Fakahaaʻi ʻa e Mahuʻingaʻia Fakafoʻituitui—ʻAki Hono ʻEke ha Fehuʻi pea Fanongo
1 ʻOku fiefia ʻa e kakai tokolahi ʻi hono fakahaaʻi ʻenau fakakaukaú ka ʻoku ʻikai te nau saiʻia ʻi hono malangaʻi pe ko hono fakafehuʻi kinautolú. Ko ia ai, ʻi he tuʻunga ko e kau faifekau Kalisitiané, ʻoku fiemaʻu ke tau ako ki he pōtoʻi ʻi hono fakatalanoaʻi ʻa e kakaí ʻaki ʻa e ngaahi fehuʻí.—Pal. 20:5.
2 Ko ʻetau ngaahi fehuʻí ʻoku totonu ke fakaʻaiʻai, ʻo ʻikai ke fakateteki. ʻI he malanga mei he fale ki he falé, ʻoku ʻeke ʻe ha tokoua ʻe taha, “ʻOkú ke ongoʻi ʻe faifai angé pea ʻi ai ha taimi ʻe fefakahāhāʻaki ai ʻe he kakaí ha fetokaʻiʻaki mo e fefakaʻapaʻapaʻaki?” Makatuʻunga ʻi he talí, ʻokú ne hoko atu ʻaki, “ʻOkú ke fakakaukau ko e hā ʻoku fiemaʻú kae fakahoko ai ení?” pe “Ko e hā ʻokú ke ongoʻi pehē aí?” ʻI he faifakamoʻoni ʻo ʻikai ʻi he founga anga-mahení pea ʻi he ngaahi feituʻu kakaí, ʻoku ʻeke ʻe ha tokoua ʻe taha ki he faʻahinga ʻoku ʻi ai ʻenau fānaú, “Ko e hā ʻokú ke fiefia taha ai ʻi he hoko ko ha mātuʻá?” Pea ʻokú ne ʻeke leva, “Ko e hā ʻa e ngaahi meʻa ʻokú ke hohaʻa lahi taha ki aí?” Fakatokangaʻi ko e ngaahi fehuʻi ko ení ʻoku fakaʻatā ai ʻa e kakaí ke nau fakahaaʻi ʻenau fakakaukaú ʻo ʻikai ke maʻungatāmaki ai kinautolu. Koeʻuhi ʻoku kehekehe ʻa e ngaahi tuʻungá, te tau fiemaʻu nai ke feʻunuʻaki ʻa e tuʻunga-leá pea mo e founga ʻo ʻetau fehuʻí ke feʻungamālie mo e faʻahinga ʻi hotau vāhenga-ngāué.
3 Fakatalanoaʻi ʻa e Kakaí: Kapau ʻoku loto-lelei ʻa e kakaí ke tala atu ʻenau fakakaukaú, fanongo anga-kātaki ʻo ʻoua ʻe fakahohaʻasi noaʻia. (Sem. 1:19) Fakamālō anga-ʻofa ki heʻenau ngaahi talí. (Kol. 4:6) Te ke leaʻaki pē nai: “Ko e meʻa mālie ia. ʻOku ou fakamālō atu ʻi hoʻo vahevahe mai ia kiate aú.” Fakaongoongoleleiʻi kinautolu kapau te ke lava ʻo fai loto-moʻoni ia. ʻEke anga-ʻofa ange ha toe ngaahi fehuʻi ke ʻiloʻi ai ʻa e meʻa ʻoku nau fakakaukau ki aí pea mo e ʻuhinga ʻoku nau ongoʻi pehē aí. Kumi ki ha felotoi. ʻI hoʻo fiemaʻu ke fakahanga ʻenau tokangá ki ha konga Tohi Tapú, te ke leaʻaki nai, “Kuo faifai ange peá ke fakakaukau ʻe malava ʻa e meʻá ni?” Fakaʻehiʻehi mei he hoko ʻo fakamatematē pe anga-fakafekikí.—2 Tim. 2:24, 25.
4 Ko e anga ʻo e tali ʻa e niʻihi kehé ki heʻetau ngaahi fehuʻí ʻe makatuʻunga lahi nai pē ia ʻi he anga ʻo ʻetau fanongó. ʻE lava ke tala ʻe he kakaí pe ʻoku tau fanongo loto-moʻoni. Naʻe fakamatala ha ʻovasia fefonongaʻaki, “ʻI hoʻo fakahaaʻi ʻa e loto-lelei anga-kātaki ke fanongo ki he kakaí, ʻoku ʻi ai ʻene mālohi fakaofo ke tohoakiʻi kinautolu, pea ko ha fakahāhā fakaofo ia ʻo e mahuʻingaʻia fakafoʻituitui māfana.” Ko hoʻo fanongo ki he niʻihi kehé ʻokú ke ʻoange ai kia kinautolu ha lāngilangi, pea ʻe ueʻi nai ai kinautolu ke nau fanongo ki he ongoongo lelei ʻoku tau feinga ke vahevahe atú.—Loma 12:10.