Kau Talavou—Langa Hake ha Makatuʻunga Lelei ki he Kahaʻú
1. Ko e hā ʻoku fiemaʻu ai ki he kau talavou Kalisitiané ke nau fakatupu ha tui mālohí?
1 Ko e hā ʻoku muʻomuʻa ʻi hoʻo fakakaukaú? Ko e hā ʻokú ke fakakaukau ki aí? ʻOku fakahanga hoʻo tokanga tefitó ki he ngaahi meʻa lolotongá, pe ʻoku aʻu ia ki he kahaʻú ʻo tokangataha ki he meʻa kuo talaʻofa mai ʻe he ʻOtuá? (Mt. 6:24, 31-33; Luke 8:14) ʻOku fiemaʻu ʻa e tui mālohi ke ngāue ai ki he ngaahi talaʻofa ʻa e ʻOtuá, hangē ko ia ʻoku lava ke hā mei he ngaahi faʻifaʻitakiʻanga ʻa ʻĒpalahame mo Mōsesé. (Hep. 11:8-10, 24-26) ʻE lava fēfē ke ke fakatupu ha tui pehē pea langa hake “ha tuʻunga lelei ki he ʻamui”?—1 Tim. 6:19.
2. Ko e hā ʻoku tau ako mei he faʻifaʻitakiʻanga ʻa Tuʻi Siosaiá?
2 Kumi kia Sihova: Kapau ʻoku ʻi ai haʻo founga-tuʻumaʻu ʻo e ngāue fakalaumālié mo ho fāmilí, ʻoku ala fakaongoongoleleiʻi ia. Kae ʻoua ʻe pehē ʻe fakanatula pē hano fakatupu ʻe ha founga-tuʻumaʻu pehē ha tui mālohí. Ke maʻu “ʻa e ʻiloʻi ʻo e ʻOtua,” kuo pau ke ke kumi fakafoʻituitui kia Sihova. (Pal. 2:3-5; 1 Kal. 28:9) Ko e talavou ko Tuʻi Siosaiá naʻá ne fai ia. Neongo ʻene tupu hake ʻi ha ʻātakai fakalaumālie ʻikai leleí, “naa ne kamata kumi ki he Otua o Tevita ko ene tamai” ʻi he taimi naʻá ne taʻu 15 aí.—2 Kal. 34:3, PM.
3. ʻE lava fēfē ke kumi ʻa e kau talavou Kalisitiane he ʻaho ní kia Sihova?
3 ʻE lava fēfē ke ke kumi kia Sihova? ʻAki hono sivisiviʻi fakalelei ʻa e meʻa ʻokú ke tui ki aí pea ‘sivi ʻo ʻiloʻi’ ko ia tonu ʻa e moʻoní. (Loma 12:2) Ko e fakatātaá, ʻe lava ke ke fakamatalaʻi ʻa e meʻa ʻoku leaʻaki ʻe he Tohitapú ʻo fekauʻaki mo e totó pe fakamoʻoniʻi ko e Puleʻanga ʻo e ʻOtuá naʻe kamata pule ia ʻi hēvani ʻi he 1914? Ko hono maʻu “ʻa e ʻilo kanokano ki he moʻoni” ko ha konga mahuʻinga ia ʻo hono langa hake ha tuʻunga lelei ki he ʻamuí.—1 Tim. 2:3, 4.
4. ʻE lava fēfē ke ʻai ʻe he kau malanga teʻeki papitaisó ke hā ʻenau laka ki muʻá?
4 Ko e kumi ʻa Siosaia ki he ʻOtuá naʻe fakatupu ai ʻa e ngaahi ola lelei. Ki muʻa ke ne aʻu ki hono taʻu 20, naʻá ne ngāue loto-toʻa ke toʻo ʻosi mei he fonuá ʻa e lotu loí. (2 Kal. 34:3-7) ʻI he founga tatau, ko hoʻo fakalakalaka fakalaumālié ʻe hoko ia ʻo eʻa ʻi hoʻo ngaahi ngāué. (1 Tim. 4:15) Kapau ko ha tokotaha malanga teʻeki papitaiso koe, feinga ke fakaleleiʻi ʻa e tuʻunga ʻo hoʻo ngāue fakafaifekaú. ʻOua ʻe fiemālie pē ʻi he tuʻuaki ʻo e ʻū tohí. ʻAi ko hoʻo taumuʻá ia ke ngāueʻaki ʻa e Tohitapú, ke fakaʻuhinga mo e kakaí, pea ke fakatupulekina ʻa e mahuʻingaʻia ʻokú ke maʻú. (Loma 12:7) ʻE tokoniʻi koe ʻe he meʻá ni ke ke tupu fakalaumālie.
5. Ko e hā ʻa e ngaahi faingamālie ʻoku ala maʻu ʻe he kau Kalisitiane papitaisó ke fakalahi ai ʻenau ngāue fakafaifekaú?
5 ʻAve kia Sihova Hoʻo Lelei Tahá: ʻI hoʻo fakahāhā hoʻo fakatapui kia Sihová ʻaki hoʻo papitaisó, ʻokú ke hoko ai ko ha faifekau fakanofo ʻa e ʻOtuá. (2 Kol. 3:5, 6) ʻOku fakaʻatā heni ʻa e ngaahi faingamālie kiate koe ke ke tauhi taimi-kakato ai kia Sihova. ʻOku kau ki heni ʻa e ngāue tāimuʻá pea pehē ki he ngāue Pētelí, misinalé, mo e fakavahaʻapuleʻangá. Neongo ia ko e ngaahi founga kehe ke fakalahi ai hoʻo ngāue fakafaifekaú ko hono ako ha lea ʻe taha pe ko e hiki ke ngāue ʻi he feituʻu ʻoku lahi ange ai ʻa e fiemaʻú.
6. ʻE lava fēfē kia kitautolu kotoa ke langa hake ha makatuʻunga lelei ki he kahaʻú?
6 Ko e moʻoni, ʻoku ʻikai lava ke fakafaingamālieʻi ʻe he tokotaha kotoa ʻa kinautolu ki he ngaahi monū ko eni ʻo e ngāué, ka ko kitautolu taki taha ʻe lava ke tau ʻave kia Sihova ʻetau lelei tahá. (Mt. 22:37) Ko e hā pē ho ngaahi tuʻungá, ʻai ʻa e ngāue kia Sihová ko e meʻa tefito ia ʻi hoʻo moʻuí. (Sāme 16:5) ʻI hono fai iá, te ke langa ai ha makatuʻunga lelei ki he ʻamuí.