Akoʻanga Ako Fakafaifekaú—Ko ha Matapā Lahi ʻOku Taki Atu ki he Ngāué
1 Fakafou ʻi he palōfita ko Selemaiá, naʻe tomuʻa tala ʻe Sihova: “Te u fokotuʻu ke pule [ki hoku kakaí] ha kau tauhi te nau fafanga kinautolu: pea ʻe ʻikai te nau toe manavahe, pea ʻikai te nau moʻu tafuʻua, pea ʻe ʻikai ha to ʻo ka lau.” (Sel. 23:4) ʻOku fakahoko ha ngāue fakaetauhi pehē ʻi he ʻahó ni ʻi he haʻohaʻonga ʻo e kakai ʻo e puleʻanga kotoa pē. ʻOku fai eni ʻe he laui mano ʻo e kau mātuʻa ʻi he fakatahaʻangá. Tānaki atu ki ai, kuo foaki loto-lelei atu kinautolu ʻe ha feohiʻanga ʻo e kau talavou tokolahi, hangē ko e hahaú ki he ngāue ʻa Sihová. (Sāme 110:3) He tāpuaki ē ko e fanga tokoua anga-fakatōkilalo ko ení ki he ngaahi fakatahaʻanga ʻa e kakai ʻa e ʻOtuá! ʻI he hokohoko atu ʻa e ngāue fakatahatahaʻi fakalaumālié, ʻoku kei ʻi ai ʻa e fiemaʻu ki ha kau tangata taau ke nau fakafaingamālieʻi kinautolu ke tauhi ʻa honau fanga tokouá.
2 Ko ha tokonaki lelei ke akoʻi ʻa e kau mātuʻa mo e kau sevāniti fakafaifekau taʻehoá ki he ngaahi fatongia fakautuutú ko e Akoʻanga Ako Fakafaifekaú. ʻOku laka hake he kau ako ʻe toko 22,000 mei he fonua ʻe 140 nai kuo nau maʻu ʻa e ako ko ení ʻi he ngaahi kalasi ʻe 999, ʻa ia kuo fai talu mei he kamata ʻa e akoʻangá ʻi he 1987. Ki he fanga tokouá ni, naʻe fakamoʻoniʻi ai ʻa e akoʻangá “ko ha matapā lahi ʻoku taki atu ki he ngāué.”—1 Kol. 16:9, NW.
3 Taumuʻa ʻa e Akoʻangá: Ko e taumuʻa ʻa e Akoʻanga Ako Fakafaifekaú ke akoʻi mo teuʻi ʻa e kau tangata tāú ki he ngaahi fatongia ʻi ha feituʻu pē ʻe ʻi ai ha fiemaʻu ʻi he kautahá. ʻOku fakalahi ʻe he akoʻangá ʻenau ngaahi malava ke takimuʻa ʻi he ngāue fakaʻevangelioó, kau ʻi hono tauhi ʻa e tākangá mo e faiako ʻi he fakatahaʻangá. Hili ʻa e maʻu tohi fakamoʻoni akó, ʻoku vaheʻi ai ʻa e kau ako ʻe niʻihi ko e kau tāimuʻa makehe pe kau ʻovasia fefonongaʻaki ʻi honau ngaahi fonua tupuʻangá pe ʻi muli. ʻOku maʻu ʻe he niʻihi ʻa e ngaahi vāhenga-ngāue ke ngāue ai mo ʻenau ngaahi fakatahaʻanga ʻi ʻapí pe ʻi he ngaahi feituʻu ʻa ia ʻoku lahi ange ai ʻa e fiemaʻú ʻi loto ʻi he feituʻu vaʻá.
4 Lolotonga ʻa e koosi uike ʻe valú, ʻoku kamata ai ʻa e kau akó ʻi hano ako fakalahi ʻo e Tohi Tapú. ʻOku nau vakaiʻi lelei ha ngaahi akonaki Fakatohitapu kehekehe lahi pea pehē ki he ngaahi fatongia fakaetauhí mo e ngaahi fakahinohino ki hono fakaleleiʻi ʻa e ngaahi palopalema ʻi he moʻui faka-Kalisitiané. ʻOku nau toe ako foki ki he meʻa ʻoku akoʻi ʻe he Tohi Tapú fekauʻaki mo e ngaahi meʻa fakaefakahoko ngāué, fakaefakamāú mo fakaekautahá. ʻOku nau maʻu ʻa e ako makehe ki he malanga maʻá e kakaí pea ʻoku ʻoange kia kinautolu ʻa e tokoni fakafoʻituitui ke fakavaveʻi ʻa ʻenau tupu fakalaumālié.
5 Ngaahi Fiemaʻu: ʻOku mahino, ko e ngaahi fiemaʻu ke kau ki he akó ʻoku māʻolunga. Ko e kau tohi kolé kuo pau naʻa nau ʻosi ngāue ko e kau mātuʻa pe ko e kau sevāniti fakafaifekau ʻo ʻikai siʻi hifo he taʻu hokohoko ʻe ua. Kuo pau ke nau taʻehoa kotoa pea ʻi he vahaʻa ʻo e taʻu 23 mo e 50. Ko e kau tohi kolé kuo pau ke nau malava ʻo lautohi, tohi, pea lea lelei ʻi he lea ʻa ia ʻoku fakahoko ai ʻa e akó, pea kuo pau ke nau moʻui lelei, ʻo ʻikai fiemaʻu ki ai hano tokangaʻi pe ko e founga kai makehe. ʻOku lelei ange ʻa e faʻahinga ʻoku ʻi he ngāue tāimuʻa tuʻumaʻú.
6 Ko e faʻahinga ʻoku polé kuo pau ke nau loto-lelei pea malava ke ngāue ʻi ha feituʻu pē ʻe fiemaʻu ki ai kinautolu. ʻOku fiemaʻu heni ha laumālie hangē ko ia ko e palōfita ko ʻAiseá, ʻa ia naʻá ne vēkeveke foaki atu ia tonu ke fai ha ngāue makehe, ʻo ne pehē: “Ko au eni; fekau au.” (Ai. 6:9 [6:8, PM]) Naʻá ne toe fakahāhā ʻa e anga-fakatōkilaló ʻi he kotoa ʻo ʻene moʻuí. Ko e faʻahinga ʻoku nau fakafaingamālieʻi kinautolu ki he Akoʻanga Ako Fakafaifekaú ʻoku totonu ke ueʻi kinautolu ʻe he ʻofa ki honau fanga tokouá mo ha holi ke tauhi kia kinautolu kae ʻikai ko ha holi ke tuʻu-ki-muʻa pe ʻi ha tuʻunga makehe. Hili hono maʻu ʻa e ako lelei peheé, ko e kau maʻu tohi fakamoʻoni akó ʻoku ʻamanekina ke nau ngāueʻaki ʻa e meʻa kuo nau akó ke ʻaonga ki he niʻihi kehé.—Luke 12:48.
7 Ngaahi ʻAonga: Lolotonga ʻa e uike ʻe valu ʻo e ako lahí, ko e kau maʻu tohi fakamoʻoni akó ʻoku “fafagaʻi [kinautolu] i he gaahi lea oe tui moe akonaki lelei.” (1 Tim. 4:6, PM) ʻOku teuʻi ʻe he meʻá ni kinautolu ke tokoniʻi mo fakalototoʻaʻi ʻa e niʻihi kehe ʻi he ngaahi fakatahaʻanga mo e ngaahi sēketi ʻoku vaheʻi kinautolu ki aí. ʻI he ngaahi feituʻu lahi ʻa ia ʻoku vaheʻi ki ai ʻa e kau maʻu tohi fakamoʻoni ako ʻo e Akoʻanga Ako Fakafaifekaú, kuo fakalahi ai ʻa e ngāue fakamalangá; kuo fakaʻaiʻai ai ʻa e ngāue tāimuʻá, tautefito ʻi he lotolotonga ʻo e fānaú; pea kuo fai ʻa e tokanga fakafoʻituitui lahi ange ki he faʻahinga foʻou tokolahi ʻoku nau feohi mo e kakai ʻa e ʻOtuá.
8 Ko ha mātuʻa pe sevāniti fakafaifekau taʻehoa koe ʻi he vahaʻa ʻo e taʻu 23 mo e 50? Ko e hā ʻoku ʻikai te ke fakakaukau ai ke tohi kole ki he Akoʻanga Ako Fakafaifekaú? Ko ha tokoua koe ʻokú ke fakakaukauloto ki haʻo ngaahi taumuʻa taimi lōloa ʻi he ngāue ʻa Sihová? Ko e hā ʻoku ʻikai ai ke tauhi ke faingofua hoʻo moʻuí pea ʻatā mei he ngaahi fakahohaʻá koeʻuhi ke ke lava ʻo hū ai ki he “matapā lahi [ko eni] ʻoku taki atu ki he ngāué”? ʻE lava ke ne ʻoatu kia koe ʻa e fiefia mo e fiemālie lahi. Ko e moʻoni, ko e Akoʻanga Ako Fakafaifekaú kuo fakamoʻoniʻi ia ko ha tāpuaki ʻo ʻikai ki he kau maʻu tohi fakamoʻoni ako pē ʻo e akoʻangá ka ki he ngaahi fakatahaʻanga ʻa e kakai ʻa e ʻOtuá ʻi māmani lahí.
[Puha ʻi he peesi 3]
Founga ʻo ʻEnau Maʻu ʻAonga mei he Akó
“Kuo fakalahi moʻoni ʻe he akó ʻa ʻeku ngāue fakafaifekaú mo ʻeku malava ke tauhi ʻa e tākangá ʻaki ʻa e potó, ʻi hono ngāueʻaki ʻa e Tohi Tapú.”
“Kuo ʻomai kiate au ʻe he akoʻangá ha loto-maʻu lahi ange ʻi hono fakahoko ʻa hoku ngaahi fatongia kehekehe ʻi he fakatahaʻangá.”
“Kuó ne liliuʻi ʻa e meimei tafaʻaki kotoa ʻo ʻeku moʻuí, ʻo kau ai ʻa e founga ʻo ʻeku ongoʻi fekauʻaki mo e tuʻunga teokalatí pea mo e kautaha ʻa e ʻOtuá.”
“Ko e ako naʻá ku maʻú naʻá ne tokoniʻi au ke u ʻiloʻi ʻa e fiemaʻu ke fakafaingamālieʻi au ke ngāue ʻi he feituʻu ʻoku ʻi ai ha fiemaʻú.”