Langaʻi ʻa e Houngaʻia ki he Ngaahi ʻUlungāanga Taʻehanotatau ʻo Sihová
1 ʻI heʻetau ngāue fakafaifekaú, ʻoku tau fai ʻa e meʻa lahi ange ia ʻi hono akoʻi pē ki he niʻihi kehé ʻa e ngaahi moʻoni Fakatohitapu tefitó. ʻOku tau tokoniʻi ʻa e kakaí ke nau ʻilo ʻa Sihova ʻi hono tuʻunga ko ha tokotahá pea langaʻi ʻa e houngaʻia ki hono ngaahi ʻulungāanga taʻehanotataú. ʻI he taimi ʻoku ako ai ʻe he faʻahinga loto-totonú ʻa e moʻoni fekauʻaki mo e ʻOtuá, ʻoku ʻi ai ha ʻaonga lahi kia kinautolu, ʻi hono ueʻi ke nau fai ha ngaahi liliu ʻi heʻenau moʻuí ‘koeʻuhí ke tāu ʻenau laká pea mo Sihova, ʻo huʻu ki he meʻa kotoa pe te ne hōifua aí.’—Kol. 1:9, 10; 3:9, 10.
2 Ko ʻEtau Tohi Ako Foʻoú: Mei he kamatá pē, ʻoku tohoakiʻi ai ʻe he tohi Akoʻi ʻe he Tohi Tapú ʻa e tokangá ki he ngaahi ʻulungāanga ʻo Sihová. Ko e vahe ʻuluakí tonu ʻoku tali ai ʻa e ngaahi fehuʻi: ʻOku tokanga moʻoni mai ʻa e ʻOtuá fekauʻaki mo koe?, ʻOku fēfē ʻa e ʻOtuá?, pea ʻE malava ke hoko ʻo ofi ki he ʻOtuá? ʻOku toe fakamatalaʻi ʻi he vahe ko iá ʻa e māʻoniʻoni ʻa Sihová (pal. 10), ko ʻene fakamaau totonú mo ʻene manavaʻofá (pal. 11), ko ʻene ʻofá (pal. 13), ko hono mālohí (pal. 16), pea mo ʻene ʻaloʻofá, anga leleí, loto-lelei ke fakamolemolé, kātakí mo ʻene mateakí (pal. 19). ʻOku fakamatalaʻi fakanounou ʻa e meʻá ni ʻi he palakalafi 20 ʻo pehē: “Ko e lahi ange hoʻo ako fekauʻaki mo Sihová, ko ʻene hoko ia ʻo toe moʻoni ange kiate koé pea ko e ʻuhinga lahi ange ia te ke maʻu ke ʻofa ai kiate ia pea ongoʻi ofi kiate iá.”
3 ʻE lava fēfē ke tau ngāueʻaki ʻa e tohi Akoʻi ʻe he Tohi Tapú ke tokoniʻi ʻa e kau ako Tohi Tapú ke ʻunuʻunu ofi kia Sihová? Hili ʻa e lāulea ki ha palakalafi ʻoku fakamatalaʻi ai ʻa e taha ʻo e ngaahi ʻulungāanga ʻo e ʻOtuá, te tau ʻeke nai ki he tokotaha akó, “Ko e hā ʻoku tala atu heni kiate koe fekauʻaki mo Sihova ʻi hono tuʻunga ko ha tokotahá?” pe “ʻOku anga-fēfē hono fakahaaʻi heni ʻa e mahuʻingaʻia fakafoʻituitui ʻa e ʻOtuá ʻiate koé?” ʻI hono toutou ngāueʻaki ʻa e ngaahi fehuʻi peheé he lolotonga ʻa e akó, ʻoku tau akoʻi ai ʻetau kau akó ke nau fakalaulauloto ki he meʻa ʻoku nau akó pea tokoniʻi kinautolu ke tupulekina ʻenau houngaʻia ki he ngaahi ʻulungāanga taʻehanotatau ʻo Sihová.
4 Ko Hono Ngāueʻaki ʻa e Puha Fakamanatú: ʻI he ngataʻanga ʻo e vahe taki taha, fakaafeʻi ʻa e tokotaha akó ke ne fakamatalaʻi ʻi heʻene ngaahi lea pē ʻaʻaná ʻa e poini taki taha ʻi he puha “Meʻa ʻOku Akoʻi ʻe he Tohi Tapú.” Fakahanga ʻa e tokangá ki he ngaahi konga Tohi Tapu ʻoku haá. Ke ʻiloʻi ʻa e meʻa ʻoku ʻi he loto ʻo e tokotaha akó, te ke ʻeke nai ʻi ha taimi, “Ko e hā hoʻo ongoʻi fekauʻaki mo e meʻa ʻoku akoʻi ʻe he Tohi Tapú ʻo kau ki he poini ko ʻení?” ʻI he fai peheé, ʻoku ʻikai ngata pē ʻi hoʻo fakamamafaʻi ai ʻa e ngaahi poini tefito ʻo e vahé ka ʻokú ke toe ʻiloʻi lelei ange ai ʻa e meʻa ʻoku tui moʻoni ki ai ʻa e tokotaha akó. ʻE tokoniʻi ai heni ʻa e tokotaha akó ke ne kamata fakatupulekina ha vahaʻangatae mo Sihova.