Faifakamoʻoni ki he Ngaahi Kāingá—Anga-Fēfē?
1. Ko e hā ʻoku fiemaʻu ai ʻa e ʻiloʻiló ʻi heʻetau faifakamoʻoni ki he ngaahi kāingá?
1 Ko e hā mo ha toe fiefia lahi ange ʻe lava ke tau maʻu ka ko ʻetau hū atu ki he māmani foʻoú fakataha mo e faʻahinga ʻoku tau ʻofa aí, ʻo lotu fāʻūtaha mo kinautolu kia Sihova! ʻI heʻetau faifakamoʻoni ki he ngaahi kāingá, ko e ʻamanaki fakafiefia ko ení ʻe hoko nai ʻo moʻoni. Kae kehe, ke fai ia ʻi ha founga fakaivifoʻoú, ʻoku fiemaʻu ki ai ʻa e ʻiloʻilo. Ko ha ʻovasia sēketi naʻá ne fakatokangaʻi: “Ko e ngaahi ola lelei tahá ʻoku maʻu ia ʻe he faʻahinga ʻoku nau langaʻi ʻa e fieʻilo ʻa honau ngaahi kāingá ʻi hano fai ha fakamoʻoni fakafeʻunga he taimi ki he taimi.” ʻE anga-fēfē haʻatau fai ení?
2. ʻOku anga-fēfē hono tokoniʻi kitautolu ʻe hono fakahaaʻi ʻa e mahuʻingaʻia moʻoni ʻi hotau ngaahi kāingá ke tau langaʻi ʻenau fieʻiló?
2 Langaʻi ʻEnau Fieʻiló: Fai ha fakakaukau lelei tokamuʻa ki he founga te ke ueʻi ai ʻa e mahuʻingaʻia ho ngaahi kāingá. (Pal. 15:28) Ko e hā ʻa e ngaahi meʻa ʻoku nau hohaʻa ki aí? Ko e hā ʻa e ngaahi pole ʻoku nau fehangahangai mo iá? Mahalo ʻe lava ke ke vahevahe atu ha kupu pe lave ki ha konga Tohi Tapu fakamānako ʻo ha foʻi kaveinga ʻoku nau mahuʻingaʻia makehe ai. Kapau ko ho ngaahi kāingá ʻoku ʻikai ke nau nofo ofi atu, mahalo te ke lava ʻo fai eni fakafou ʻi he faitohi pe telefoni. ʻI he ʻikai ke lōmekina kinautolú, tūtuuʻi ʻa e ngaahi tenga ʻo e moʻoní, pea hanga kia Sihova ke ne ʻai ʻa e ngaahi tenga ko iá ke tupu.—1 Kol. 3:6.
3. ʻE anga-fēfē nai hano fakaʻatā ʻe he mahuʻingaʻia hotau ngaahi kāingá ʻiate kitautolú ʻa e hala ke tau fai ai ha fakamoʻoní?
3 Naʻe fakahinohinoʻi ʻe Sīsū ha tangata ʻa ia naʻá ne kapusi mei ai ʻa e kau tēmeniō tokolahi: “Alu ki ho abi ki ho kaiga, mo fakaha kiate kinautolu ae gaahi mea lahi kuo fai e he Eiki maau, mo ene manavaofa kiate koe.” (Mk. 5:19, PM) Fakaʻuta atu ki he anga ʻo e ongoʻi kuo pau ne maʻu ʻe hono ngaahi kāingá! Neongo ʻe ʻikai nai te ke hokosia ha meʻa ʻe fuʻu hā fakaofo pehē, ka ʻe hangehangē ʻe mahuʻingaʻia ho ngaahi kāingá ʻi hoʻo ngaahi ngāué pe ko e ngaahi ngāue hoʻo fānaú. Ko e lave ki ha malanga naʻá ke fai ʻi he Ako Fakafaifekau Fakateokalatí, ko ha fakataha-lahi naʻá ke maʻu, ko haʻo ʻaʻahi ki he Pētelí, pe ko ha meʻa mahuʻinga naʻá ke hokosia fakafoʻituituí te ne fakaʻatā atu nai ai kiate koe ʻa e hala ke vahevahe mo kinautolu ha meʻa lahi ange ʻo fekauʻaki mo Sihova mo ʻene kautahá.
4. Ko e hā ʻa e ngaahi tōʻanga ʻoku totonu ke tau fakaʻehiʻehi mei ai ʻi he taimi ʻoku tau faifakamoʻoni ai ki he ngaahi kāingá?
4 Hoko ʻo ʻIloʻilo: ʻI he faifakamoʻoni ki he ngaahi kāingá, fakaʻehiʻehi mei hano fai ha fuʻu fakamatala lahi fakaʻangataha. ʻI he manatu ki he taimi naʻá ne kamata ke ako ai ʻa e Tohi Tapú, naʻe fakahaaʻi ʻe ha tokoua ʻe taha: “Naʻá ku toki nafui ʻeku faʻeé ʻi he ngaahi laulaui houa ʻaki ʻa e ngaahi fakamatala fekauʻaki mo e meimei meʻa kotoa pē kuó u ako mei he Tohi Tapú, pea naʻe faʻa hoko ai heni ki he fakakikihi, tautefito ki heʻeku tamaí.” Naʻa mo e taimi ʻoku fakahaaʻi ai ʻe ha kāinga ha mahuʻingaʻia ʻi he pōpoaki ʻo e Tohi Tapú, tali ʻi ha founga ke ʻosi angé ʻoku kei hoholi mai ʻa e tokotaha ko iá ke ʻilo lahi ange. (Pal. 25:7) Fakahāhaaʻi maʻu pē ʻa e tokaʻi, anga-lelei mo e kātaki, ʻo hangē pē ko hoʻo fai ʻi hoʻo talanoa ki he kau sola ʻi he ngāue fakafaifekaú.—Kol. 4:6.
5. Ko e hā ʻoku totonu ke tau faí kapau ʻoku ʻikai ke tali lelei mai ʻe hotau ngaahi kāingá ʻi he taimi ʻoku tau faifakamoʻoni ai kiate kinautolú?
5 ʻI he taimi ʻe taha, naʻe fakakaukau ai ʻa e kāinga ʻo Sīsuú kuó ne fakasesele. (Mk. 3:21) Kae kehe, ki mui ai, naʻe hoko ʻa e niʻihi ko e kau tui. (Ng. 1:14) Kapau ko hoʻo ngaahi ʻuluaki feinga ke vahevahe ʻa e moʻoní mo ho ngaahi kāingá ʻoku ʻikai ke tali lelei, ʻoua ʻe foʻí. Ko honau ngaahi tuʻungá mo ʻenau ngaahi fakakaukaú ʻe lava ke liliu. Hokohoko atu hono kumi ha toe faingamālie ke vahevahe atu ai ha poini te ne langaʻi nai ʻa ʻenau fieʻiló. Te ke maʻu nai ai ʻa e fiefia ʻi hono tokoniʻi kinautolu ke nau kamata ʻi he hala ki he moʻui taʻengatá.—Mt. 7:13, 14.