Fakahāhā Hoʻo Fakamālō
1 Neongo ʻoku tau moʻui ʻi he “ngaahi taimi faingataʻa,” ʻoku tau maʻu ʻa e ngaahi ʻuhinga lahi ke fakamālō ai kia Sihova. (2 Tim. 3:1) ʻOku muʻomuʻa taha ʻi he lotolotonga ʻo e ngaahi meʻa ko ení ʻa e meʻaʻofa mahuʻinga maʻatautolú ʻa hono ʻAló. (Sione 3:16) ʻIkai ko ia pē, lolotonga ko e faʻahinga ko ia ʻi he lotu loí ʻoku nau fiekaia fakalaumālie, ʻoku tau maʻu ha meʻakai fakalaumālie hulu fau. (Ai. 65:13) Ko e konga kitautolu ʻo ha fetokouaʻaki ʻi māmani lahi pea ʻoku tau maʻu ʻa e monū ke kau ʻi he fakalahi fakafiefia ʻo e lotu moʻoní. (Ai. 2:3, 4; 60:4-10, 22) ʻE lava fēfē ke tau fakahāhā ʻetau fakamālō kia Sihova ʻi he ngaahi tāpuaki ʻokú ne huaʻi hifo kia kitautolú?—Kol. 3:15, 17.
2 Ngāue Fakafiefia mo ʻAufuatō: ʻI he lāulea ki he foaki fakamatelié, naʻe tohi ʻe he ʻapositolo ko Paulá: “ʻOku ʻofa ʻa e ʻOtua ki ha taha ʻoku vekeveke foaki.” (2 Kol. 9:7) ʻOku toe kaunga ʻa e tefitoʻi moʻoni ko ení ki heʻetau ngāue ki he ʻOtuá. Ko e fakamāloó ʻoku tapua atu ia ʻi heʻetau loto-māfana ki he moʻoní, ko ʻetau fiefia ʻi he ngaahi fakataha faka-Kalisitiané, ko ʻetau faivelenga ʻi he malaʻe fakafaifekaú pea mo ʻetau fiefia ʻi hono fakahoko ʻa e finangalo fakaʻotuá.—Sāme 107:21, 22; 119:14; 122:1; Loma 12:8, 11.
3 ʻI ʻIsileli ʻo e kuonga muʻá naʻe ʻikai ke kounaʻi ai ʻe he Laó ha lahi pau ki he ngaahi feilaulau ʻe niʻihi. Ko e tokotaha lotu taki taha naʻe lava ke ne fakahāhā ʻa ʻene houngaʻiá ʻaki ʻa e foaki “ʻo tāu mo e tapuaki ʻa Sihova” ʻa ia naʻá ne maʻú. (Teu. 16:16, 17) ʻI he founga meimei tatau he ʻahó ni, ko ha loto houngaʻia te ne ueʻi kitautolu ke fai ʻa e meʻa lahi ʻo fakatatau ki he meʻa ʻoku fakaʻatā ʻe hotau ngaahi tuʻungá ʻi he ngāue malangaʻi ʻo e Puleʻangá mo e ngaohi-ākongá. ʻE lava ke tau ngāue kakato ange ʻaki ʻa e ngaahi ʻaho mālōlō fakamāmaní, ngaahi mālōlō ʻa e akó, pe ngaahi fakaʻosinga uiké ke fakalahi ai hotau taimi ʻoku fakamoleki ʻi he malaʻe ngāué, naʻa mo e aʻu ʻo tāimuʻa tokoni? ʻE lava ke tau fakahāhā ai ʻetau fakamāloó ʻi ha founga ʻoku toe lahi ange.
4 Tupulekina ʻi he Fakafetaʻí: Ko ha founga mātuʻaki mahuʻinga ʻoku tau fakahāhā ai ʻetau fakamālō kia Sihová ko e lotú. (1 Tes. 5:17, 18) ʻOku ekinaki mai ʻa e Folofola ʻa e ʻOtuá kia kitautolu ke tau “tupulekina [ʻi he tuí], pea o mo ia ʻa e faʻa fakafetaʻi.” (Kol. 2:7) Naʻa mo e taimi ʻoku tau femoʻuekina lahi ai pe ʻi he malumalu ʻo e faingataʻá, ʻoku totonu ke tau fakakau maʻu pē ʻa e fakamāloó ʻi heʻetau ngaahi lotu fakaʻahó. (Fili. 4:6) ʻIo, fakafou ʻi heʻetau ngāue fakafaifekaú pea pehē ki heʻetau ngaahi lotú, ʻofa ke tau “ope atu foki ko e ngaahi fuʻu fakafetaʻi ki he ʻOtua.”—2 Kol. 9:12.