ʻE Lava Ke Ke Hoko ko ha Faiako!
1. Ko e hā ʻa e faingamālie makehe maʻá e tokotaha malanga kotoa pē ʻo e Puleʻangá?
1 Ko e taha ʻo e tafaʻaki mahuʻinga lahi ʻo e ngāue fakafaifekaú ko hono akoʻi ʻa e moʻoní ki ha taha. ʻI he sio ki heʻene tali ʻa e pōpoaki ʻo e Puleʻangá pea tokoniʻi ia ke ʻunuʻunu ofi ki he Hau ʻo e ʻunivēsí ko ha hokosia fakakoloa ia. (Sem. 4:8) ʻOku totonu ke hoko ko ha taumuʻa ia ʻa e tokotaha malanga kotoa pē ʻo e Puleʻangá ke akoʻi ha taha ʻoku fiekaia ki he moʻoní pea siofi ʻa e tokotaha ko iá ʻi he kamata ke liliu lahi ʻa ʻene tōʻongá, fakakaukaú mo e ʻulungāangá.—Mt. 28:19, 20.
2. Ko e hā ʻoku toumoua nai ai ʻa e niʻihi ke fakahoko ha ako Tohi Tapú, pea ko e hā te ne tokoniʻi kinautolu ke ikuʻi ʻa e palopalema ko ʻení?
2 Falala kia Sihova: ʻI he ngaahi taimi ki muʻá, naʻe ʻikai ke ongoʻi ai ʻe he kau sevāniti faitōnungá te nau lava ke fakahoko ʻa e ngāue kuo vaheʻi ange kia kinautolú. Ko e falala kia Sihova ko e ʻOtuá, naʻe fakamafeia ai ʻa Mōsese, Selemaia, ʻĒmosi mo e kakai māʻulalo kehe ke nau ikuʻi ʻenau ngaahi veiveiua pe manavaheé tonu ka nau fakahoko ha ngāue mahuʻinga. (Eki. 4:10-12; Sel. 1:6, 7; Emosi 7:14, 15) Ko e ʻapositolo foki ko Paulá naʻá ne “maʻu ʻa e loto-toʻa,” pe ko hono moʻoní, naʻá ne “lea taʻemanavahē.” Anga-fēfē? Naʻá ne fakahaaʻi ʻo pehē “fakafou ʻi hotau ʻOtuá.” (1 Tes. 2:2, NW) ʻIo, ko kitautolu kotoa ʻe lava ke tau falala kia Sihova te ne tokonaki mai ʻa e tokoní, potó mo e mālohi ʻa ia ʻoku tau fiemaʻu ke fakahokoʻaki ha ngaahi ako Tohi Tapu ola lelei.—Ai. 41:10; 1 Kol. 1:26, 27; 1 Pita 4:11.
3, 4. Ko e hā ʻa e fakahinohino ʻoku tau ala maʻu ke tokoniʻi kitautolu ʻi he faiakoʻaki ʻa e Folofola ʻa e ʻOtuá?
3 Tali ʻa e Fakahinohino: Ko ʻetau Faiako Maʻongoʻongá, ʻa Sihova ko e ʻOtuá, ʻokú ne tokonaki ʻa e fakahinohino fakafou ʻi ha polokalama tuʻumaʻu ʻo e ako fakalaumālie koeʻuhí ke lava ʻo tau taau kakato ai ke hoko ko ha kau faiako. (Ai. 54:13; 2 Tim. 3:16, 17) Tali ʻa e fakahinohino ko ʻení ʻaki hono ngāueʻaongaʻaki ʻa e faingamālie kotoa pē ke fakalahi ai hoʻo mahino fekauʻaki mo e ngaahi Konga Tohi Tapú pea fakaleleiʻi hoʻo malava ke akoʻi ʻa e ngaahi moʻoni Fakatohitapú. Neongo ko e taumuʻa tefito ia ʻo e Ako Fakafaifekau Fakateokalatí mo e Fakataha Ngāué, ko e ngaahi fakataha kotoa pē ʻa e fakatahaʻangá ʻoku fakahinohinoʻi ai kitautolu ke akoʻaki ʻa e Folofola ʻa e ʻOtuá.
4 Feinga ke ako ʻa e ngaahi founga faingofua ke akoʻi ʻaki naʻa mo e ngaahi moʻoni Fakatohitapu lolotó. Ko e tohi Ako Fakafaifekau, peesi 227, ʻoku fakamatala ai: “Kuo pau ke ke mahinoʻi lelei hoʻo tuʻunga-leá kapau ʻokú ke teu ke ʻai ia ke mahinongofua ki he niʻihi kehé.” Ko e tali ʻi he ngaahi fakatahá ʻoku tokoniʻi ai kitautolu ke tau maʻu ʻa e ngaahi poini tefitó ʻi hotau ʻatamaí koeʻuhi ke ngāueʻaki ia ʻi he kahaʻú. Ko ia teuteu lelei, pea ʻe tupulekina ai ʻa hoʻo falala pau ki hoʻo malava ke faiakó.
5. Ko e hā mo ha toe fakahinohino ʻoku tau maʻu ʻi he fakatahaʻangá ʻe tokoniʻi ai kitautolu ke tau fakalakalaka ʻi he hoko ko e kau faiakó?
5 Mei he kamataʻangá, ʻoku ʻikai ha veiveiua ʻoku feakoʻaki ʻa e kau faifekau Kalisitiané ʻi heʻenau kau ki he ngāue ngaohi-ākongá. (Luke 10:1) Kapau ʻe malava, ʻalu mo e kau malanga taukeí, kau ai ʻa e kau tāimuʻá, kau mātuʻá mo e kau ʻovasia fefonongaʻakí ʻi he ngāue ako Tohi Tapú. Siofi ʻa e anga ʻo ʻenau ngāueʻaki ʻa e ngaahi fakatātā faingofua mo e ngaahi tokoni fakafaiako kehe ʻoku maʻu ʻi heʻetau ngaahi tohi akó ke fakamatalaʻiʻaki ʻa e ngaahi moʻoni Fakatohitapú. Kole kia kinautolu ki ha ngaahi fokotuʻu ki he founga ʻe lava ai ke ke hoko ko ha faiako lelei angé. (Pal. 1:5; 27:17) Houngaʻia ʻi he kotoa ʻo e fakahinohino pehē mei he niʻihi kehé—he ko e fakahinohino ia kuo ʻomai ʻe he ʻOtuá.—2 Kol. 3:5.
6. Ko e hā ʻa e fiemaʻu mātuʻaki mahuʻinga ke hoko ai ko ha faiako ʻo e Folofola ʻa e ʻOtuá?
6 Falala kia Sihova, pea maʻu ʻaonga mei he fakahinohino ʻokú ne ʻomaí. Lotu fekauʻaki mo hoʻo feinga ke laka ki muʻá. (Sāme 25:4, 5) ʻE lava ke ke hokosia mo koe foki ʻa e fiefia ʻi hono tokoniʻi ha taha ke hangē ko koé, ʻo hoko ko ha faiako ʻo e Folofola ʻa e ʻOtuá!