ʻOku Tokoniʻi ʻe Sihova ʻa e Faʻahinga ʻOku Falala Kiate Iá
1 ʻOku vakai ʻa e kakai tokolahi ki he paʻangá, mafaí pea mo e malava fakaetangatá ko e ngaahi kī ia ki he lavameʻá. (Sāme 12:4; 33:16, 17; 49:6) Kae kehe, ko e faʻahinga ʻoku manavahē kia Sihova mo tuku ʻenau falalá kiate iá ʻoku nau maʻu ʻa e fakapapau ʻa e Tohi Tapú ko Iá “ko honau Tokoni ia mo honau Pa.” (Sāme 115:11) Tau vakai angé ki he tafaʻaki ʻe ua ʻa ia ʻoku fiemaʻu ai ke tau fakahāhā ʻa e falala kia Sihová.
2 ʻI he Tuʻunga ko e Kau Faifekau Faka-Kalisitiane: ʻI he taimi kotoa pē ʻoku tau fai ai ha ngaahi konga ʻi he fakatahaʻangá pe faiako ʻi he malaʻe fakafaifekaú, kuo pau ke tau falala kia Sihova. Fakakaukau angé ki he faʻifaʻitakiʻanga ʻa Sīsuú. Neongo ko e ʻAlo ia ʻo e ʻOtuá, naʻe ʻikai te ne falala ki hono poto pe malava ʻoʻoná kae falala kakato ki heʻene Tamai fakahēvaní. (Sione 12:49; 14:10) Huanoa ange ai ʻa e fiemaʻu kiate kitautolu ke tau fai ʻa e meʻa tatau! (Pal. 3:5-7) ʻI he poupou pē ʻa Sihová ʻe fakalāngilangiʻi ai ia heʻetau ngaahi feinga fakangatangatá pea maʻu ʻaonga ai ʻa e niʻihi kehé.—Sāme 127:1, 2.
3 ʻOku tau fakahāhā ʻetau falala kia Sihová ʻi he lotu ki heʻene tatakí pea mo e tokoni ʻa hono laumālie māʻoniʻoní. (Sāme 105:4; Luke 11:13) Tānaki atu ki ai, ʻoku tau fakahāhā ʻetau falala ki he ʻOtuá ʻaki hono fakatefito ʻetau akonakí ʻi heʻene Folofolá, ʻa e Tohi Tapú. Ko ʻene pōpoakí ʻoku ʻi ai ʻa e mālohi ke aʻu ki he ngaahi lotó pea liliuʻi ʻa e ngaahi moʻuí. (Hep. 4:12) ʻI he taimi ʻoku tau ‘fai ai ha tauhi ʻofa kuo tau maʻu ʻetau mafaí mei he ʻEikí,’ ʻoku fakalāngilangiʻi ai ʻa Sihova.—1 Pita 4:11.
4 Fekuki mo e Ngaahi Palopalemá: ʻOku toe fiemaʻu ke tau hanga kia Sihova ki ha tokoni ʻi he fehangahangai mo e ngaahi tengé pea mo e ngaahi palopalemá. (Sāme 46:1) Ko e fakatātaá, ʻe toumoua nai ha pule ngāue ke ʻomai kiate kitautolu ha taimi mālōlō ke maʻu ai ha ʻasemipilī, pe ʻoku tau fehangahangai nai mo ha tuʻunga faingataʻa ʻi heʻetau moʻui fakafāmilí. ʻOku tau fakahāhā ʻetau falala kia Sihová ʻi he kole fakamātoato kiate ia ʻi he lotú pea ngāueʻaki ʻa e tataki ʻokú ne tokonaki mai fakafou ʻi heʻene Folofolá mo e kautahá. (Sāme 62:8; 119:143, 173) ʻI hono fai iá, ko e kau sevāniti ʻa Sihová ʻoku nau hokosia ʻi heʻenau moʻuí ʻa ʻene tokoní.—Sāme 37:5; 118:13, 16.
5 ʻOku fakapapauʻi mai ʻe Sihova tonu kiate kitautolu: “Monuʻiaā ka ko e mafi ʻoku tuʻu ʻene falala kia Sihova, ʻio, ko Sihova hono paletuʻa.” (Sel. 17:7) ʻOfa ke tau fakahāhā ʻetau falala kiate iá ʻi he meʻa kotoa ʻoku tau faí!—Sāme 146:5.