Tauhi Ho Matá ke Huʻufataha
1. ʻOku ʻuhinga ki he hā ke maʻu ha mata huʻufatahá, pea ko e hā ʻoku mahuʻinga ai ení?
1 ʻI heʻene Malanga ʻi he Moʻungá, naʻe fakahanga ai ʻe Sīsū ʻa e tokangá ki he tākiekina lahi fakaʻulia ʻoku lava ke ngāueʻaki ʻe he mata fakaefakatātaá pe fakalaumālié ʻi heʻetau ʻalunga moʻuí fakakātoa. Naʻá ne pehē: “Ko ia kapau ʻoku huʻufataha ʻa e sio ʻa ho mata, ʻe māma pe ho sino kotoa: ka ka kovi ho mata, pea ʻe fakapoʻuli ho sino kotoa.” (Mt. 6:22, 23) Ko ha mata huʻufataha ko e mata ia ʻoku fakahangataha ki ha taumuʻa ʻe taha—ko hono fai ʻa e finangalo ʻo e ʻOtuá—ʻo ʻikai fakahohaʻasi ʻe he loto-moʻua taʻetotonu ki he ngaahi meʻa fakamatelié. (Mt. 6:19-21, 24-33) Ko e hā ʻe lava ke ne tokoniʻi kitautolu ke tauhi maʻu ha mata huʻufatahá?
2. Ko e hā ʻa e vakai ki he ngaahi meʻa fakamatelié ʻoku fakaʻaiʻai mai ʻe he Folofola ʻa e ʻOtuá?
2 Fakatupulekina ʻa e Fiemālié: Ko e tokonaki feʻunga ki he ngaahi fiemaʻu ʻa hoto fāmilí ko ha fatongia Fakatohitapu ia. (1 Tim. 5:8) Ka ʻoku ʻikai fiemaʻu heni ke tau kau ʻi ha kumi taʻefakangatangata ki he ngaahi meʻa lelei tahá mo fakaeonopooni tahá. (Pal. 27:20; 30:8, 9) ʻI hono kehé, ʻoku enginaki mai ʻa e Tohi Tapú kia kitautolu ke tau fiemālie pē ʻi he “meʻakai mo e kofu,” ʻa e ongo meʻa tefito ʻoku fiemaʻu ki he moʻuí. (1 Tim. 6:8; Hep. 13:5, 6) Ko e tokanga ki he faleʻi ko ení ʻe lava ke ne tokoniʻi kitautolu ke tauhi hotau matá ʻi he tokangataha ki he meʻa totonú.
3. Ko e hā ʻe lava ke ne tokoniʻi kitautolu ke fakaʻehiʻehi mei he ngaahi kavenga ʻomi pē ʻe kitá?
3 ʻOku fakapotopoto ke tau fakaʻehiʻehi mei hono fakakavengaʻi kitautolu ʻaki ʻa e moʻua ʻoku ʻikai ke fiemaʻú pea mo e ngaahi koloá pe ko e ngaahi ngāue ʻoku fiemaʻu ki ai ʻa e taimi mo e tokanga lahí. (1 Tim. 6:9, 10) ʻE lava fēfē ke tau fai ení? ʻI he fakakaukauloto atu ki ha ʻalunga ʻo e ngāué, lotu fakamātoato fekauʻaki mo e meʻá pea fakafuofuaʻi faitotonu pe ʻe halalotoʻapi ia ʻi he ngaahi ngāue fakalaumālié. Fakapapauʻi ke tauhi ke muʻomuʻa ʻa e ngaahi meʻa fakalaumālié ʻi hoʻo moʻuí.—Fili. 1:10; 4:6, 7.
4. Ko e hā ʻoku totonu ai ke tau kumi ki ha ngaahi founga ke ʻai ai ke huʻufataha ʻetau founga moʻuí?
4 ʻAi ke Huʻufataha ʻa Hoʻo Founga Moʻuí: Ko e toe tokoni ʻe taha ki hono talitekeʻi ʻo e fusi ʻe he ʻofa ki he meʻa fakamatelié ko e kumi ki he founga ke ʻai ai ke huʻufataha ʻa hoʻo founga moʻuí. Ko e tokoua ʻe taha ʻa ia naʻá ne ʻiloʻi ʻe lava ke lele lelei ʻa hono fāmilí ʻo ʻikai ha ngaahi koloa fakamatelie tōtuʻá naʻá ne pehē: “ʻOku lava he taimí ni ke u fai ʻa e meʻa lahi ange ʻi he fakatahaʻangá ke tauhi ai ki hoku fanga tokouá. ʻOku ou tuipau ʻoku tāpuakiʻi ʻe Sihova ʻa e kotoa ʻo ʻene kau sevānití ʻi heʻenau fakamuʻomuʻa ʻa e lotu moʻoní ʻi heʻenau ngaahi meʻa fakafoʻituituí.” ʻE lava ke ke maʻu ʻa e ngaahi tāpuaki lahi ange ʻaki hono ʻai ke huʻufataha ʻa hoʻo founga moʻuí?
5. Ko e hā ʻoku fiemaʻu ai ʻa e feinga tuʻumaʻu ke tauhi ke huʻufataha hotau matá?
5 ʻOku fiemaʻu ʻa e feinga tuʻumaʻu ke talitekeʻi ʻa e tākiekina ʻa Sētané, ko hono māmani tuli ki he meʻa fakamatelié pea mo hotau kakano taʻehaohaoá tonu. ʻI he ʻikai ke fakaʻatā ke sio takai holo ʻa hotau matá, tau ʻai ke fakahangataha ia ki hono fai ʻa e finangalo ʻo e ʻOtuá pea ki heʻetau ʻamanaki mahuʻinga ʻo e moʻui taʻengatá.—Pal. 4:25; 2 Kol. 4:18.