Langa Fale Fakatahaʻanga Fakavahaʻapuleʻanga ʻi he Ngaahi Fonua ʻIulope ʻe Niʻihi
1 ʻI he ngaahi hongofuluʻi taʻu ki mui ní naʻe fakangatangata ai ʻa e ngāue ʻa e Kau Fakamoʻoni ʻa Sihová ʻi ha ngaahi fonua ʻIulope lahi, ʻo kau ai ʻa ʻIulope Hahake. ʻI he ngaahi tuʻunga lahi tahá, naʻe mātuʻaki fefeka ʻa e ngaahi fakangatangatá. Naʻe faingataʻa ke fai fakahāhā ʻa e ngaahi fakatahá, pea naʻe ʻikai meimei malava ke ngāueʻaki ha Fale Fakatahaʻanga. Kae kehe, ʻi he ngaahi taʻu ki mui ní, ‘kuo fai meʻa lalahi maʻatautolu ʻe Sihova. Pea ʻoku tau fuʻu fiefia.’—Sāme 126:3.
2 Naʻe kamata ke holo ʻo kamata ʻi he 1983, ʻa hono puleʻi fakafeʻātungia ʻo e Kau Fakamoʻoni ʻa Sihová. ʻI he aʻu mai ki he 1989, naʻe tuku atu ai ʻe Pōlani mo Hungali ke tali fakalao ʻa e Kau Fakamoʻoni ʻa Sihová. ʻI he 1991, naʻe tuku atu ai ke lēsisita fakalao ʻa e Kau Fakamoʻoni ʻa Sihová ʻi Lūsia. Talu mei ai, naʻe lakalakaimonū ʻa e ngāué ʻi Lūsia pea ʻi he ngaahi lepupilika ki muʻa ʻo e Sovieti ʻIunioní. ʻI he vahaʻa ʻo Maʻasi 1996 mo ʻOkatopa 1998, naʻe tali ai ʻe he Kulupu Pulé ʻa e ngaahi kole nō Fale Fakatahaʻanga ʻe 359 mei he ngaahi ʻōfisi vaʻa naʻa nau tokangaʻi ʻa e ngaahi fonua ʻIulope ʻe 11.
3 ʻI hoʻo sio ki he ngaahi fakatātā ʻi he fakalahi ko ení, fakakaukauloto atu ki he ngaahi meʻa lahi mo fakaofo kuo fai ʻe Sihova maʻa hono kakaí. (Sāme 136:4) Te ke fiefia ke ʻiloʻi ko e ngaahi tokoni ʻa e fetokouaʻaki ʻi māmani lahí ʻoku ngāue lelei ʻaupito ʻaki ai, ʻo fakahaaʻi ai ʻa e meʻa naʻe fakamatalaʻi ʻe Sīsuú, hangē ko ia ʻoku lēkooti ʻi he Sione 13:35: “Ko e meʻa kó é ʻe ʻilo ai ʻe he kakai kotoa pē ko e kau ako kimoutolu aʻaku, ʻo kapau ʻe ai haʻamou feʻofaʻaki.”
4 ʻOku kau ʻa Lumēnia ʻi he lotolotonga ʻo e ngaahi fonua ʻIulope ʻoku maʻu ʻaonga mei ha fokotuʻutuʻu ke tokoni ki he langa ʻo e ngaahi Fale Fakatahaʻangá ʻi he ngaahi fonua ʻoku fakangatangata ʻenau koloá, ʻa ia kuo langa ai ha Fale Fakatahaʻanga ʻe 36 talu mei Siulai 2000. ʻI hono ngāueʻaki ha sīpinga palani ki he meimei kotoa ʻo honau ngaahi Fale Fakatahaʻangá, naʻe langa ai ʻa e Fale Fakatahaʻanga ʻe 61 ʻi ʻIukalaine ʻi he taʻu 2001 mo e toe 76 ʻi he 2002. ʻI he tokoni ʻa e paʻanga naʻe meʻaʻofaʻaki ki he ngāue ʻo e Puleʻangá, kuo langa ai ʻa e ngaahi Fale Fakatahaʻanga ʻe laui teau ʻi Kolōtia, Lūsia, Masitōnia, Molotova, Monitenikolo, Pulukālia, mo Sēpia.
5 Ko hono langa ʻo e ngaahi Fale Fakatahaʻangá ʻi he ngaahi fonua ʻe niʻihi kuo ʻikai ke faingofua, pea kuo pau ke fai ha feinga lahi, ki muʻa ke lava ʻo kamata ʻa e langá tonu. ʻOku faʻa fakamole taimi ʻa e teuteú. Pea ko e fakamole foki ʻo hono langa ha Fale Fakatahaʻanga ʻi he konga ko ia ʻo ʻIulopé ʻoku lahi ʻaupito ʻo laka ange ia ʻi he ngaahi konga lahi ʻo ʻAfilika pe ʻAmelika Tonga. Kae kehe, koeʻuhi ko e fuʻu tupulaki ʻi he tokolahi ʻo e faʻahinga ko ia ʻoku lotu kia Sihová, ʻoku kei fiemaʻu ʻa e ngaahi Fale Fakatahaʻanga ʻe laui teau ʻi he ngaahi fonua ʻIulope ʻoku fakangatangata pē ʻenau koloá!
6 He fakaofo ē ke sio ki he fakautuutu vave pehē ʻi hono langa ʻo e ngaahi Fale Fakatahaʻanga ko ení! Kuo fai ha fakamoʻoni lelei ʻaupito ʻi he ngaahi feituʻu kaungāʻapi ʻa ia kuo langa ai iá, ʻo hangē ko ia ʻoku fakahaaʻi ʻi he ngaahi meʻa lahi naʻe hokosiá. ʻI he ngaahi feituʻu ʻe niʻihi, ʻoku maongo ai ki he ngaahi mafai fakalotofonuá ʻa e laumālie loto-lelei ʻoku fakahaaʻi ʻi he muimui ki he ngaahi fakahinohino langá.
7 Naʻe totonu ʻa e kikite ʻa ʻAisea ʻo fekauʻaki mo e tupulaki ʻa e lotu moʻoní ʻi he taimi ko ení. Fakafou ʻi he palōfitá naʻe tomuʻa tala ai ʻe he ʻOtuá: “Ko au Sihova te u fakavave ia ʻi hono taimi.” (Ai. 60:22) Ko e moʻoni, kuo fakamoʻoniʻi ko e hongofuluʻi taʻu fakamuimuí ʻa e taimi ʻa Sihova ki he fakalahí ʻi ʻIulope Hahake. ʻOfa ke hokohoko atu hono huaʻi mai ʻe Sihova ʻa ʻene tāpuaki lahí ki heʻetau ngaahi feinga ke fakavaveʻi ʻa hono langa ʻo e ngaahi Fale Fakatahaʻangá ʻi he ngaahi fonua lahi ʻi heʻetau fai ʻa e poupou fakapaʻanga lahi ange ki he ngāue ʻo e Puleʻangá! ʻE iku eni ki hono tānaki atu ʻa e ngaahi Fale Fakatahaʻanga lahi ange ki he ngaahi fonua ʻoku fakangatangata ʻenau koloá. ʻE tokoni ia ki he tupu ʻa e lotu maʻá ʻi he ngaahi konga lahi ʻo ʻIulope pea ki hono fai ʻo ha fakamoʻoni lahi ange ki he “ngataʻanga ʻo mamani.”—Ng. 13:47.
[Fakatātā ʻi he peesi 3]
Tuʻuʻanga ʻo e Ngaahi Fale Fakatahaʻanga Mosikou, Lūsia
[Fakatātā ʻi he peesi 4-6]
Ngaahi Fale Fakatahaʻanga Foʻou ʻi ʻIulope Hahake
Strumica, Masitōnia
Daruvar, Kolōtia
Sokal, Vahefonua Lviv, ʻIukalaine
Bitola, Masitōnia
Sofia, Pulukālia
Plovdiv, Pulukālia
Krasnooktyabrskiy, Feituʻu Maykop, Lūsia
Bački Petrovac, Sēpia mo Monitenikolo
Tlumach, Vahefonua Ivano-Frankivsk, ʻIukalaine
Rava-Ruska, Vahefonua Lviv, ʻIukalaine
Stara Pazova, Sēpia mo Monitenikolo
Zenica, Posinia mo Hesekovina
Sokal, Vahefonua Lviv, ʻIukalaine
Zhydachiv, Vahefonua Lviv, ʻIukalaine