Founga ke Kamata Ai ha Ako Tohi Tapu ʻi he Faʻahinga ʻOku Tuku Ai ʻa e Makasiní
1. Ko e hā ʻetau taumuʻá ʻi hono tuku atu ha ngaahi makasiní?
1 ʻI he ngaahi ʻaho Tokonakí ʻoku tau māʻunga fakaʻaliʻali ai ʻa e ongo makasini ko e Taua Leʻo mo e ʻĀ Hake! ʻi he ngāue fakafaifekaú. Kae kehe, ko e ʻuluaki sitepu pē ʻeni ia ʻi hono aʻusia ʻetau taumuʻá ko hono akoʻi ʻa e moʻoní ki he faʻahinga loto-totonú. ʻI laló ko ha ngaahi fokotuʻu ia ʻe niʻihi ki he founga ke tuku ai ʻa e tohi Akoʻi ʻe he Tohi Tapú ʻi ha toe ʻaʻahi pea kamata ha ako Tohi Tapú. ʻE ala feliliuaki nai ʻa e ngaahi fokotuʻú ni ki ho feituʻu ngāué pea fakalea ia ʻi hoʻo lea pē ʻaʻau. ʻE lava ke ke ngāueʻaki ha toe founga ʻe taha kapau ʻoku ola lelei ia kiate koe.
2. ʻE lava fēfē ke tau ngāueʻaki ʻa e ngaahi peesi talateu ʻi he tohi Akoʻi ʻe he Tohi Tapú ke kamata ha ako Tohi Tapú?
2 Ngāueʻaki ʻa e Ngaahi Peesi Talateú: ʻI hoʻo toe fokí, ʻe lava ke ke pehē: “Ko e makasini naʻá ku tuku atu kiate koé ʻokú ne fakahanga ʻa e tokangá ki he Tohi Tapú. Fakatokangaʻi ange ʻa e ʻuhinga ʻoku mātuʻaki mahuʻinga ai ʻa e lau Tohi Tapú.” Lau ʻa e Aisea 48:17, 18; Sione 17:3; pe ko ha toe konga Tohi Tapu feʻungamālie ʻe taha. Pea ʻi he hili hoʻo fakahā atu ʻa e tohi Akoʻi ʻe he Tohi Tapú pea ʻoatu ha tatau ki he tokotaha-ʻapí, ʻe lava ke ke hoko atu ʻo hangē ko ʻení:
◼ “ʻOku ʻomai ʻe he Tohi Tapú kiate kitautolu ha ʻamanaki moʻoni ki he kahaʻú.” Fakaʻaliʻali ki he tokotaha-ʻapí ʻa e peesi 4-5 pea ʻeke, “Ko fē ʻi he ngaahi talaʻofá ni te ke saiʻia ke sio ʻoku fakahokó?” Tataki ia ki he vahe ʻoku lāulea ki he talaʻofa Fakatohitapu naʻá ne filí, pea lāulea nounou ki ha palakalafi ʻe taha pe ua kapau ʻokú ne fakaʻatā mai.
◼ Pe ʻe malava ke ke pehē, “ʻOku tali ʻe he Tohi Tapú ʻa e ngaahi fehuʻi mahuʻinga taha ʻo e moʻuí.” Fakahanga ʻene tokangá ki he peesi 6, pea ʻeke ange pe kuo faifai ange peá ne fifili fekauʻaki mo ha taha ʻo e ngaahi fehuʻi ʻi lalo ʻi he pēsí. Huke ki he vahe ʻokú ne ʻomai ʻa e talí, pea lāulea nounou ʻi ha palakalafi ʻe taha pe ua.
◼ Pe ʻe malava ke ke fakahaaʻi atu ha niʻihi ʻo e ngaahi kaveinga ʻi he tēpile ʻo e ngaahi meʻa ʻi lotó pea ʻeke pe ko fē ha taha ʻo e ngaahi tuʻunga-lea aí ʻokú ne mahuʻingaʻia aí. Huke ki he vahe ko iá, pea fakahāhaaʻi nounou ha ako Tohi Tapu.
3. ʻE lava fēfē nai ke tau kamata ha ako Tohi Tapu ʻi he hili hono tuku ha makasini ʻoku fekauʻaki mo e (a) fakaʻau ke kovi ange ʻa e ngaahi tuʻunga ʻo e māmaní? (e) fāmilí? (f) tuʻunga falalaʻanga ʻo e Tohi Tapú?
3 Tuku ha Fehuʻi ʻi he ʻUluaki ʻAʻahí: Ko ha toe meʻa ʻe taha ʻe lava ke te fai ko hono fakatoka ha makatuʻunga ki he toe ʻaʻahi ʻi he ʻuluaki ʻaʻahí pē. ʻI he hili hono tali ʻe he tokotaha-ʻapí ʻa e makasiní, langaʻi hake ha fehuʻi, pea palōmesi ki ai te ke tali ia ʻi hoʻo ʻaʻahi hono hokó. Feinga ke ʻai ha fokotuʻutuʻu pau ke toe foki, pea ke fakapapauʻi ke tauhi ʻa e alea ko iá. (Mt. 5:37) ʻI hoʻo toe foki ki aí, fakamanatu ki he tokotaha-ʻapí ʻa e fehuʻí, pea lau mo lāulea nounou ki he tali mei he tohi Akoʻi ʻe he Tohi Tapú. ʻOange kiate ia ha tatau koeʻuhi ke ne muimui ai. Ko ha ngaahi fakatātā ʻeni:
◼ Kapau ko e makasini naʻá ke tukú ʻoku fekauʻaki ia mo e fakaʻau ke kovi ange ʻa e ngaahi tuʻunga ʻo e māmaní, ʻe lava ke ke pehē, “ʻI he taimi hono hokó te ta lāulea ai ki he tali ʻa e Tohi Tapú ki he fehuʻi ko ʻení, Ko e hā ʻa e ngaahi liliu ʻe fakahoko mai ʻe he ʻOtuá ki he foʻi māmaní?” Ngāueʻaki ʻa e peesi 4-5 ʻi hoʻo toe fokí. Pe ʻe lava ke ke langaʻi hake ʻa e fehuʻi, “ʻOku finangalo ʻa e ʻOtuá ki he ngaahi meʻa fakamamahí?” ʻI he toe ʻaʻahí, fakahaaʻi ki he tokotaha-ʻapí ʻa e palakalafi 7-8 ʻi he vahe 1.
◼ Kapau ko e makasini naʻá ke tukú ʻoku fekauʻaki mo e fāmilí, ki muʻa ke ke mavahé ʻe lava ke ke langaʻi hake ʻa e fehuʻí ni, “Ko e hā ʻe lava ke fai ʻe he mēmipa taki taha ʻo e fāmilí ke ʻai ʻa e moʻui fakafāmilí ke fakafiefia angé?” Lāulea ki he palakalafi 4 ʻi he vahe 14 ʻi hoʻo toe fokí.
◼ Kapau ko e makasini naʻá ke tukú ʻoku fekauʻaki mo e tuʻunga falalaʻanga ʻo e Tohi Tapú, ʻe lava ke ke langaʻi hake ʻa e fehuʻi ko ʻení ʻi hoʻo lāulea hono hokó, “ʻOku tonu fakasaienisi ʻa e Tohi Tapú?” ʻI hoʻo toe ʻaʻahí, lāulea ki he palakalafi 8 ʻi he vahe 2.
4. Ko e hā ʻoku totonu ke tau faí kapau ʻoku ʻikai ke tali ʻe he tokotaha-ʻapí ia ʻa e tohi Akoʻi ʻe he Tohi Tapú?
4 ʻI he ngataʻanga ʻo e lāulea taki taha, langaʻi hake ha fehuʻi ʻe taha ke tali ʻi he ʻaʻahi hono hokó. ʻI hono fakahoko pē ha ako tuʻumaʻu, lāulea fakafoʻivahe leva ʻi he tohí mei he kamataʻangá ki he ngataʻangá. Fēfē kapau ʻoku ʻikai ke tali ʻe he tokotaha-ʻapí ia ʻa e tohi Akoʻi ʻe he Tohi Tapú? ʻE kei lava pē ke ke hokohoko ʻave ki ai ʻa e makasiní mo fai ha ngaahi fetalanoaʻaki Fakatohitapu mo ia. ʻI hoʻo fakatupulekina ʻene mahuʻingaʻiá, ʻe faai atu pē ʻa e taimí te ne tali nai ha ako Tohi Tapu.
5. Ko e hā ʻoku totonu ai ke tau feinga ke fai ʻa e meʻa lahi ange ʻo ʻikai ko hono tuku atu pē ʻa e ngaahi makasiní ki he kakaí?
5 ʻOku hanga ʻe he Taua Leʻo mo e ʻĀ Hake! ʻo langaʻi hake nai ʻa e holi ʻa ha taha ke ako ki he meʻa ʻoku akoʻi moʻoni ʻe he Tohi Tapú. Ko ia ai, fai ha feinga makehe ke kamata ha ngaahi ako Tohi Tapu mo e faʻahinga ʻoku nau tali ʻa e makasiní. ʻI he foungá ni, te tau talangofua ai ki he ngaahi fakahinohino ʻa Sīsū ke ‘ngaohi ākonga . . . , mo akoʻi kinautolu.’—Mt. 28:19, 20.