ʻUhinga ʻOku Tau Toutou Foki Aí
1. Ko e hā ʻa e fehuʻi ʻoku malanga hake fekauʻaki mo ʻetau ngāue fakamalangá?
1 ʻI he ngaahi feituʻu lahi, ʻoku tau toutou ngāueʻi ai ʻa hotau feituʻu ngāué. ʻOku tau toutou foki ki he ngaahi ʻapi tatau, neongo hono tala mai ʻe he tokotaha-ʻapí kia kitautolu ʻoku ʻikai te ne mahuʻingaʻiá. Ko e hā ʻoku tau toutou ʻaʻahi ai ki he faʻahinga naʻe ʻikai te nau tali lelei kitautolu ʻi he kuohilí?
2. Ko e hā ʻa e ʻuhinga tefito ʻoku tau kītaki ai ʻi he ngāue fakafaifekaú?
2 ʻOfa kia Sihova mo e Kakaí: Ko e ʻuhinga tefito ʻoku tau kītaki ai ʻi he ngāue fakafaifekaú ko ʻetau ʻofa kia Sihová. ʻOku ueʻi kitautolu ʻe hotau lotó ke hokohoko atu ʻetau talanoa ki he niʻihi kehé fekauʻaki mo hotau ʻOtua leleí. (Luke 6:45) Ko ʻetau ʻofa kia Sihová ʻoku ueʻi ai kitautolu ke tau talangofua ki heʻene ngaahi fekaú pea tokoniʻi ʻa e niʻihi kehé ke nau fai ʻa e meʻa tatau. (Pal. 27:11; 1 Sione 5:3) Ko ʻetau kātaki faitōnunga ʻi he ngāue ko ʻení ʻoku ʻikai ke fakatuʻunga ia ʻi he anga ʻo e tali ʻa e kakaí. Naʻa mo e taimi naʻe fakatangaʻi ai ʻa e kau Kalisitiane ʻi he ʻuluaki senitulí, naʻe hokohoko atu ʻenau malangá ʻo “ʻikai tuku.” (Ng. 5:42) ʻI he ʻikai ke fiefanongo ʻa e kakaí, ʻoua ʻe fakaʻatā eni ke tau loto-siʻi ai, ka tau tuʻu maʻu ʻo fakahāhā ʻa e lahi ʻo ʻetau ʻofa mo e līʻoa kia Sihová.
3. ʻE anga-fēfē hono tokoniʻi kitautolu ʻe he ʻofa ki he kakaí ke hokohoko atu ʻetau malangá?
3 ʻOku tau toe kītakí koeʻuhi ko ʻetau ʻofa ki hotau kaungāʻapí. (Luke 10:27) ʻOku ʻikai ke finangalo ʻa Sihova ke ʻauha ha taha. (2 Pita 3:9) Naʻa mo e feituʻu ʻoku toutou ngāueʻí, ʻoku tau kei maʻu pē ai ʻa e faʻahinga ʻoku nau loto ke tauhi kia Sihova. Ko e fakatātaá, ʻi Kuatelupe ʻa ia ko e toko 1 ʻi he toko 56 kotoa pē ko e taha ʻo e Kau Fakamoʻoni ʻa Sihová, naʻe papitaiso ai ʻa e toko 214 ʻi he taʻu kuo ʻosí. Ko e meimei toko 20,000 naʻa nau maʻu ʻa e Fakamanatú, ʻa ia ko e toko 1 nai ʻi he toko 22 kotoa pē ʻo e kakai ʻi Kuatelupé!
4. ʻI he ngaahi founga fē ʻoku liliu ai ʻa e ngaahi feituʻú?
4 Ngaahi Liliu ʻi he Feituʻú: ʻOku ʻi ai maʻu pē ʻa e kakai kehekehe ʻi hotau feituʻu ngāué. Ko e taimi hono hoko te tau ʻaʻahi atu ai ki ha ʻapi naʻe ʻikai tali lelei, ko ha mēmipa kehe ʻi he fāmilí—mahalo ko ha taha kuo teʻeki ai ke ne fanongo ʻi heʻetau pōpoakí—te ne fakaava mai nai ʻa e matapaá pea fanongo. Pe ko ha kau nofo foʻou ia ʻoku nau mahuʻingaʻia. ʻOku tupu hake ʻa e fānau ʻa e ngaahi mātuʻa fakafepakí pea nau mavahe mei ʻapi. Ko e faʻahinga peheé te nau loto-lelei nai ke fanongo ki he pōpoaki ʻo e Puleʻangá.
5. Ko e hā ʻe malava ke ne ueʻi ʻa e kakaí ke nau fiefanongó?
5 ʻOku toe liliu foki mo e kakaí. Ko e ʻapositolo ko Paulá ko e tokotaha ia naʻe “laukovi ki he ʻOtua . . . mo fakatanga mo pauʻu” ki muʻa. (1 Tim. 1:13) ʻI he tuʻunga tatau, ko e tokolahi ʻoku nau tauhi kia Sihova he ʻaho ní naʻe ʻikai te nau mahuʻingaʻia ki muʻa ʻi he moʻoní. Naʻe fakafepakiʻi nai ʻe ha niʻihi ʻa e ongoongo leleí ʻi ha taimi. ʻI he liliu ʻa e ngaahi tuʻunga ʻo e māmaní, ʻe ueʻi nai ai ʻa e kau fakafepaki ʻe niʻihi pe ko e faʻahinga naʻe ʻikai te nau mahuʻingaʻiá ke nau fiefanongo. ʻE tali lelei ange ha niʻihi ʻi he hili haʻanau hokosia ha fakatamaki fakafoʻituitui, hangē ko ha mate ʻi he fāmilí, ko e mole ʻa e ngāué, ko ha palopalema fakapaʻanga, pe ko ha tuʻunga mahamahaki.
6. Ko e hā kuo pau ai ke hokohoko atu ʻetau malanga faivelengá?
6 ʻOku ofi ke ngata ʻa e fokotuʻutuʻu ʻo e ngaahi meʻa ko ení, ka ko ʻetau ngāue fakamalangá mo e fakafaiakó ʻoku fakautuutu. (Ai. 60:22) Ko ia ai, ʻoku tau hokohoko atu ʻi he malanga faivelengá pea feinga ke tauhi maʻu ha fakakaukau fakatuʻamelie. Ko e tokotaha hono hoko te tau lea ki aí te ne fiefanongo nai. ʻOku fiemaʻu ke hokohoko atu ʻetau leá! ‘ʻI heʻetau fai peheé, te tau fakamoʻui kitautolu mo kinautolu foki ʻoku fanongo kiate kitautolú.’—1 Tim. 4:16.