Taimi-Tēpile Fakafāmilí—Ngaahi Fakataha ʻa e Fakatahaʻangá
1 Kapau ko ha mātuʻa Kalisitiane koe, ʻokú ke fiemaʻu hoʻo fānaú ke nau tupu hake ʻo ʻofa pea tauhi kia Sihova pea faai atu pē ʻo nau maʻu ʻa e moʻui taʻengata ʻi he māmani foʻou ʻa e ʻOtuá kuo talaʻofá. ʻE lava fēfē ke ke tokoniʻi kinautolu ke nau fakamuʻomuʻa ʻa e lotu kia Sihová ʻi heʻenau moʻuí? Ko ha founga tefito ʻoku fakafou ia ʻi hoʻo faʻifaʻitakiʻangá. (Pal. 20:7) ʻI hono manatuʻi e faʻifaʻitakiʻanga ʻa ʻene faʻē ʻi he tuí, naʻe pehē ai ʻe ha tuofefine ʻe taha: “Naʻe ʻikai ʻaupito ʻi ai ha fakaʻalongaua pe te mau ʻalu pe ʻikai ki he fakatahá.” Naʻe ʻai ʻe he meʻá ni ke maongo fuoloa kiate ia.
2 ʻOku mahinoʻi ʻe ho fāmilí ʻa e taumuʻa ʻo e ngaahi fakataha ʻa e fakatahaʻangá? Ko e fakahinohino ʻoku tau maʻu ʻi he ngaahi fakatahataha ko ení ʻokú ne fakalongomoʻuiʻi kitautolu ke tau hokohoko atu ʻi hono fai ʻa e finangalo ʻo e ʻOtuá, pea ko e feohi ʻoku tau fiefia ai mo hotau fanga tokouá ko ha matavai taʻealafakatataua ia ʻo e fakalototoʻá. (Ai. 54:13; Loma 1:11, 12) Kae kehe, ko e taumuʻa tefito ʻo e ngaahi fakataha peheé ko hono fakahīkihikiʻi ʻa Sihova “i he gaahi fakataha oe kakai.” (Sāme 26:12, PM) ʻOku ʻomai kia kitautolu ʻe he ngaahi fakataha faka-Kalisitiané ʻa e ngaahi faingamālie ke fakahāhā ai ʻa ʻetau ʻofa kia Sihová pea ke lotu kiate ia.
3 “Hanganaki Tokanga Lahi”: Ko e houngaʻia ki he taumuʻa toputapu ʻo ʻetau ngaahi fakatahá te ne ueʻi kitautolu ke tau “hanganaki tokanga lahi” ke ʻoua naʻa tau fakatupulekina māmālie ʻa e tōʻonga ʻo e liʻaki ʻa e ngaahi fakatahá koeʻuhi ko ha fanga kiʻi meʻa ʻoku siʻi hono mahuʻingá. (Ef. 5:15, 16, NW; Hep. 10:24, 25) ʻI hono fokotuʻu ʻa hoʻo taimi-tēpile fakafāmilí, te ke kamata ʻaki nai hoʻo fakaʻilongaʻi ʻa e ngaahi taimi ʻo e ngaahi fakataha ʻa e fakatahaʻangá. Pea tokanga ke ʻoua ʻe fakaʻatā ʻa e ngaahi ngāue kehé ke ne uesia kinautolu. Fakapapauʻi ko hono maʻu ʻa e fakatahá ʻa e meʻa mahuʻinga taha ki ho fāmilí.
4 ʻIkai nai ʻoku ueʻi kitautolu ʻi heʻetau lau ʻo fekauʻaki mo hotau fanga tokoua naʻa nau ikunaʻi ʻa e ngaahi fakafaingataʻaʻiaʻangá ke maʻu ai ʻa e ngaahi fakatahá mo e ngaahi ʻasemipilií? Neongo ʻoku ʻikai nai ke loko eʻa ʻa ho ngaahi tuʻungá, ngalingali ko koe foki ʻokú ke fetaulaki nai mo e ngaahi pole. ʻOku ʻai ʻe Sētane ke fakautuutu ʻa e faingataʻa ki he kakai ʻa e ʻOtuá ke nau lotu kia Sihova. Neongo ia, fakapapauʻi ʻe fakatokangaʻi pau ʻe hoʻo fānaú ʻa e feinga ʻosi fakapapauʻi ʻa hoʻo fāmilí ke maʻu ʻa e ngaahi fakataha ʻa e fakatahaʻangá. Ko e moʻoni, ʻi he fai peheé, te ke ʻoange nai ai kia kinautolu ha meʻaʻofa fakalaumālie ʻe ʻikai ʻaupito ke ngalo.