahi mahakí mo e faingataʻaʻiá ʻe hoko ko ha meʻa pē ia ʻi he kuohilí. (Ai. 33:24; 35:5, 6) ʻI he tupu ʻa e faʻahinga ʻo e tangatá ʻo haohaoá, ʻe liliu ai ʻa e māmaní ki ha palataisi, pea ʻe nofo fakataha feongoongoi ai ʻa e kakaí.—Ai. 11:6-9.
4 ʻOku tau fakahā ʻoku tau loto ke hoko ko e faʻahinga ʻe pule mai ki ai ʻa e Puleʻanga ʻo e ʻOtuá ʻi he founga ʻoku tau moʻui ai he taimi ní. Ko e pōpoaki ʻo e Puleʻangá ʻoku totonu ke ne tākiekina ʻetau ʻalunga moʻuí kotoa, ʻo kau ai ʻetau ngaahi taumuʻá mo e ngaahi meʻa muʻomuʻá. Ko e fakatātaá, lolotonga ʻoku tau maʻu ha fatongia ke tokonaki ai ki hotau fāmilí, ʻe ʻikai lava ke tau fakaʻatā ʻa e tokanga ki he ngaahi meʻa fakamatelié ke ne kāsia ʻa e ngaahi meʻa ʻo e Puleʻangá. (Mt. 13:22; 1 Tim. 5:8) ʻI hono kehé, kuo pau ke tau tokanga ki he enginaki ʻa Sīsuú: “Mou kumi muʻa ki hono puleʻanga, mo e maʻoniʻoni aʻana, pea ʻe ʻatu mo ia foki ʻa e ngāhi meʻa [ngaahi meʻa fakamatelie ʻoku fiemaʻu ki he moʻuí] ko ia kotoa.”—Mt. 6:33.
5 ʻOku fiemaʻu fakavavevave ke fanongo ʻa e kakaí pea ngāue ki he pōpoaki ʻo e Puleʻangá lolotonga ʻoku kei ʻi ai ʻa e taimí. ʻOfa ke tau tokoniʻi kinautolu ke fai ia ʻaki hono “fakababau atu ae gaahi mea oe buleaga oe Otua.”—Ng. 19:8, PM.