Akoʻi ʻa e Kau Anga-Vaivaí ke ʻAʻeva ʻi he Hala ʻo e ʻOtuá
1. Ko e hā ʻoku kau ki hono fai ʻa e ngaohi ākongá?
1 Ko e kau ākonga ʻa Kalaisi ʻi he ʻuluaki senitulí naʻe fakamatalaʻi kinautolu ʻoku nau kau ki he “hala.” (Ng. 9:2) Ko e lotu faka-Kalisitiane moʻoní ʻoku kau ki ai ʻa e founga moʻui kotoa ʻa ha tokotaha. (Pal. 3:5, 6) Ko ia ai, ʻi hono fai ʻa e ngaahi ako Tohi Tapú, ʻoku fiemaʻu ke tau fai ʻa e meʻa lahi ange ia ʻi he ʻoatu pē ʻa e ʻilo totonu ʻo e tokāteline Fakatohitapú. Kuo pau ke tau toe tokoniʻi ʻa e kau ako Tohi Tapú ke nau ʻaʻeva ʻi he hala ʻo Sihová.—Sāme 25:8, 9.
2. Ko e hā ʻe lava ke ne ueʻi ha tokotaha ako Tohi Tapu ke ne talangofua ai ki he ngaahi fekau ʻa e ʻOtuá?
2 ʻOfa kia Sihova pea mo Sīsū: Ko ha pole moʻoni ia ki he kakai taʻehaohaoá ke ʻai ʻenau fakakaukaú, tōʻongá, leá mo e ʻulungāangá ke fehoanaki mo e finangalo ʻo e ʻOtuá! (Loma 7:21-23; Ef. 4:22-24) Kae kehe, ko e ʻofa ki he ʻOtuá pea mo hono ʻAló ʻoku ueʻi ai ʻa e kau anga-vaivaí ke nau fakahoko ʻa e pole ko ení. (Sione 14:15; 1 Sione 5:3) ʻE lava fēfē ke tau tokoniʻi ʻetau kau ako Tohi Tapú ke nau fakatupulekina ʻa e ʻofa ko ení?
3. ʻE lava fēfē ke tau tokoniʻi ʻa e kau akó ke nau fakatupulekina ʻa e ʻofa kia Sihova mo Sīsuú?
3 Tokoniʻi hoʻo tokotaha akó ke ne hoko ʻo ʻiloʻi pe ko e faʻahinga tokotaha fēfē ʻa Sihova. Naʻe fakamatala ha tokoua ʻe taha, “ʻOku ʻikai lava ke ʻofa ʻa e kakaí ki ha tokotaha ʻoku ʻikai te nau ʻiloʻi, ko ia ʻi he kamataʻanga pē ʻo e akó, ʻoku ou akoʻi kia kinautolu ʻa e huafa ʻo e ʻOtuá mei he Tohi Tapú, pea ʻoku ou fakasio ki ha ngaahi faingamālie ke fakamamafaʻi ai ʻa e ngaahi ʻulungāanga ʻo Sihová.” Ko hono fakamamafaʻi ʻa e faʻifaʻitakiʻanga ʻa Sīsuú ko ha founga lelei ʻaupito ia ke fai ai ení. (Sione 1:14; 14:9) Tānaki atu ki aí, ngāueʻaongaʻaki ʻa e puha fakamanatu ʻi he ngataʻanga ʻo e vahe taki taha ʻo e tohi Akoʻi ʻe he Tohi Tapú ke tokoniʻi ai ʻa e tokotaha akó ke ne fakalaulauloto ki he ngaahi ʻulungāanga fakaofo ʻo e ʻOtuá mo hono ʻAló.
4. (a) Ko e hā ʻoku ʻiloʻi ai ʻe he kau ako tokolahi ko ha pole ʻa e malangá? (e) ʻE lava fēfē ke tau tokoniʻi ʻetau kau akó ke nau fou ʻi heʻenau ngaahi ʻuluaki sitepu ʻi he ngāue fakafaifekau faka-Kalisitiané?
4 Akoʻi ʻAki ʻa e Faʻifaʻitakiʻangá: ʻI he tuʻunga ko e kau faiako mo e kau fai fakahinohinó, ʻoku tau fakahaaʻi ai ki he niʻihi kehé ʻaki ʻetau ngaahi ngāué ʻa e meʻa ʻoku ʻuhinga ki ai ʻa e ʻaʻeva ʻi he founga ʻa e ʻOtuá. (1 Kol. 10:34 [11:1, PM]) Ko e fakatātaá, ko e tokolahi taha ʻo e kau ako Tohi Tapú ʻoku ʻikai te nau angaʻaki ʻa e fakalea ko ia ki he kau solá ke vahevahe atu ʻenau ngaahi tuí. Ko ia ai, ʻe fiemaʻu nai ʻa e anga-kātaki mo e pōtoʻi ke tokoniʻi kinautolu ke fakatupulekina ʻa e ʻofa, tui mo e loto-toʻa ʻoku fiemaʻú ke kau ai ʻi he ngāue malangá mo e ngaohi ākongá. (2 Kol. 4:13; 1 Tes. 2:2) Ko ʻetau holi ko ia ke fakahinohinoʻi ʻetau kau akó ʻe ueʻi ai kitautolu ke tau poupouʻi kinautolu ʻi heʻenau fou heʻenau ngaahi ʻuluaki sitepu ʻi he ngāue fakafaifekau faka-Kalisitiané.
5. ʻOku anga-fēfē hono tokoniʻi ʻe ha faʻifaʻitakiʻanga lelei ʻa e kau akó ke nau talangofua ki he meʻa ʻoku kau ki he muimui ʻi he ngaahi fekau ʻa e ʻOtuá?
5 Ko hoʻo faʻifaʻitakiʻangá ʻe lava ke fakahinohinoʻi ai ʻa e kau akó ʻi he ngaahi tafaʻaki mahuʻinga kehe ʻo e moʻui faka-Kalisitiané. ʻI hoʻo ʻaʻahi ki he puké pe fakafeʻiloaki loto-māfana ki he niʻihi kehé ʻi he ngaahi fakataha ʻa e fakatahaʻangá, ʻoku nau sio ai ki hono fakahāhaaʻi ʻo e ʻofá. (Sione 15:12) ʻI hoʻo kau ʻi hono fakamaʻa ʻa e Fale Fakatahaʻangá pe fai ha ngaahi meʻa ʻaonga maʻá e niʻihi kehé, ʻokú ke akoʻi ai kinautolu ki he founga ke ngāue ai maʻá e niʻihi kehé. (Sione 13:12-15) ʻI heʻenau mātā ʻa hoʻo tauhi maʻu ha founga moʻui faingofuá, ʻoku nau mahinoʻi ai ʻa e meʻa ʻoku ʻuhinga ki ai ʻa e “fuofua kumi ae buleaga.”—Mt. 6:33, PM.
6. Ko e hā ʻa e ngaahi ola ʻi hono tokoniʻi ʻa e kau anga-vaivaí ke nau tauhi kia Sihová?
6 Ko e ngāue ʻo hono akoʻi ʻa e niʻihi kehé mei he Folofola ʻa e ʻOtuá pea mo e ngaohi ākongá ʻoku kau ki ai ʻa e feinga lahi. Ka he meʻa fakafiefia moʻoni ia ke sio ki he kau anga-vaivaí ʻoku nau ‘aeva i he mooní’!—3 Sione 4, PM.