ʻOku Tokoniʻi Kitautolu ʻe he Ngāue Fakamalangá Ke Tau Kātaki
1 ʻOku ekinaki mai ʻa e Folofola ʻa e ʻOtuá kia kitautolu ke tau “kitaki atu ʻetau lele he fakapuepue kuo tala humaki mai kiate kitautolu.” (Hep. 12:1) Hangē pē ko e fiemaʻu ʻe ha tokotaha lele ke ne kātaki ki ha ikuna lavameʻá, ʻoku pehē pē ʻa ʻetau fiemaʻu ʻa e kātakí ke aʻusia ai ʻa e pale ʻo e moʻui taʻengatá. (Hep. 10:36) ʻE lava fēfē ke tokoniʻi kitautolu ʻe he ngāue fakafaifekau faka-Kalisitiané ke tau kātaki faitōnunga ʻo aʻu ki he ngataʻangá?—Mt. 24:13.
2 Fakaivimālohiʻi Fakalaumālie: Ko ʻetau talaki atu ko ia ʻa e talaʻofa fakaofo ʻa e Tohi Tapú fekauʻaki mo ha māmani foʻou māʻoniʻoní ʻokú ne tokoniʻi kitautolu ke tau tauhi ʻetau ʻamanakí tonu ke māʻalaʻala. (1 Tes. 5:8) ʻI heʻetau kau tuʻumaʻu ki he malaʻe fakafaifekaú, ʻoku tau maʻu ai ʻa e faingamālie ke ʻai ke ʻiloʻi ʻa e ngaahi moʻoni kuo tau ako mei he Tohi Tapú. ʻOku tau maʻu ai ʻa e faingamālie ke taukapoʻi ʻetau tuí, ʻa ia ʻoku tokoni leva ia ke fakaivimālohiʻi fakalaumālie ai kitautolu.
3 Ke lava ʻo akoʻi ola lelei ʻa e niʻihi kehé, kuo pau ke tau mahinoʻi māʻalaʻala ʻe kitautolu tonu ʻa e ngaahi moʻoni Fakatohitapú. Kuo pau ke tau fai ʻa e fekumi mo e fakalaulauloto ki he fakamatalá. Ko e feinga ʻaufuatō ʻoku tau faí ʻoku fakaloloto ai ʻetau ʻiló, fakaivimālohiʻi ai ʻetau tuí pea fakaivifoʻou fakalaumālie ai kitautolu. (Pal. 2:3-5) Ko ia ai, ʻi heʻetau kumi ke tokoniʻi ʻa e niʻihi kehé, ʻoku tau fakaivimālohiʻi ai kitautolu tonu.—1 Tim. 4:15, 16.
4 Ko e kau faivelenga ki he ngāue fakafaifekaú ko ha konga mātuʻaki mahuʻinga ia ʻo e “mahafu tau kotoa oe Otua,” ʻa ia ʻoku tau fiemaʻu kae lava ke tau tuʻumaʻu ʻo fakafepakiʻi ʻa e Tēvoló mo e kau tēmenioó. (Ef. 6:10-13, 15, PM) Ko ʻetau hoko ko ia ʻo femoʻuekina ʻi he ngāue toputapú ʻoku tokoniʻi ai kitautolu ke tau tauhi ʻetau fakakaukaú ke huʻufataha ki he ngaahi meʻa fakatupu langa haké pea ke fakaʻehiʻehi ai mei he hoko ʻo fakameleʻi ʻe he māmani ʻa Sētané. (Kol. 3:2) ʻI heʻetau akoʻi ki he niʻihi kehé ʻa e ngaahi founga ʻa Sihová, ʻoku hokohoko fakamanatu mai ai kia kitautolu ʻa ʻetau fiemaʻu tonu ke tauhi maʻu ʻa e ʻulungāanga māʻoniʻoní.—1 Pita 2:12.
5 Fakaivia ʻe he ʻOtuá: Fakaʻosí, ko ʻetau kau atu ko ia ʻi he ngāue fakaʻevangelioó ʻoku akoʻi ai kitautolu ke tau falala kia Sihova. (2 Kol. 4:1, 7) He tāpuaki moʻoni ia! Ko ʻetau fakatupulekina ʻa e falala peheé ʻoku teuʻi ai kitautolu ʻo ʻikai ki hono fakahoko pē ʻa ʻetau ngāue fakafaifekaú ka ke toe fekuki ai mo ha faʻahinga tuʻunga pē te tau fetaulaki nai mo ia ʻi he moʻuí. (Fili. 4:11-13) ʻOku moʻoni, ko e ako ke falala kakato kia Sihová ʻa e kī ki he kātakí. (Sāme 55:22) ʻI he ngaahi founga lahi, ʻoku tokoniʻi ai kitautolu ʻe he ngāue fakamalangá ke tau kātaki.