Fakahīkihikiʻi ʻa Sihova ʻi he ʻAho Taki Taha

1. Ko e hā ʻokú ne ueʻi ʻa e kau sevāniti ʻa Sihová ke nau faí, pea ko e hā hono ʻuhingá?

¹ Naʻe fakamatala ʻa Tuʻi Tēvita ki heʻene fakapapau ke fakahīkihikiʻi ʻa Sihova ʻi he “ʻaho kotoa pe” ʻo aʻu ʻo lauikuonga. (Sāme 145:2, 7, 21) Ko kitautolu foki ʻoku tau maʻu ʻa e ʻuhinga lelei ke tau fakahīkihikiʻi ai ʻa Sihova ʻi he ʻaho taki taha.—Sāme 37:10; 145:14, 18; 2 Pita 3:13.

2. ʻOku fakahīkihikiʻi fēfē nai ʻe he ngaahi fāmilí ʻa Sihova ʻi he ʻaho taki taha?

² ʻI Hotau ʻApí: ʻOku tau maʻu ʻa e fakamatala fakatupu langa hake kuo pulusi ki he lāulea mohu ʻuhinga fakalaumālié ʻi he fetalanoaʻaki he konga tohi fakaʻahó, ʻi he Lotu Fakafāmilí, pea ʻi he teuteu ki he ngaahi fakataha ʻa e fakatahaʻangá. ʻOku tōʻongaʻaki ʻe he ngaahi fāmili lahi ʻa e kai fakataha ʻo ʻikai siʻi hifo he houa kai ʻe taha ʻi he ʻaho. ʻOku fakaʻatā ʻi he meʻa ko iá ke fai ai ha fetalanoaʻaki ʻikai fakavave mo fiemālie, ʻo ʻomai ai ʻa e ngaahi faingamālie ke fakahīkihikiʻi ai ʻa Sihova. Ko e ngaahi fetalanoaʻaki pehē kuo ʻohake ʻe he ngaahi mātuʻá ʻe lava ke hoko ko ha tokoni mahuʻinga ia ʻi hono tauhi hake ʻa ʻenau fānaú ʻi he “akonaki mo e fakatonutonu-fakaʻatamai ʻa Sihová.”—Ef. 6:4, NW; Teu. 6:5-7.

3. Ko e hā ʻa e ngaahi faingamālie ʻoku tau maʻu ʻi heʻetau feohi mo hotau fanga tokouá?

³ Mo Hotau Fanga Tokouá: ʻI heʻetau ʻi he ngāue fakamalangá pe ʻi he ngaahi fakataha ʻa e fakatahaʻangá, ʻoku tau maʻu ai ʻa e ngaahi faingamālie lelei ʻaupito ke fakahīkihikiʻi ʻa Sihova fakataha mo e kaungātuí. (Pal. 15:30; Fili. 4:8; Hep. 13:15) Koeʻuhi ʻoku tau ʻofa kotoa kia Sihova, ʻoku totonu ke faingofua hono fakakau ʻo e ngaahi kupuʻi lea loto-moʻoni ʻo e houngaʻia ki he lelei ʻa Sihová ʻi heʻetau fetalanoaʻakí.—Sāme 106:1.

4. Ko e hā ʻa e ngaahi tuʻunga ʻe lava ke ke fakahīkihikiʻi ai ʻa Sihová?

⁴ ʻI he Lea ki he Kau Taʻetuí: Neongo heʻikai nai fakaʻatā ʻi hotau ngaahi tuʻungá ke kau ʻi he ngāue fakafaifekaú ʻi he ʻaho taki taha, ko e lea naʻa mo e ʻi he taimi nounou ki he kaungāngāué, kaungāakó, mo e niʻihi kehe takatakai ʻia kitautolú fekauʻaki mo Sihova mo ʻene ngaahi taumuʻá ʻe lava ke fakahūhū ai ha ʻamanaki ki he kakai loto-totonú. (Sāme 27:14; 1 Pita 3:15) Lolotonga ha folau ʻi ha vakapuna, naʻe malava ai ha tuofefine ke faifakamoʻoni ki ha kaungā pāsese ʻa ia naʻá ne ongoʻi fiemālie lahi mo loto-toʻa ʻi he meʻa naʻá ne fanongo ki aí ʻo ne ʻoange ai ki he tuofefiné ʻa hono tuʻasilá mo e fika telefoní koeʻuhi ke lava ʻo hokohoko atu ʻa ʻena fetuʻutakí. ʻI he tofanga ʻa e māmaní he fakautuutu ʻa e faingataʻá mo e ngaahi tuʻunga kovi angé, ʻoku hokohoko atu ʻa e kakai ʻa Sihová ʻi hono ʻoatu ki he faʻahinga fiefanongó ʻa e ‘ongoongo ʻo e meʻa lelei.’ ʻOku ʻoatu ʻe he meʻá ni ki he niʻihi kehé ʻa e ʻamanaki pea fakatupunga ai ke nau fakahīkihikiʻi ʻa Sihova.—Ai. 52:7; Loma 15:11.

5. Ko e hā ʻoku tau holi ai ke fakahīkihikiʻi ʻa Sihová, pea ko e hā nai ʻoku fakahoko ʻi he meʻá ni?

⁵ He fiefia ē kuo pau naʻe hoko kia Sihova ʻi he fanongo ki hono fakahīkihikiʻi ia ʻe heʻene kau sevānití ʻi he ʻaho taki taha! Hangē ko e fakatupu hāmai ʻa Sihova ʻoku takatakai kia kitautolú, ko kitautolu foki ʻe lava ke tau leaʻaki hono fakahīkihikí ʻi he ʻaho taki taha ʻi hotau ngaahi ʻapí, ʻi he fakatahaʻangá, pea ʻi he taimi ʻoku tau fetalanoaʻaki ai mo e niʻihi kehe ʻoku teʻeki ai ke nau hoko ko e kaungā fakahīkihiki ʻo Sihová.—Sāme 19:1-4.