Akoʻi ʻa e Niʻihi Kehé Ke Nau ʻOfa kia Sihova
1. Ko e hā ʻokú ne tohoakiʻi ʻa e niʻihi kia Sihová?
1 ʻOkú ke manatuʻi ʻa e fuofua taimi naʻá ke fanongo ai ʻo kau kia Sihová? Ko e hā e meʻa naʻá ne tohoakiʻi koe kiate iá? Ko e kakai loto-totonu tokolahi te nau tala atu naʻe tohoakiʻi ofi kinautolu ki hotau Tokotaha-Fakatupú ʻi heʻenau maʻu ʻa e ʻilo ki hono ngaahi ʻulungāanga taʻehanotataú, tautefito ki heʻene manavaʻofá mo e ʻofá.—1 Sione 4:8.
2, 3. ʻE lava fēfē ke tau ngāueʻaki ʻa e tohi Akoʻi ʻe he Tohi Tapú ke tokoniʻi ai ʻa e kau ako Tohi Tapú ke tupulaki ʻenau ʻofa kia Sihová?
2 “Ko Hotau ʻOtua Eni”: ʻOku fakamamafaʻi ʻe he tohi Akoʻi ʻe he Tohi Tapú ʻa e ʻofa ʻa Sihová pea mo e fiemaʻu ke maʻu ha vahaʻangatae fakafoʻituitui mo iá. ʻE lava fēfē ke tau ngāueʻaki ʻa e tohi ko ení ke akoʻiʻaki ʻa e niʻihi kehé ke tupulaki ʻenau ʻofa ki he ʻOtuá? ʻI he tokangataha ki ha foʻi poini foʻoú, ʻe lava ke tau ʻeke ʻa e ngaahi fehuʻi langaʻi fakakaukau, hangē ko e: “Ko e hā ʻoku fakahaaʻi ʻe he moʻoni ko ení ʻo kau kia Sihová?” pe “ʻI he founga fē ʻoku ʻomi ai ʻe he poini ko ení ʻa e fakamoʻoni ko Sihova ʻa e Tamai lelei taha ʻe lava ke fakaʻamua ʻe ha taha pē?” Ko e faiako ʻi he founga ko ení ʻe lava ke tokoni ia ki he tokotaha akó ke ne fokotuʻu ha vahaʻangatae tuʻuloa mo Sihova.
3 ʻI heʻetau tokoni ki he kau ako Tohi Tapú ke nau mahinoʻi ko e monū moʻoni ia ke maʻu ʻa e ʻilo ki he ʻOtua moʻoni pē taha mo moʻuí, te nau hoko ai ʻo lāuʻilo, ʻo hangē ko ia ʻoku hā ʻi he ngaahi lea ʻa ʻAiseá, “ko hotau ʻOtua eni.” (Ai. 25:9) ʻI hono fakamatalaʻi ʻa e Folofola ʻa e ʻOtuá, ʻoku fiemaʻu ke tau fakamamafaʻi ʻa e founga ʻe faitāpuekina ai ʻa e faʻahinga ʻo e tangatá ʻaki hono fakahoko ʻa e ngaahi taumuʻa ʻa Sihová fakafou ʻi heʻene founga-pule fakatuʻí ʻi he malumalu ʻo Kalaisi Sīsuú.—Ai. 9:6, 7.
4, 5. Ko e hā ʻa e ʻuhinga ʻo e ʻofa kia Sihová?
4 Fakamoʻoni ʻo e ʻOfa kia Sihová: ʻOku tau ʻilo ko e ʻofa ko ia kia Sihova ʻaki hoto lotó, moʻuí mo e ʻatamaí kotoa ʻoku kau ki ai ʻa e meʻa lahi ange ia ʻi hono maʻu pē ʻa e ngaahi ongoʻi mālohi ki he ʻOtuá. Kuo pau ke tau ohi pea pipiki ki heʻene founga fakakaukaú. (Sāme 97:10) Ko e ʻofa ki he ʻOtuá ʻoku fakahāhaaʻi ia ʻaki ʻa e talangofua fakaʻaufuli ki heʻene ngaahi fekaú pea hokohoko atu ke kau ʻi he “ngaahi tōʻonga māʻoniʻoni ʻo e ʻulungāangá mo e ngaahi ngāue ʻo e anga-līʻoa fakaʻotuá,” naʻa mo e fehangahangai mo e ngaahi ʻahiʻahí mo e fakafepakí.—2 Pita 3:11, NW; 2 Sione 6.
5 Ko hono fai ʻa e finangalo ʻo e ʻOtuá koeʻuhi ko e ʻofa kiate iá ko ha meʻa fakafiefia ia. (Sāme 40:8) Ko e tokotaha ako Tohi Tapú kuo pau ke ne hoko ʻo lāuʻilo ko e ngaahi fekau kotoa ʻa e ʻOtuá ʻoku faʻufaʻu ia ke maʻu ai ʻa e lelei taʻengata ʻa ʻEne kau sevānití. (Teu. 10:12, 13) Ko e moʻui ʻo fehoanaki mo e tataki ʻa Sihová, ʻoku fakahāhā ai ʻe ha tokotaha ʻa e houngaʻia lahi ki he kotoa ʻo ʻEne ngaahi ngāue fakaofó. Tokoniʻi ʻa e tokotaha akó ke ne mahinoʻi ko e ʻaʻeva ʻi he ngaahi founga māʻoniʻoni ʻa Sihová ʻe hao ai ha tokotaha mei haʻane tofanga ʻi ha mamahi lahi.
6. Ko e hā ʻa e ngaahi tāpuaki ʻe maʻu nai ʻe ha toko taha ʻi heʻene ʻofa kia Sihová?
6 Ngaahi Tāpuaki Maʻá e Faʻahinga ʻOku Nau ʻOfa ʻi he ʻOtuá: ʻOku tokanga lahi mai ʻa Sihova ki he faʻahinga anga-fakatōkilalo ʻoku nau ʻofa ʻiate iá, pea ʻokú ne fakahaaʻi kia kinautolu ʻa e “gaahi mea loloto i he ʻOtua.” (1 Kol. 2:9, 10, PM) Fakafou ʻi he ʻilo pehē ki he ngaahi taumuʻa ʻa Sihová, ʻoku nau fakatuʻamelie atu ai ki he kahaʻú pea mo ha ʻamanaki papau. (Sel. 29:11) Ko e faʻahinga ʻoku nau ʻofa ʻia Sihová ʻoku nau hoko ʻo maʻu ʻene ʻofa lahí. (Eki. 20:6) ʻOku nau fakahoungaʻi ʻa e ʻamanaki ʻo e moʻui taʻengatá koeʻuhi ko e ʻofa lahi ʻa Sihova kia kinautolú.—Sione 3:16.
7. ʻOku fēfē hoʻo ongoʻi ʻo kau ki hono akoʻi ʻa e niʻihi kehé ke nau ʻofa kia Sihová?
7 Ko e lahi ange ʻetau hoko ʻo ʻiloʻi ʻetau Tamai fakahēvaní, ko e lahi ange ai pē ia e meʻa kuo pau ke tau vahevahe atu ki he niʻihi kehé. (Mt. 13:52) He monū taʻehanotatau ia ke akoʻi ʻa e niʻihi kehé, pea tautefito ki heʻetau fānaú, ke nau ʻofa kia Sihova! (Teu. 6:5-7) Fakatauange ke tau hokohoko atu fakataha mo ʻetau kau ako Tohi Tapú, ʻi hono puʻaki atu ʻa e fakahīkihiki ʻi heʻetau tofanga he ‘fuʻu lelei ʻo Sihová.’—Sāme 145:7.