Talaki ʻa e Lāngilangi ʻo Sihová
1 Naʻe fanongonongo ʻe he tokotaha-tohi-sāmé: “Hiva kia Sihova, ʻa mamani kotoa. . . . Aʻau ki he ngaahi puleʻanga hono kololia [pe lāngilangí], ʻene ngaahi ngaue fakaofo ʻi he ngaahi faʻahinga kotoa.” ʻI heʻetau fakakaukauloto ko ia ki he meʻa kuo fai ʻe Sihová, meʻa ʻokú ne lolotonga faí pea mo e meʻa te ne toki fai maʻa kitautolú, ʻoku ueʻi ai kitautolu ʻe hotau lotó ke tau talaki ʻa hono lāngilangí!—Sāme 96:1, 3.
2 ʻI Heʻetau Ngāue Fakafaifekaú: ʻOku maʻu ʻe he Kau Fakamoʻoni ʻa Sihová ʻa e monū ke nau fataki ʻa e huafa ʻo e ʻOtuá pea ke fakahīkihikiʻi fakahāhā ia ʻi he kotoa ʻo e foʻi māmaní. (Mal. 1:11) He fehangahangai ē mo e haʻa faifekau ʻo e Puleʻanga-Haʻa-Kalisitiané, ʻa ia ʻoku nau toʻo fiematamuʻa ʻa e huafa ʻo e ʻOtuá mei heʻenau ngaahi liliu Tohi Tapú! Ko e ngāue ʻo hono ʻai ke ʻiloa ʻa e huafa ʻo e ʻOtuá ʻoku fakavavevave ia, he kuo pau ki he kakaí ke nau ui ki he huafa ko iá ʻi he tui koeʻuhi ke fakahaofi ai kinautolu ʻi he mamahi lahi ka hoko maí. (Loma 10:13-15) ʻIkai ko ia pē, ko e melino fakaeʻunivēsí, ʻo kau ai ʻa e melino ʻi he lotolotonga ʻo e kau nofo ʻi he foʻi māmaní, ʻoku fakatuʻunga ia ʻi hono fakatoputapuʻi ʻa e huafa ʻo e ʻOtuá. Ko e moʻoni, ko e kotoa ʻo e ngaahi ngāue ʻa e ʻOtuá ʻoku fakafehokotaki ia ki hono huafá.
3 “ʻOku lahi ʻa Sihova, pea ʻoku totonu ke lahi hono fakamaloʻia.” Ka ki he kakaí ke nau “tuku kia Sihova ʻa e kololia [pe lāngilangi] hono huafa,” kuo pau ke nau ʻiloʻi ʻa e moʻoni ʻo fekauʻaki mo iá. (Sāme 96:4, 8) Kae kehe, ʻoku fakaʻikaiʻi ʻe he niʻihi ia ʻoku moʻui ʻa e ʻOtuá. (Sāme 14:1) ʻOku lauʻikoviʻi ia ʻe he niʻihi kehé ʻo pehē ʻoku ʻikai ʻi ai hano mālohi, pe ʻoku nau taukaveʻi ʻo pehē ʻoku ʻikai ke mahuʻingaʻia ia ʻi he ngaahi meʻa ʻa e faʻahinga ʻo e tangatá. ʻI heʻetau tokoniʻi ʻa e faʻahinga loto-faitotonú ke nau maʻu ʻa e ʻilo totonu fekauʻaki mo hotau Tokotaha-Fakatupú, ko ʻene ngaahi taumuʻá pea mo hono ʻulungāanga fakatupu ʻofeiná, ʻoku tau fakalāngilangiʻi ai ʻa Sihova.
4 ʻAki Hotau ʻUlungāangá: Ko e moʻui ʻo fehoanaki mo e ngaahi tuʻunga māʻoniʻoni ʻa Sihová ʻoku fakalāngilangiʻi ai ia. Ko hotau ʻulungāanga leleí ʻoku ʻikai taʻefakatokangaʻi ia. (1 Pita 2:12) Ko e fakatātaá, ko hotau fōtunga hā mai fakafoʻituitui maʻa mo māú ʻokú ne fakatupunga nai ai ʻa e ngaahi fakamatala lelei mei he niʻihi kehé, ʻo ʻomai ai kiate kitautolu ha faingamālie ke talanoa ʻo fekauʻaki mo e ngaahi ʻaonga ʻo e nofo ki he ngaahi tefitoʻi moʻoni ʻoku maʻu ʻi he Folofola ʻa e ʻOtuá. (1 Tim. 2:9, 10) He fiefia ē ko kitautolu ʻi he taimi ʻoku hoko ai ʻa e niʻihi kehé ‘ʻo mamata ki heʻetau ngāhi ngaue leleí, pea fakamāloʻia [pe fakalāngilangiʻi] ʻa ʻetau Tamai ʻoku ʻi Hevaní’!—Mt. 5:16.
5 ʻAki ʻetau leá mo e ngāué, tuku ke tau hakeakiʻi ʻa hotau ʻOtua funganí ʻi he ʻaho taki taha, ʻo tau kau atu ai ʻi he kalanga fiefia: “Hiva kia Sihova, fakamaloʻia hono huafa; ʻo ongoongo ʻene fakamoʻui ʻi he ʻaho kotoa.”—Sāme 96:2.