ʻE Fēfē Haʻo Tali?
1. Ko e hā ʻoku totonu ai ke tau faʻifaʻitaki kia Sīsū ʻi hono ʻeke ha fehuʻí?
1 ʻOku aʻu mai ki he ʻahó ni ʻa e kei ofoofo ʻa e tangatá ʻi he founga ola lelei naʻe tali ai ʻe Sīsū ʻa e fehuʻi mo e kole ʻa e kakaí. ʻI he fetaulaki mo e founga kehekehe ʻo e fehuʻí lolotonga ʻa e kau ki heʻetau ngāue fakafaifekaú, ʻoku lelei ke tau faʻifaʻitaki kia Sīsū ʻi he fekauʻaki mo e meʻá ni.—1 Pita 2:21.
2. Ko e hā te ne tokoniʻi nai kitautolu ke maʻu ha tali ola lelei ki ha fehuʻi?
2 Tomuʻa Fanongo: Naʻe fakakaukau ʻa Sīsū ki he ʻuhinga naʻe ʻeke ai ʻe he tokotahá ʻa e fehuʻí. ʻI he taimi ʻe niʻihi ʻoku fiemaʻu heni ʻa hono ʻeke ha fehuʻi ke fakapapauʻiʻaki ʻa e meʻa ʻoku ʻuhinga moʻoni ki ai ʻa e tokotahá. Ko hono ʻeke ʻe ha tokotaha, “ʻOkú ke tui kia Sīsū?” ʻoku fifili moʻoni nai ki he ʻuhinga ʻoku ʻikai te ke kātoangaʻi ai ʻa e Kilisimasí. Kapau te ke lāuʻilo ki he hohaʻa moʻoni ʻa e tokotaha fehuʻí, ʻe lava ai ke ke fakaʻuhinga ola lelei ange mo ia.—Luke 10:25-37.
3. Ko e hā ʻoku tau ala maʻu ke tokoni kia kitautolu ʻi hono maʻu ʻa e ngaahi tali fakafiemālie ʻi he Tohi Tapú?
3 Tali ʻAki ʻa e Folofola ʻa e ʻOtuá: ʻOku faʻa lelei tahá ke fakahaaʻi ʻa e anga ʻo e tali ʻa e Tohi Tapú ki he fehuʻí. (2 Tim. 3:16, 17; Hep. 4:12) Kuo fakamoʻoniʻi ʻene ʻaonga ʻa e kiʻi tohi “Ngaahi Tuʻunga-Lea Fakatohitapu ke Fetalanoaʻaki Ai” ʻi hono ʻoatu ʻa e tali totonú. Neongo kapau ʻoku ʻikai ke tali ʻe he tokotaha fehuʻí ʻoku ʻi ai ha mafai ʻo e Tohi Tapú, ʻe lava nai ke ke vahevahe ʻi he fakapotopoto ʻa e meʻa ʻoku akoʻi ʻe he Tohi Tapú. Fakalototoʻaʻi ʻa e tokotahá ke fakakaukau fakamātoato ki he poto kuo fakamoʻoniʻi ʻene tonú ʻa ia ʻoku hā he Tohi Tapú. ʻI hoʻo faʻifaʻitaki kia Sīsuú, ʻe hangē ai hoʻo talí ko e “koni apele koula ʻi he ainga siliva”—ʻo fakangeingeia, fakaʻofoʻofa mo ʻaonga.—Pal. 25:11.
4. Ko fē taimi ʻoku lelei taha ai ke ʻoua ʻe feinga ke tali ʻa e fehuʻi kotoa pē?
4 ʻOku Totonu Ke Tau Tali ʻa e Fehuʻi Kotoa Pē? Kapau ʻoku ʻikai te ke ʻilo ʻa e tali ki ha fehuʻi, ʻoua ʻe mā ʻi hono tala ange: “ʻOku ʻikai te u ʻilo, ka ʻe lava ke u fekumi ki hoʻo fehuʻí peá u foki mai mo e ola ʻo ʻeku fekumí.” Ko e fakanānā mo e mahuʻingaʻia fakafoʻituitui peheé ʻe ueʻi nai ai ʻa e tokotahá ke ne fakaafeʻi koe ke ke toe foki ange. Kapau te ke ʻiloʻi ʻoku fai mai ha fehuʻi mei ha kau fakafepaki ʻoku nau feinga nai ke kamata ha fakakikihi, faʻifaʻitaki kia Sīsū ʻaki ʻa e fakangatangata hoʻo talí. (Luke 20:1-8) ʻI he tuʻunga meimei tatau, kapau ʻoku feinga ha taha ʻoku ʻikai mahuʻingaʻia moʻoni ʻi he moʻoní ke ne fakakikihi mo koe, fakangata fakapotopoto ʻa e fetalanoaʻakí pea fakamoleki ho taimí ʻi he fekumi ki he faʻahinga ʻoku loto-moʻoní.—Mt. 7:6.
5. Ko e hā ʻa e sīpinga naʻe fokotuʻu ʻe Sīsū ʻi hono tali ʻa e ngaahi fehuʻí?
5 Naʻe ʻiloʻi ʻe Sīsū ko e falala kia Sihová naʻe mātuʻaki mahuʻinga ia ke fakahoko ʻaki hono fatongia ke “fakahāʻi ʻa e moʻoni” ʻa ia ʻoku kau ai ʻa hono tali ʻa e ngaahi fehuʻi ʻoku fie ʻilo moʻoni ki ai e kakaí. (Sione 18:37) He monū moʻoni ia ʻoku tau maʻu ke faʻifaʻitaki kia Sīsū ʻi hono fai ha tali ki he faʻahinga ʻoku “hehema totonu ki he moʻui taʻengatá”!—Ng. 13:48, NW.