“Fai Behe Ni Koeuhi koe Ogoogolelei”
1. Ko e hā ʻoku loto-lelei ha tokotaha malanga ʻo e Puleʻangá ke fai maʻá e niʻihi kehé, pea ko e hā hono ʻuhingá?
1 Naʻe ongoʻi ʻe he ʻapositolo ko Paulá ʻoku ʻi ai hono fatongia fakafoʻituitui ke talaki ʻa e ongoongo leleí ki he niʻihi kehé. (1 Kol. 9:16, 19, 23, PM) ʻI he tuʻunga meimei tatau, ko ʻetau tokanga ki he lelei tuʻuloa ʻa e kakaí ʻoku ueʻi ai kitautolu ke fai ha feinga makehe ke vahevahe atu ʻa e ongoongo leleí kia kinautolu.
2. ʻI he malangá, ko e hā ʻa e ngaahi feʻunuʻaki ʻoku tau loto-lelei ke faí, pea ko e hā hono ʻuhingá?
2 Malanga ʻi he Feituʻu mo e Taimi ʻe Lava ke Maʻu Ai ʻa e Kakaí: ʻOku lī ʻe ha tangata toutai pōtoʻi ʻene mātaʻú pe kupengá, ʻo ʻikai ʻi he feituʻu mo e taimi ʻoku faingamālie kiate iá, ka ʻi he feituʻu mo e taimi ʻoku ngalingali ʻe maʻu lahi taha ai ʻa e iká. Ko kitautolu foki, ʻi he tuʻunga ko e kau “toutai tangata,” ʻoku fiemaʻu nai ke tau fai ha ngaahi feʻunuʻaki fakafoʻituitui koeʻuhi ke maʻu ai ʻa e kakaí ʻi hotau feituʻu ngāué pea maʻu ai ʻa e fiefia lahi ange ʻi he monū ko hono fakatahatahaʻi mai ʻa e “ngāhi faʻahinga ika kotoa.” (Mt. 4:19; 13:47) ʻE lava ke tau ngāueʻaki ʻa e taimi efiafí ke fetuʻutaki ai ki he kakaí ʻi honau ngaahi ʻapí pe taimi pongipongiá ke faifakamoʻoni ai he halá? Ko e taumuʻa ʻa Paulá ke “faifakamoʻoni fakaʻāuliliki ki he ongoongo leleí,” pea naʻá ne ngāueleleiʻaki ʻa e faingamālie ke fai peheé.—Ng. 17:17; 20:20, 24, NW.
3, 4. Lolotonga ʻetau ʻi he ngāue fakafaifekaú, ʻi he ngaahi founga fē ʻe lava ai ke tau liliu ʻetau tuʻuakí, pea ko e hā ʻa e olá?
3 Liliu Hoʻo Tuʻuakí ʻo Fakatatau ki he Fiemaʻú: ʻOku toutou liliu ʻe he kau toutaí ʻenau ngaahi foungá koeʻuhi ke maʻu ai ha faʻahinga pau ʻo e iká. ʻE lava fēfē ke tau tuʻuaki ʻa e ongoongo lelei ʻo e Puleʻangá ʻi ha founga fakamānako ki he kakai ʻi hotau feituʻu ngāué? Kuo pau ke tau fakapotopoto ʻi hono ʻohake ha kaveinga ʻa ia ʻoku hohaʻa ki ai ʻa e tokolahi taha ʻo e kakai he feituʻú pea fanongo tokanga leva ki he meʻa ʻoku nau leaʻaki fekauʻaki mo e kaveingá. (Sem. 1:19) Kuo pau ke tau ʻeke ha fehuʻi fakatupunga fakakaukau koeʻuhi ke lava ai ke tau ʻiloʻi ʻa e meʻa ʻoku ʻi honau lotó. (Pal. 20:5) ʻI he foungá ni te tau malava ai ke liliu ʻetau tuʻuaki ʻo e ongoongo leleí ʻi ha founga ʻe maongo ki heʻenau moʻui fakafoʻituituí. Naʻe hoko ʻa Paula ko e “meʻa kehekehe ki he kakai kehekehe.” (1 Kol. 9:22) Ko e maliliungofuá ʻa e kī ke aʻu ai ki he loto ʻo e kakaí.
4 He fiefia moʻoni ē ke vahevahe atu ki he kakaí ʻa e “ogoogolelei oe lelei”! (Ai. 52:7, PM) ʻOfa ke tau “fai behe ni koeuhi koe ogoogolelei” ke aʻu ai ki he tokolahi taha ʻe malavá.—1 Kol. 9:23, PM.