“Muimui Ofi, ʻo Topuvaʻe Taha mo Ia”
1. ʻE anga-fēfē haʻatau hoko ko ha kau faifekau ola lelei?
1 Naʻe ʻikai ako ʻa Sīsū ʻi ha ʻapiako faka-Lāpai, ka ko e faifekau tuʻu-ki-muʻa taha ia ʻi he hisitōliá. ʻOku tau fakamālōʻia ʻi hono fakatolonga mai ha lēkooti ʻo e ngāue fakafaifekau ʻa Sīsuú ʻa ia kuo hiki ke tau maʻu ʻaonga mei ai. Ke tau hoko ko ha kau faifekau ola lelei, kuo pau ke tau “muimui ofi, ʻo topuvaʻe taha mo ia.”—1 Pita 2:21.
2. Ko e hā te ne tokoniʻi kitautolu ke tau fakatupulekina ʻa e ʻofa faka-Kalaisí ki he kakaí?
2 Fakahāhā ʻa e ʻOfa ki he Kakaí: Ko e tokanga anga-ʻofa ko ia ʻa Sīsū ki he kakaí ʻa e meʻa naʻá ne ueʻi iá. (Mk. 6:30-34) Ko e tokolahi ʻi heʻetau vāhenga-ngāué ʻoku nau “fetoʻeaki” pea ʻoku nau fiemaʻu lahi ʻa e moʻoní. (Loma 8:22) ʻI heʻetau fakakaukauloto ko ia ki honau tuʻunga faingataʻaʻiá pea pehē ki he mahuʻingaʻia anga-ʻofa ʻa Sihova ʻiate kinautolú ʻe ueʻi ai kitautolu ke tau kīvoi ʻi he malangá. (2 Pita 3:9) ʻIkai ngata aí, ʻe talitali lelei ange ʻe he kakaí ʻetau pōpoakí ʻo kapau te nau ʻiloʻi ʻoku tau tokanga moʻoni fekauʻaki mo kinautolu.
3. Ko e ngaahi taimi fē naʻe malanga ai ʻa Sīsū ki he niʻihi kehé?
3 Lea ʻi he Faingamālie Kotoa Pē: Naʻe ngāueʻaongaʻaki ʻe Sīsū ʻa e faingamālie kotoa pē ke vahevahe ai ʻa e ongoongo leleí mo e niʻihi kehé. (Mt. 4:23; 9:9; Sione 4:7-10) ʻI he founga meimei tatau, ʻoku fiemaʻu ke tau mateuteu ke talanoa fekauʻaki mo e moʻoní ʻi he taimi ʻoku fai ai ʻetau ngaahi ngāue fakaʻahó. ʻOku faʻo maʻu pē ʻe he niʻihi ha Tohi Tapu mo ha ngaahi tohi ke nau lava nai ʻo faifakamoʻoni ʻi he ngāueʻangá, ʻi he akoʻangá, ʻi he taimi ʻoku nau fononga holo ai mo fakataú, mo e ngaahi taimi kehe.
4. ʻE anga-fēfē haʻatau ʻai ʻa e Puleʻangá ko e kaveinga ia ʻo ʻetau malangá?
4 Fakahangataha ki he Puleʻangá: Ko e ongoongo lelei ʻo e Puleʻangá ʻa e kaveinga ʻo e malanga ʻa Sīsuú. (Luke 4:43) Neongo heʻikai nai lave fakahangatonu ʻa ʻete tuʻuakí ki he Puleʻangá, ʻoku totonu ke tau manatuʻi ke tokoniʻi ʻa e tokotaha-ʻapí ke ne ʻiloʻi ʻa hono mahuʻingá. Naʻa mo e taimi ʻoku ʻohake ai ʻa e ngaahi tuʻunga kovi ʻo e māmaní ʻa ia ʻokú ne fakahaaʻi ʻoku tau lolotonga moʻui ʻi he ngaahi ʻaho fakaʻosí, ko ʻetau taumuʻa tefitó ke ʻoatu “ae ogoogo fiefia oe gaahi mea lelei.”—Loma 10:15, PM.
5. Ke ola lelei ʻetau ngāue fakafaifekaú, ko e hā ʻa e ngafa kuo pau ke fakahoko ʻe he Tohi Tapú?
5 Falala ki he Folofola ʻa e ʻOtuá: ʻI he kotoa ʻo e ngāue fakafaifekau ʻa Sīsuú naʻá ne ngāueʻaki maʻu pē ʻa e Tohi Tapú. Naʻe ʻikai te ne faiakoʻaki ha meʻa ʻi haʻane fakakaukau pē ʻaʻana. (Sione 7:16, 18) Ko ʻene meʻakaí ʻa e Folofola ʻa e ʻOtuá pea naʻá ne ngāueʻaki ia ʻi he taimi naʻe ʻohofi ai ia ʻe Sētané. (Mt. 4:1-4) Ke tau malava ʻo akoʻi ola lelei ʻa e niʻihi kehé, kuo pau ke tau lau fakaʻaho ʻa e Tohi Tapú pea ngāueʻaki ia ʻi heʻetau moʻuí. (Loma 2:21) ʻI hono tali ʻo e ngaahi fehuʻi ʻi he ngāue fakafaifekaú, ʻoku totonu ke tau lave ki he anga hono poupouʻi ʻe he Tohi Tapú ʻa e meʻa ʻoku tau leaʻakí pea lau hangatonu mei he Tohi Tapú ʻo kapau ʻe lava. ʻOku tau fiemaʻu ke vakai mai ʻa e tokotaha-ʻapí ʻoku ʻikai ko haʻatau fakakaukau fakafoʻituitui ʻoku tau fakahāʻí ka ko e ngaahi fakakaukau ʻa e ʻOtuá.
6. Ko e hā naʻe fai ʻe Sīsū ke aʻu ai ki he loto ʻo ʻene kau fanongó?
6 Akoʻi ke Aʻu ki he Lotó: “Teʻeki ha tangata ʻe lea hange ko ia.” (Sione 7:46) Ko e tali ia ʻa e kau ʻōfisá fekauʻaki mo Sīsū ʻi he taimi naʻe ʻeke ange ai ʻe he kau taulaʻeikí mo e kau Fālesí pe ko e hā naʻe ʻikai ke nau puke ai iá. ʻI he ʻikai ke ʻoatu pē ʻa e foʻi moʻoní, naʻe faiako ʻa Sīsū ʻi ha founga naʻe aʻu ai ki he loto ʻo e faʻahinga naʻá ne akoʻí. (Luke 24:32) Naʻá ne ngāueʻaki ʻa e ngaahi fakatātā kaungatonu moʻoni ki he moʻuí ke mahino ange ai ʻa e meʻa naʻá ne leaʻakí. (Mt. 13:34) Naʻe ʻikai lōmekina ʻe Sīsū ʻene kau fanongó ʻaki ha fakamatala ʻo fuʻu lahi. (Sione 16:12) Naʻá ne tohoaki ʻa e tokangá kia Sihova kae ʻikai kiate ia. ʻI he hangē ko Sīsuú, ʻe lava ke tau hoko ko e kau faiako lelei ʻaki pē ʻetau ‘lamalama ʻa e meʻa ʻoku tau akoʻakí.’—1 Tim. 4:16.
7. Ko e hā naʻe kīvoi ai ʻa Sīsū ʻi he ngāue fakafaifekaú?
7 Kīvoi Neongo ʻa e Taʻemahuʻingaʻiá mo e Fakafepakí: Neongo naʻe fai ʻe Sīsū ʻa e ngaahi ngāue fakaemana, naʻe ʻikai pē fanongo ʻa e tokolahi kiate ia. (Luke 10:13) Naʻa mo e ngaahi mēmipa tonu ʻo e fāmili ʻo Sīsuú naʻa nau pehē ʻe kinautolu “ʻoku ne sesele.” (Mk. 3:21) Kae kehe, naʻe kīvoi pē ʻa Sīsū. Naʻá ne tauhi maʻu ha fakakaukau pau koeʻuhí ko ʻene tuipau fakaʻaufuli naʻá ne maʻu ʻa e moʻoni te ne lava ʻo fakatauʻatāinaʻi ʻa e tangatá. (Sione 8:32) ʻI he tokoni ʻa Sihová, ʻoku tau fakapapauʻi ai foki ke ʻoua ʻe foʻi.—2 Kol. 4:1.
8, 9. ʻE anga-fēfē nai haʻatau faʻifaʻitaki kia Sīsū ʻi hono fai ha ngaahi feilaulau koeʻuhi ko e ongoongo leleí?
8 Fai ʻa e Ngaahi Feilaulau Pau Ka Ke Kau Kakato: Naʻe feilaulauʻi ʻe Sīsū ʻene fiemālie fakamatelié koeʻuhi ko e ngāue fakafaifekaú. (Mt. 8:20) Naʻá ne malanga taʻehela, ʻo aʻu ki heʻene poʻulia ʻi he taimi ʻe niʻihi. (Mk. 6:35, 36) Naʻe ʻiloʻi ʻe Sīsū naʻe toe siʻi ʻa hono taimi ke fakakakato ai ʻa e ngāué. Koeʻuhi ko e “fakanounou” ʻa e taimí, ʻoku fiemaʻu foki mo kitautolu ke tau feilaulauʻi fakafoʻituitui ʻa hotau taimí, iví, mo e meʻa ʻoku tau maʻú ʻi he faʻifaʻitaki kia Sīsū.—1 Kol. 7:29-31.
9 Ko e kau faifekau ola lelei ʻa e kau Kalisitiane ʻo e ʻuluaki-senitulí koeʻuhí naʻa nau ako meia Sīsū. (Ng. 4:13) ʻE lava mo kitautolu foki ke tau fai ke kakato ʻetau ngāue fakafaifekaú ʻo kapau te tau faʻifaʻitaki ki he Faifekau tuʻu-ki-muʻa taha ʻo e hisitōliá.—2 Tim. 4:5.