Feingangāue Makehe ke Tuʻuaki ʻa e Fakamanatú!
1. Ko e hā ʻe kau ki ai ʻi māmani lahi ʻa e kau malanga ʻo e Puleʻangá ʻo kamata ʻi Maʻasi 21, 2009, pea ko e hā hono ʻuhingá?
1 ʻI he Tuʻapulelulu, ʻEpeleli 9, 2009, ʻe fakatahataha ai ʻa e kau lotu ʻa Sihova ko e ʻOtuá ʻi māmani lahi ke fakamanatu ʻa ʻene ʻofa lahi taha kuo fai ki he faʻahinga ʻo e tangatá. (Loma 5:6-8) ʻOku tau fakatuʻotuʻa vēkeveke atu ke ʻi ai fakataha mo e faʻahinga mahuʻingaʻia ʻe laui miliona ʻi he taimi te tau fakamanatu ai ʻa e pekia ʻa Sīsuú. ʻE tufaki ʻi māmani lahi ha tohi fakaafe makehe ki he Fakamanatú ʻo kamata ʻi Maʻasi 21.
2. Ko e hā ʻa e ngaahi meʻa ʻoku totonu ke ke manatuʻi ʻi hono tuʻuaki ʻa e tohi fakaafé?
2 Meʻa ke Fakakaukau ki Ai: Ngāueleleiʻaki ʻa e ngaahi fakatātā, ko e ngaahi fehuʻi mo e konga Tohi Tapu ʻoku hā ʻi he tohi fakaafé. Ko e fakatātaá, te ke lave nai ki he fakatātā ʻi he takafí peá ke pehē: “ʻOku ou loto ke fakaafeʻi koe ke tau fakamanatu fakataha ʻa e pekia ʻa Sīsuú, ʻa ia ʻe kātoangaʻi ʻi he Tuʻapulelulu, ʻo ʻEpeleli 9, 2009.” Pea lave leva ki he kaveinga ʻo e tohi fakaafé mo e ngaahi fehuʻi hoko aí. Fakapapauʻi ke fakamamafaʻi ki he tokotaha-ʻapí ʻoku talitali lelei ke ne fakaafeʻi hono fāmilí pe ko ha niʻihi kehe pē ʻokú ne loto ke haʻu mo ia.
3. ʻE anga-fēfē nai haʻo toe foki ki ha taha naʻe tuku ai ki muʻa ha tohi fakaafe ʻi he feingangāué?
3 Kapau ʻoku lahi ʻa e feituʻu ngāue hoʻo fakatahaʻangá, ʻe tala atu hangatonu nai ʻe he kau mātuʻá ke ke tuku ʻa e ngaahi tohi fakaafé ʻi he ngaahi ʻapi ʻoku ʻikai ha tahá. ʻI he ngaahi fakaʻosinga uiké, tuʻuaki ʻa e ngaahi makasiní fakataha mo e tohi fakaafé. ʻAi ko hoʻo taumuʻá ia ke fakaafeʻi ʻa hoʻo ngaahi toe ʻaʻahí, kau ako Tohi Tapú, kāingá, kaungāakó, kaungāngāué, kaungāʻapí mo e ngaahi maheni kehé. ʻI he taʻu kuo ʻosí, naʻe fakaafeʻi ai ʻe he tuofefine ʻe taha ha toko 30 ʻo hono kāingá peá ne toutou fakamanatu leva kia kinautolu ʻa e mahuʻinga ʻo e kātoangá. He fiefia moʻoni ē ka ko ia ʻi he haʻu ki ai ʻa e toko 25, pea ko e toko 4 ai naʻa nau tali ki mui ha ako Tohi Tapu!
4. Ko e hā ʻa e ngaahi palani kuo pau ke tau fai he taimi ní, pea ko e hā hono ʻuhingá?
4 Palani he Taimí Ni: ʻE malava nai ʻe he kau malanga tokolahi ke fakalahi ʻenau ngāué he lolotonga ʻo Maʻasi mo ʻEpelelí. Kapau ʻoku ʻi ai haʻo fānau pe kau ako Tohi Tapu ʻoku nau mātuʻaki fakalakalaka, ko e taimi lelei nai eni kia kinautolu ke hoko ai ko ha kau malanga teʻeki papitaiso. Ko e taimi eni ke kamata ai ʻa hono fai ʻo e ngaahi fokotuʻutuʻu ke kau kakato ai ʻi he feingangāué ni ʻa ia ko e tuʻuaki ʻa e fakamanatu ʻo e ongo fakahāhā lahi taha ʻo e ʻofá.—Sione 3:16; 15:13.