Ko ʻEtau Ngāue Fakafaifekaú—Ko ha Tapua Atu Ia ʻo ʻEtau ʻOfa ki he ʻOtuá
1. Ko e hā naʻe ueʻi ʻe he ʻofa ki he ʻOtuá ʻa Sīsū ke ne faí?
1 Naʻe ueʻi ʻa Sīsū ʻe he ʻofá ke fakahoko ʻene ngāue fakafaifekaú. Ko e tafaʻaki kotoa ʻo e ngāue fakafaifekau ʻa Sīsuú ko e fakamoʻoni taʻealafakaʻikaiʻi ia ʻo ʻene ʻofa kia Sihová. Naʻe pehē ʻe Sīsū: “Ke ʻilo ʻe māmani ʻoku ou ʻofa ki he Tamai, pea hangē ko hoku tuʻutuʻuni ʻe he Tamai, ʻoku pehē ʻeku fai.” (Sione 14:31) ʻI he hoko ko e kau muimui molomolo muivaʻe ʻo Sīsuú, ʻoku tau toe maʻu ai ʻa e monū ke tapua atu ʻa ʻetau ʻofa lahi ki he ʻOtuá ʻi heʻetau ngāue fakafaifekaú.—Mt. 22:37; Ef. 4:32e, 33 (5:1, 2, PM).
2. ʻOku anga-fēfē ʻa e kaunga ʻetau ʻofa kia Sihová ki heʻetau ngāue fakafaifekaú?
2 “Ke Tapuhā Ho Huafa”: ʻI he taimi ʻoku tau ngāue ʻaonga faivelenga ʻaki ai ʻa e faingamālie kotoa pē ke lea ki he niʻihi kehé ʻo fekauʻaki mo Sihova pea mo hono Puleʻangá, ʻoku fakahā ai ʻetau ʻofa ki he ʻOtuá pea ko hono olá ʻoku tau tokoni ai ke fakatāpuhaaʻi hono huafá. (Sāme 83:18; Isi. 36:23; Mt. 6:9) ʻI he hangē ko e ngāue fakafaifekau ʻa Sīsuú, ko ʻetau ngāue fakafaifekaú ʻoku hokohoko tapua atu ai ʻa ʻetau holi loto-moʻoni ke fakatāpuhaaʻi ʻa e huafa ʻo Sihová pea ke fakahoko ai hono finangaló.—Mt. 26:39.
3. ʻI he founga fē ʻoku tokoniʻi ai kitautolu ʻe heʻetau ʻofa kia Sihová ke tau ikuʻi ha fakafaingataʻaʻiaʻanga?
3 Ueʻi Kitautolu ʻe he ʻOfá ke Ikuʻi ha Fakafaingataʻaʻiaʻanga: ʻOku ikuʻi ʻe he ʻofa kia Sihová ʻa e fakangatangata kotoa pē. (1 Kol. 13:4, 7) Naʻe fehangahangai ʻa Sīsū mo e ngaahi tuʻunga kehekehe ʻi he moʻuí ne mei lava ke taʻofi ai ia mei hono fakahoko ʻene ngāue fakafaifekaú. Kae kehe, ʻi heʻene fetaulaki mo ha fakafaingataʻaʻiaʻanga, ko ʻene ʻofa lahi mo ʻene holi ke fai ʻa e finangalo ʻo Sihová naʻe malava ai ke ne lavaʻi iá. (Mk. 3:21; 1 Pita 2:18-23) ʻOku tau fehangahangai foki mo e ngaahi faingataʻa lahi, ʻa ia ko ʻetau ʻofa ki he ʻOtuá ʻe lava ke tokoniʻi ai kitautolu ke tau ikuʻi ia. ʻI he muimui ofi ki he faʻifaʻitakiʻanga ʻa Kalaisí, te tau loto-falala ai mo hokohoko atu ʻi heʻetau ngāue fakafaifekaú. Neongo ʻe uesia nai kitautolu ʻe he fakafepaki ʻa e fāmilí, mahamahakí, hoholo ke motuʻá, pe lahi ʻa e taʻemahuʻingaʻiá, heʻikai taʻofi ai kitautolu mei hono fakahāhā ʻetau ʻofa kia Sihova ʻi hono fakahoko lavameʻa ʻa e ngāue fakafaifekaú ʻaki ʻetau lelei tahá.
4. Ko e hā ʻa e monū ʻoku tau maʻu ʻi heʻetau ʻofa kia Sihová?
4 ʻOku mālohi ʻa e ʻofá, pea kuo faitāpuekina kitautolu ʻi hono maʻu ʻa e malava ke tapua atu ai ʻetau ʻofa ʻaufuatō ki he ʻOtuá ʻi heʻetau ngāue fakafaifekaú. (1 Kol. 13:13) ʻI he tuʻunuku vave mai ʻa e taimi ke fakatāpuhaaʻi fakaʻaufuli ai ʻa e huafa ʻo Sihová, fakatauange ke ‘tupulekina ʻo lahi hake ʻaupito ʻetau ʻofá.’—Fili. 1:9; Mt. 22:36-38.