Tauhi Kimoutolu ʻi he ʻOfa ʻa e ʻOtuá
1. Ko e hā e taumuʻa naʻe pulusi ai ʻa e Tauhi Kimoutolu ʻi he ʻOfa ʻa e ʻOtuá?
1 He fakatuʻotuʻa vēkeveke ē ka ko kitautolu ke ako ʻa e tohi foʻou Tauhi Kimoutolu ʻi he ʻOfa ʻa e ʻOtuá ʻi he Ako Tohi Tapu ʻa e Fakatahaʻangá ʻa ia ʻe kamata ʻi he uike ʻo Fepueli 23! Ko e tohi naʻe fai ʻe he Kulupu Pulé ki he tokotaha taki taha ʻoku ʻofa kia Sihová ʻoku fakaʻosiʻaki ai ʻa e ngaahi leá ni: “Ko ʻemau ʻamanaki loto-moʻoní ia ʻe hanga ʻe he tohí ni ʻo tokoniʻi koe ke hokohoko atu hono ngāueʻaki ʻa e moʻoní ʻi hoʻo moʻuí pea tauhi ai koe ‘ʻi he ʻofa ʻa e ʻOtua . . . ʻo aʻu ki he moʻui taʻengata.’—Siutasi 21.”
2. Ko e hā ʻa e ngaahi tafaʻaki ʻi he moʻuí ʻe tokoniʻi ai kitautolu ʻe he tohi foʻoú ni?
2 Meʻa ke Fakatuʻotuʻa ki Ai: ʻOku anga-fēfē hono ngāueʻaki ʻa e ngaahi tefitoʻi moʻoni ʻa e Tohi Tapú ʻi he ngaahi tafaʻaki hangē ko e feohí, fakafiefiá, fakaʻapaʻapaʻi ʻa e mafaí, tōʻonga fakafoʻituituí, nofo malí, leá mo e anga fakafonuá? ʻE fakafuo hotau konisēnisí ʻo fakatatau ki he ngaahi tuʻunga māʻolunga ʻo e māʻoniʻoni ʻoku hā ʻi he Folofola ʻa e ʻOtuá. (Sāme 19:7, 8) ʻI he tupulekina ʻetau mahinoʻi ʻa e anga ʻo e fakakaukau ʻa Sihová, ko ʻetau talangofua ʻi he ngaahi tafaʻaki kotoa pē ʻo e moʻuí ʻe ueʻi ia ʻe ha holi ke fakahōifuaʻi ia.—Pal. 27:11; 1 Sione 5:3.
3. Ko e hā ʻoku totonu ai ke tau fai hotau lelei tahá ke kau ʻi he lēsoni ʻo e uike taki taha?
3 Fakapapauʻi ke Kau ki Ai: ʻI hoʻo teuteú, ʻai ko hoʻo taumuʻá ia ke fakahīkihikiʻi ʻa e ʻOtuá ʻi he fakatahataha ʻa hono kakaí. (Hep. 13:15) ʻE lāulea ʻa e fakatahaʻangá kotoa ki he tohi ako foʻoú ni. Ko e siʻisiʻi ange ʻa e fakamatalá te tau malava kotoa ai ke teuteu fakaʻāuliliki, ʻo tau loto-maʻu ai ke vahevahe atu ʻa e meʻa kuo tau akó. Ko ʻetau teuteu lelei mo tali nounoú, ʻe fakaʻaiʻai ai ʻa e niʻihi kehé ki he ʻofa mo e ngaahi ngāue lelei pea ʻe tokoni ia ki ha lāulea longomoʻui mo mohu ʻuhinga ki he fakamatalá. (Hep. 10:24) ʻIkai ko ia pē, ʻe kakato ʻetau fiefiá ʻo kapau te tau fakahaaʻi ʻetau tuí.
4. Ko e hā ʻoku mātuʻaki mahuʻinga ai ke tau tauhi ʻa e ngaahi fekau ʻa Sihová?
4 ʻI hono pō fakaʻosi ko eni ʻi he māmaní ko ha tangatá, naʻe fakafehokotaki ai ʻe Sīsū ʻa e tauhi ʻo e ngaahi fekau ʻa Sihová ki he nofo maʻu ʻi he ʻofa ʻa e ʻOtuá. (Sione 15:10) ʻI he tokoni ʻa e tohi ʻOfa ʻa e ʻOtuá, te tau fakapapauʻi ange ai ʻi ha toe taimi ke ngāueʻaki ʻa e ngaahi tefitoʻi moʻoni ʻa e Tohi Tapú ʻi heʻetau moʻui fakaʻahó pea ‘tauhi kitautolu ʻi he ʻofa ʻa e ʻOtuá.’—Siu. 21.