Tokoniʻi ʻa e Niʻihi Kehé Ke Nau Hoko ko e Ngaahi Kaumeʻa ʻo e ʻOtuá
1 ʻI he ʻahó ni, ko e kakai mei he ngaahi puleʻanga kotoa pē kuo nau ako ki he ngaahi founga ʻa Sihová. (Ai. 2:2, 3) Kae kehe, ki he faʻahinga peheé ke “nau fua heʻenau kitaki,” kuo pau ke nau ʻofa kia Sihova. (Luke 8:15; Mk. 12:30) ʻI he ʻikai ha ʻofa peheé, ʻe ʻikai te nau maʻu ha mālohi ke talitekeʻi ʻa e ngaahi tākiekina ʻoku ʻikai leleí pe ko e loto-toʻa ke fai ʻa e meʻa ʻoku totonú. Ko e founga ʻe taha ke tokoniʻi ai ʻa e niʻihi kehé ke nau fakatupulekina ha vahaʻangatae lelei mo Sihová ko hono fakahaaʻi ʻenau houngaʻia ʻi hono ngaahi ʻulungāangá. Fakalototoʻaʻi kinautolu ke nau fakakaukau fakamātoato ki he fakamatala ʻi he tohi ʻUnuʻunu Ofi kia Sihova.
2 Ko Hoʻo Faʻifaʻitakiʻangá: ʻE lava ke maongo moʻoni ʻa hoʻo ngaahi tōʻonga fakafoʻituituí ki he loto ʻo e kau ako Tohi Tapú. ʻI heʻenau sio ʻokú ke koloaʻaki ʻa hoʻo kaumeʻa mo Sihová pea sio ki he anga ʻa ʻene tākiekina ʻa hoʻo moʻuí, ʻe ueʻi nai ai kinautolu ke nau fakatupulekina ha vahaʻangatae fakafoʻituitui pehē ʻia kinautolu. (Luke 6:40) Ko e moʻoni, ʻoku faʻa tākiekina lahi ange ʻe heʻetau faʻifaʻitakiʻangá ʻa e niʻihi kehé ʻi he meʻa ʻoku tau leaʻakí.
3 Ko e founga tefito ke akoʻiʻaki ʻe he ngaahi mātuʻá ʻa ʻenau fānaú ke ʻofa kia Sihová ko ʻenau faʻifaʻitakiʻangá. (Teu. 6:4-9) Naʻe kumi faleʻi mei ha ngaahi mātuʻa lavameʻa ha ongo mātuʻa naʻá na loto ke ʻohake ʻena fānaú ʻi he moʻoní. “Ko e ngaahi mātuʻa kotoa pē naʻá ku lea ki aí naʻa nau pehē ko e founga tefitó pē ko e faʻifaʻitakiʻanga ʻa e ngaahi mātuʻá,” ko e lau ia ʻa e husepānití. Ko ia, ʻi heʻenau founga moʻuí kotoa, ʻe lava ke ʻoange ai ʻe he ngaahi mātuʻá ki heʻenau fānaú ha faʻifaʻitakiʻanga moʻoni ʻo e meʻa ʻoku ʻuhinga ki ai ʻa e pehē ke hoko ko e “Takanga [pe kaumeʻa] ʻo e ʻOtua.”—Sem. 2:23.
4 Lotu Fakamātoato: ʻE lava ke ke toe tokoniʻi ʻa e niʻihi kehé ke nau fakatupulekina ʻa e kaumeʻa mo Sihová ʻaki hono akoʻi kinautolu ke nau lotu mei honau lotó. Te ke fakahinohino ange nai kia kinautolu ʻa e lotu ʻa e ʻEikí, pea pehē ki he ngaahi lotu tōtōivi lahi ʻoku hiki ʻi he Tohi Tapú. (Mt. 6:9, 10) ʻE lava ke ke akoʻi ki hoʻo fānaú mo e kau ako Tohi Tapú ʻa e founga ke nau lotu aí ʻaki hoʻo ngaahi lotú tonu. ʻI he taimi ʻoku nau fanongo ai ki hoʻo ngaahi lotu fakamātoató, te nau mahinoʻi ai ʻa e anga ʻo hoʻo ngaahi ongoʻi fekauʻaki mo Sihová. Fakalototoʻaʻi kinautolu ke nau “fakakukafi i he lotu” he taimi ʻoku nau fetaulaki ai mo ha ngaahi ʻahiʻahi. (Loma 12:12, PM) ʻI heʻenau hokosia ʻa e tokoni ʻa Sihova ʻi he ngaahi taimi ʻo e faingataʻá, te nau falala leva ai kiate ia pea ʻofa kiate ia ʻi he tuʻunga ko ha kaumeʻa moʻoni.—Sāme 34:8; Fili. 4:6, 7.