“Tauhi ʻa Sihova ʻAki ʻa e Fiefia”
1. Ko e hā ʻe lava ke hoko ko ha matavai ʻo e fiefia lahi ki he kau sevāniti ʻa Sihová?
1 “Mou fiefia ʻi he ʻEiki maʻu ai pe,” ko e tohi ia ʻa e ʻapositolo ko Paulá. “ʻIo, kau toe ʻai atu, Mou fiefia.” (Fili. 4:4) Ko e lāngilangi ʻo hono vahevahe atu ʻa e ongoongo leleí mo hono tokoniʻi ʻa e kakai hangē ha sipí ke lotu kia Sihová ko ha matavai ia ʻo e fiefia lahi. (Luke 10:17; Ng. 15:3; 1 Tes. 2:19) Kae kehe, kapau ʻoku tau ʻiloʻi ʻoku ʻikai ʻi ai ha fiefia ʻi he taimi ʻe niʻihi ʻi heʻetau ngāue fakafaifekaú, ko e hā ʻe lava ke tau faí?
2. ʻE lava fēfē ke tānaki atu ki heʻetau fiefiá ʻa e tauhi ʻi heʻetau tokangá ʻa e matavai ʻo ʻetau ngāué?
2 Ko ha Ngāue Fakanofo ʻe he ʻOtuá: Manatuʻi ko ʻetau ngāue fakamalangá ko e haʻu ia meia Sihova. ʻIo, he lāngilangiʻia ē ko kitautolu ke hoko ko e ‘kaungāngaue mo e ʻOtuá’ ʻi hono fanongonongo ʻa e pōpoaki ʻo e Puleʻangá mo ngaohi-ākongá! (1 Kol. 3:9) Ko Kalaisi Sīsū ʻoku kau mo kitautolu ʻi he ngāue ʻe ʻikai ʻaupito ke toe fai ko ení. (Mt. 28:18-20) ʻOku toe kau longomoʻui ʻa e kau ʻāngeló pea ngāue mo kitautolu ʻi he utu-taʻu lahi fakalaumālie ʻoku lolotonga faí. (Ng. 8:26; Fkh. 14:6) Ko e ngaahi Konga Tohitapú, fakataha mo e ngaahi meʻa ʻoku hokosia ʻe he kakai ʻa e ʻOtuá, ʻoku ʻomai ai ʻa e fakamoʻoni māʻalaʻala ʻoku poupouʻi ʻe Sihova ʻa e ngāué ni. Ko ia ai, ʻi he taimi ʻoku tau malanga aí, ʻoku tau ʻalu atu ‘ʻia Kalaisi, ko e lea ʻa e faʻahinga ʻoku haʻu tonu mei he ʻOtuá, ko e matuʻaki lea ʻi he ʻao ʻo e ʻOtuá.’ (2 Kol. 2:17) Ko ha ʻuhinga mālohi ē ki he fiefiá!
3. Ko e hā ʻa e ngafa ʻoku fakahoko ʻe he lotú ʻi hono tauhi maʻu ʻetau fiefia ʻi he ngāue ʻa e ʻOtuá?
3 ʻOku mātuʻaki fiemaʻu ʻa e lotú ki hono tauhi maʻu ʻetau fiefia ʻi he ngāue ʻa e ʻOtuá. (Kal. 5:22) Koeʻuhi ʻe toki lava pē ke tau fai ʻa e ngāue ʻa e ʻOtuá ʻi hono mālohí, ʻoku fiemaʻu ke tau kole fakamātoato kiate ia ki hono laumālié, ʻa ia ʻokú ne foaki tauʻatāina ki he faʻahinga ʻoku kole kiate iá. (Luke 11:13; 2 Kol. 4:1, 7; Ef. 6:18-20) Ko e lotu fekauʻaki mo ʻetau ngāue fakafaifekaú te ne tokoniʻi kitautolu ke tauhi maʻu ʻa e fakakaukau totonú ʻi he taimi ʻoku tau fehangahangai ai mo e ngaahi tali ʻikai leleí. Te ne ʻai ke tau malava ʻo hokohoko atu ʻa e malanga loto-toʻa mo fiefiá.—Ng. 4:29-31; 5:40-42; 13:50-52.
4. ʻOku anga-fēfē ʻa e tokoni ʻa e teuteu leleí ke fakalahi ʻetau fiefia ʻi he malangá, pea ko e hā ʻa e ngaahi founga ʻaonga ʻe lava ke tau teuteú?
4 Teuteu Lelei: Ko ha founga ʻaonga ki hono fakalahi ʻetau fiefiá ʻi he taimi ʻoku tau kau ai ʻi he ngāue fakafaifekaú ko ʻetau teuteu leleí. (1 Pita 3:15) Ko e teuteu peheé ʻoku ʻikai fiemaʻu ke kau ki ai ha taimi lahi. ʻOku feʻunga mo ha ngaahi miniti siʻi pē ke fakamanatu ai ʻa e ngaahi tuʻuaki kuo fokotuʻu mai ki he ngaahi makasini lolotongá pe ko ha tuʻuaki ʻa ia ʻoku feʻunga mo e tohi ʻokú ke palani ke tuʻuakí. Ki ha lea kamata feʻungamālie, ʻe lava ke ke kumi ki he tohi Reasoning pe ko e ngaahi ʻīsiu ki muʻa ʻo ʻEtau Ngāue Fakafaifekau ʻo e Puleʻanga. ʻOku ʻiloʻi ʻe he kau malanga ʻe niʻihi ʻo e Puleʻangá ʻoku ʻaonga ke hikiʻi ha tuʻuaki nounou ʻi ha kiʻi lauʻipepa. ʻI he taimi ki he taimi, ʻoku nau kiʻi hila ai ki he lauʻipepá ke fakafoʻou ʻenau manatú. ʻOku tokoni ʻa e meʻá ni kia kinautolu ke ikuʻi ai ʻa e loto-siʻí pea ʻoange ai kia kinautolu ʻa e loto-maʻu ke malanga fakataha mo e loto-toʻa.
5. ʻOku anga-fēfē ʻa e ʻaonga kia kitautolu pea mo e niʻihi kehé ʻa e fiefiá?
5 ʻOku ʻomi fakataha ʻi he fiefiá ʻa e ngaahi ʻaonga lahi. Ko ha hehema fiefia ʻokú ne fakalahi ai ʻa e hā fakamānako ʻo ʻetau pōpoakí. ʻOku fakaivimālohiʻi kitautolu ʻe he fiefiá ke tau kātaki. (Nehe. 8:10; Hep. 12:2) Hiliō he meʻa kotoa, ko ʻetau ngāue fiefiá ʻoku fakalāngilangiʻi ai ʻa Sihova. Ko ia ai, tau “tauhi ʻa Sihova ʻaki ʻa e fiefia.”—Sāme 100:2.