“Monuʻiaā ka ko e Tangata ʻOku Ne Kataki ha ʻAhiʻahi”

¹ Kuo pau ke fehangahangai ʻa e kau Kalisitiane kotoa pē mo e ngaahi ʻahiʻahi. (2 Tim. 3:12) ʻOku hoko mai nai ʻa e ngaahi ʻahiʻahí ʻi he tuʻunga ʻo e mahamahaki, faingataʻaʻia fakaʻekonōmika, fakatauele, fakatanga, pe ʻi ha ngaahi founga lahi kehe. Ko e ngaahi ʻahiʻahi ʻoku ʻomai ʻe Sētané ʻoku fakataumuʻa ia ke ne fakamāmālieʻi kitautolu, ke ʻai ke tau fakaliʻeliʻaki ʻetau ngāue fakafaifekau faka-Kalisitiané, pe aʻu ke ne taʻofi ai kitautolu mei he tauhi ki he ʻOtuá. (Siope 1:​9-11) ʻOku anga-fēfē ʻa e iku atu ki he fiefiá ʻa hono kātakiʻi ʻo e ngaahi ʻahiʻahí?—2 Pita 2:9.

² Mateuteu ki he Ngaahi ʻAhiʻahí: Kuo tokonaki mai ʻe Sihova ʻa ʻene Folofola ʻo e moʻoní, kau ai ʻa e lēkooti ʻo e moʻui mo e ngaahi akonaki ʻa Sīsuú. ʻI he fanongo ki he ngaahi lea ʻa Sīsuú pea fai ki aí, ʻoku tau fakatoka ai ha makatuʻunga fefeka pea mateuteu atu ai ki he ngaahi ʻahiʻahí. (Luke 6:​47-49) ʻOku tau toe maʻu foki mo e fakaivimālohi mei he ngaahi matavai kehe—ko hotau fanga tokoua Kalisitiané, ngaahi fakataha ʻa e fakatahaʻangá mo e ngaahi tohi Fakatohitapu mei he kalasi tamaioʻeiki anga-tonu mo potó. ʻOku tau toutou ngāueʻaki ʻa e meʻaʻofa ʻa e ʻOtuá ko e lotú.—Mt. 6:13.

³ Kuo toe ʻomai ʻe Sihova maʻatautolu ha ʻamanaki. ʻI he taimi ʻoku tau fakatupulekina ai ha tui mālohi ki he ngaahi talaʻofa ʻa Sihová, ʻoku hoko ai ʻetau ʻamanakí ko e “taula [ki] hotau laumalie, ko e taula malohi mo maʻumaʻuluta.” (Hep. 6:19) ʻI he ngaahi taimi ʻo e Tohi Tapú, naʻe ʻikai ke mavahe ʻa e ngaahi vaká mei he taulangá ʻo taʻehataula neongo ʻene matangi leleí. Kapau ʻe tō fakafokifā ha taufa, ko hono lī ʻo e taulá ʻe maluʻi ai ʻa e vaká mei haʻane haʻahaʻaki ki ha matāfanga makaʻia. ʻI he tuʻunga meimei tatau, ko hono fakatupulekina he taimí ni ha tui ki he ngaahi talaʻofa ʻa e ʻOtuá, ʻe fakatuʻumaʻuʻi ai kitautolu ʻi he taimi ʻe tō mai ai ʻa e ngaahi taufa ʻo e faingataʻá. ʻOku lava ke mātuʻaki hoko fakafokifā ʻa e ngaahi faingataʻá. Neongo naʻe tomuʻa talitali lelei ʻi Līsita ʻa e ngāue fakamalanga ʻa Paula mo Panepasá, naʻe vave ʻa e liliu ʻa e tuʻungá ʻi he aʻu mai ʻa e kau fakafepaki Siú.—Ng. 14:​8-19.

⁴ ʻOku Iku ʻa e Kātakí ki he Fiefia: Ko e hokohoko atu ʻi he ngāue fakamalangá neongo ʻa e fakafepakí ʻoku ʻomai ai kia kitautolu ʻa e nonga. ʻOku tau fiefia ʻi hono lau kitautolu ʻoku tau taau ke ngaohikoviʻi koeʻuhi ko Kalaisi. (Ng. 5:​40, 41) Ko hono kātekina ʻo e ngaahi ʻahiʻahí ʻoku tokoniʻi ai kitautolu ke fakatupulekina lahi ange ʻa e ngaahi ʻulungāanga ko e anga-fakatōkilalo, talangofua mo e kātaki. (Teu. 8:16; Hep. 5:8; Sem. 1:​2, 3) ʻOku akoʻi ai kitautolu ke falala kia Sihova, ke falala ki heʻene ngaahi talaʻofá pea hūfanga kiate ia.—Pal. 18:10.

⁵ ʻOku tau ʻiloʻi ʻoku fakataimi pē ʻa e ngaahi ʻahiʻahí. (2 Kol. 4:​17, 18) ʻOku ʻomai kia kitautolu ʻe he ngaahi ʻahiʻahí ʻa e faingamālie ke fakahāhā ai ʻa e lahi ʻo ʻetau ʻofa kia Sihová. ʻI hono kātekina iá, ʻe lava ke tau ʻoatu ai ʻa e tali ki he ngaahi tukuakiʻi ʻa Sētané. Ko ia ai, ʻoku ʻikai ke tau foʻi! “Monuʻiaā [pe fiefiaā] ka ko e tangata ʻoku ne kataki ha ʻahiʻahi: he ʻo ka ʻosi hono sivi, te ne maʻu ai ʻa e kalauni ʻo e moʻui.”—Sem. 1:12.