Faʻifaʻitaki ki he Fakamaau Totonu ʻa Sihová
1 “Oku ofa a Jihova ki he fakamāu [totonú].” (Sāme 37:28, PM) Ko ia ai, neongo kuó ne tuʻutuʻuni ke fakaʻauha ʻa e māmani taʻemāʻoniʻoni ko ení, kuó ne fokotuʻutuʻu ke ʻuluaki fakaongo atu ha fakatokanga. (Mk. 13:10) ʻOku ʻoange ʻe he meʻá ni ki he kakaí ʻa e faingamālie ke fakatomala ai pea ke hoko ʻo hao. (2 Pita 3:9) ʻOku tau feinga ke faʻifaʻitaki ki he fakamaau totonu ʻa Sihová? ʻOku ueʻi kitautolu ʻe he mamahi mo e faingataʻaʻia ʻa e fāmili fakaetangatá ke vahevahe atu ai ʻa e ʻamanaki ʻo e Puleʻangá ki he niʻihi kehé? (Pal. 3:27) Ko e ʻofa ki he fakamaau totonú te ne ueʻi kitautolu ke kau longomoʻui ai ʻi he malangá.
2 Malanga Fakataha mo e Taʻefilifilimānako: ʻI hono talaki ʻa e taumuʻa ʻa e ʻOtuá ki he tokotaha kotoa fakataha mo e taʻefilifilimānakó, ʻoku tau “ngāueʻaki [ai] ʻa e fakamaau totonú.” (Mai. 6:8, NW) Kuo pau ke tau talitekeʻi ʻa e hehema taʻehaohaoa ke tomuʻa fakamāuʻi ʻa e niʻihi kehé makatuʻunga ʻi honau fōtunga ʻi tuʻá. (Sem. 2:1-4, 9) Ko Sihová “ʻoku ne finangalo ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:4) Ko e folofola ʻa e ʻOtuá ko e moʻoní ʻe lava ke ne fakatupunga ha ngaahi liliu fakaofo ʻi he moʻui ʻa e kakaí. (Hep. 4:12) Ko hono ʻiloʻi ʻa e foʻi moʻoni ko ení ʻe lava ke ne ueʻi kitautolu ke fakaofiofi ai ki he faʻahinga tāutaha fakataha mo e tuipau, naʻa mo e faʻahinga naʻa nau fakaongotuli nai ʻi he kuohilí.
3 Ko ha tuofefine ʻe taha ʻa ia naʻe ngāue ʻi ha falekoloa naʻá ne kiʻi manavahē ʻi he fōtunga fakaesino ʻo ha tokotaha kasitomā tuʻumaʻu. Ka neongo iá, ʻi he malanga hake ʻa e taimi feʻungamālié, naʻá ne feinga ai ke faifakamoʻoni ki he tokotaha ko iá fekauʻaki mo e Palataisi kuo talaʻofa mai ʻe he ʻOtuá. Naʻe tali fefeka ange ʻe he tokotahá ʻo pehē naʻe ʻikai te ne tui ki he ngaahi talanoa faʻú pea ko ha hipi ia pea ʻoku maʻunimā ʻe he faitoʻo kona tapú. Ka naʻe ʻikai foʻi ai ʻa e tuofefiné. ʻI he ʻaho ʻe taha naʻe ʻeke ange ai ʻe he tokotaha ko iá kiate ia pe ko e hā ʻene fakakaukau fekauʻaki mo hono ʻulu loloá, ko ia naʻe fakamatalaʻi fakapotopoto ange ai ʻe he tuofefiné ʻa e meʻa ʻoku leaʻaki ʻe he Tohi Tapú fekauʻaki mo iá. (1 Kol. 11:14) Ko e ʻohovale fiefia ē naʻá ne hokosiá he ʻi he ʻaho hoko maí naʻe tele maʻa ai ʻa e kava ʻo e tokotahá pea ʻulu nonou! Naʻe kole ai ʻa e tokotahá ni ki ha ako Tohi Tapu, ʻa ia naʻe fiefia ha tokoua ke ne fakahoko peá ne fakalakalaka ai ʻo fakatapui mo papitaiso. ʻI he hangē ko e tangata ko ení, ko e tokolahi ʻoku nau tauhi kia Sihova he ʻaho ní ʻoku nau houngaʻia ʻi he ngaahi feinga taʻefilifilimānako mo kīvoi ʻa e faʻahinga naʻa nau ʻoatu kia kinautolu ʻa e pōpoaki ʻo e Puleʻangá.
4 ʻE vavé ni ke toʻo atu ʻe Sihova ʻa e taʻemāʻoniʻoní mei he māmaní kotoa. (2 Pita 3:10, 13) ʻI he taimi fakangatangata ʻoku toé, ʻofa ke tau faʻifaʻitaki ki he fakamaau totonu ʻa Sihová ʻaki hono ʻoatu ki he tokotaha kotoa ʻa e faingamālie ke hao ai mei he fakaʻauha ka hoko mai ʻo e māmani taʻemāʻoniʻoni ʻa Sētané.—1 Sione 2:17.