Ko ha Faʻifaʻitakiʻanga ki he Iiki mo e Lalahi
Ko Noá naʻá ne maʻu ha vahaʻangatae māfana mo fekoekoeʻi mo e ʻOtuá. Naʻá ne līʻoa ʻene moʻuí ki hono fai ʻa e finangalo ʻo Sihová. Naʻá ne ‘aeva moe Otua moʻoní’ pea naʻe tāpuekina ia ʻi heʻene fai peheé. Ko ha faʻifaʻitakiʻanga ia ʻoku taau ke faʻifaʻitaki fakatouʻosi ki ai ʻa e iiki mo e lalahi. (Sen. 6:9, PM) ʻE tokoniʻi koe ʻe he vitiō Noah—He Walked With God ke ke sioloto atu ai ki he faʻahinga moʻui naʻe maʻu ʻe Noá, ʻuhinga naʻá ne tuha ai mo e tāpuaki ʻa Sihová, pea mo e founga ʻe lava ai ke ke faʻifaʻitaki ki hono ngaahi ʻulungāanga leleí.
Ko e DVD ʻo e vitiō Noah ʻoku kau ai ʻa e ngaahi fehuʻi ko ení. Sio ʻi he vitioó, pea ʻeke hifo kiate koe: (1) Ko e hā ʻa e hala naʻe fai ʻe he kau ʻāngelo ʻe niʻihi, pea ko hai ʻa e kau Nefilimí? (Sen. 6:1, 2, 4) (2) Ko e hā naʻe fuʻu fulikivanu ai ʻa e kakaí, pea naʻe fēfē ʻa e ongoʻi ʻa e ʻOtuá ʻo kau ki aí? (Sen. 6:4-6) (3) Naʻe anga-fēfē ʻa e kehe ʻa Noa ia mei he kakai kehé? (Sen. 6:22) (4) Naʻe anga-fēfē hono fakaʻauha ʻa e fulikivanú? (Sen. 6:17) (5) Naʻe lahi fēfē ʻa e ʻaʻaké? (Sen. 6:15) (6) Ko e hā ʻa e meʻa kehe naʻe toe fai ʻe Noá, pea naʻe anga-fēfē ʻa e tali ki ai ʻa e kakaí? (Mt. 24:38, 39; 2 Pita 2:5) (7) Ko e toko fiha mei he fanga manu taki taha naʻe ʻi he ʻaʻaké? (Sen. 7:2, 3, 8, 9) (8) Ko e hā hono fuoloa ʻa e ʻuhá, pea ko e hā ʻa e fuoloa hono kāpui ʻe he vaí ʻa e māmaní? (Sen. 7:11, 12; 8:3, 4) (9) Ko e hā naʻe hao moʻui ai ʻa Noa mo hono fāmilí? (Sen. 6:18, 22; 7:5) (10) Naʻe toka ʻi fē ʻa e ʻaʻaké? (Sen. 8:4) (11) Naʻe ʻiloʻi fēfē ʻe Noa naʻe feʻunga ke nau hū ki tuʻa mei he ʻaʻaké? (Sen. 8:6-12) (12) Ko e hā naʻe fai ʻe Noa ʻi heʻene hū ki tuʻa mei he ʻaʻaké? (Sen. 8:20-22) (13) Ko e hā naʻe fakafofongaʻi ʻe he ʻūmatá? (Sen. 9:8-16) (14) ʻOku ʻuhinga ki he hā ʻa e ‘aeva moe Otuá’? (Sen. 6:9, 22, PM; 7:5) (15) Ko e hā ʻa e meʻa kuo pau ke tau fai ka tau sio ai kia Noa ʻi he Palataisí? (Mt. 28:19, 20; 1 Pita 2:21)
Ko e hā ʻoku akoʻi kiate koe ʻe he talanoa Fakatohitapu ki he tangata faitōnunga mo talangofua ko Noá, ʻo kau ki he founga te ke lava ai mo koe foki ʻo ‘aeva moe Otuá’ pea falala ki he malava ʻa Sihova ke ne fakahaofi ʻa ʻene kakai ʻi onopōní?—Sen. 7:1; Pal. 10:16; Hep. 11:7; 2 Pita 2:9.