Moʻui ʻo Fakatatau ki Heʻetau Fakatapuí
1 Pe naʻá ke papitaiso ki muí ni pe ʻi he taimi fuoloa he kuohilí, ngalingali ʻokú ke manatuʻi ʻa e meʻa mahuʻinga ko ia ʻi hoʻo moʻuí. Ko ʻetau papitaisó ʻoku ʻikai ko e ngataʻangá pē ia, ka ʻi hono kehé, ko e kamataʻanga ia ʻo e moʻui kotoa ʻo ha ngāue fakatapui ʻa ia ʻe lava ke tuʻuloa ʻo taʻengata. (1 Sione 2:17) Ko e hā ʻoku kau ki he moʻui ʻo fakatatau ki heʻetau fakatapuí?
2 Muimui ʻi he Faʻifaʻitakiʻanga ʻa Kalaisí: ʻI heʻene hoko ʻo papitaisó, naʻe “kamata ngaue” ai ʻa Sīsū, ʻi hono talaki ʻa e [ongoongo lelei ʻo e] Puleʻanga ʻo e ʻOtua.” (Luke 3:23; 4:43) ʻI he tuʻunga tatau, ʻi hono fakaʻilongaʻi ʻetau fakatapui kia Sihová ʻaki ʻa e papitaisó, ʻoku tau hoko ai ko e kau faifekau fakanofo ʻo e ongoongo leleí. Lolotonga ʻoku fiemaʻu nai ʻa e taimi mo e feinga lahi ke maʻu ʻa e ngaahi meʻa fakamatelie ʻoku fiemaʻu ki he moʻuí, ko ʻetau ngāué, pe ngāue tefitó, ko e ngāue fakafaifekau faka-Kalisitiané. (Mt. 6:33) ʻI he ʻikai feinga ke maʻu ʻa e koloá pe ongoongó, ko e faʻahinga ʻoku nau fakatapui ki he ʻOtuá ʻoku nau feinga ke ‘fakalāngilangiʻi ʻenau ngāue fakafaifekaú’ ʻo hangē ko ia naʻe fai ʻe he ʻapositolo ko Paulá. (Loma 11:13, NW) ʻOkú ke koloaʻaki ho monū ʻo e tauhi kia Sihová pea fai ʻa hoʻo lelei tahá?
3 Hangē ko ia ʻi he tuʻunga ʻo Sīsuú, kuo pau ke tau “tali tekeʻi ʻa e Tevolo.” (Sem. 4:7) Naʻe ʻahiʻahiʻi ʻe Sētane ʻa Sīsū ʻi he hili ʻEne papitaisó, pea ʻokú ne tāketi tatau ki he kau sevāniti fakatapui ʻa Sihova ʻi he ʻaho ní. (Luke 4:1-13) ʻI he takatakaiʻi ʻe he māmani ʻo Sētané, kuo pau ke tau ngāueʻi ʻa e akonakiʻi-kitá, ʻo fakaʻehiʻehi mei ha meʻa pē ʻe lava ke ne ʻuliʻi hotau ʻatamaí pe fakameleʻi hotau lotó. (Pal. 4:23; Mt. 5:29, 30) ʻOku faleʻi ki he kau Kalisitiané ʻe ʻikai te nau ‘faa inu i he ibu ae Eikí, moe ibu ae gaahi tevoló.’ (1 Kol. 10:21, PM) ʻOku fiemaʻu heni ke tau leʻohi kitautolu mei he fakafiefia ʻikai leleí, ngaahi feohi koví, mo e ngaahi fakatuʻutāmaki ʻi he ʻInitanetí. ʻOku toe fiemaʻu ai ke tau fakaʻehiʻehi mei he ʻū tohi ʻa e kau tafoki mei he moʻoní. Ko e tokanga ki he ngaahi meʻá ni pea mo e ngaahi founga kehe ʻa Sētané ʻe tokoniʻi ai kitautolu ke tau moʻui ʻo fakatatau ki heʻetau fakatapuí.
4 Ngāueʻaki ʻa e Ngaahi Tokonaki ʻa e ʻOtuá: Koeʻuhi ke tokoniʻi kitautolu ke tau moʻui ʻo fakatatau ki heʻetau papitaisó, kuo tokonaki mai ʻe Sihova ʻa e tokoní fakafou ʻi heʻene Folofolá mo e fakatahaʻanga Kalisitiané. ʻAi ʻa e lau Tohitapú mo e lotu kia Sihová ko e konga ia ʻo hoʻo founga-tuʻumaʻu fakaʻahó. (Sios. 1:8; 1 Tes. 5:17) Fiefia ʻi he ngaahi fakataha ʻi he fakatahaʻangá. (Sāme 122:1) Feohi mo e faʻahinga ʻoku nau manavahē kia Sihova pea tauhi ʻene ngaahi fekaú.—Sāme 119:63.
5 ʻI he tokoni fakaʻotuá, ʻe lava ai ke ke moʻui ʻo fakatatau ki hoʻo fakatapui kia Sihová pea maʻu ʻa e fiefia ʻi he tauhi kiate iá ʻo taʻengata.—Sāme 22:26, 27; Fili. 4:13.