Fiemaʻu ke Lotu ʻa e Kau Faifekau Kalisitiané

1. Ko e hā ʻoku fiemaʻú koeʻuhí ke lavaʻi ʻa ʻetau ngāue fakafaifekaú?

¹ Heʻikai lava ke tau lavaʻi ʻa e ngāue fakafaifekaú ʻiate kitautolu pē. ʻOku ʻomai kia kitautolu ʻe Sihova ʻa e ivi ke faiʻaki ʻa e ngāué. (Fili. 4:13) ʻOkú ne ngāueʻaki ʻa ʻene kau ʻāngeló ke nau tokoniʻi kitautolu ʻi hono kumi ʻa e faʻahinga hangē ha sipí. (Fkh. 14:6, 7) Ko Sihova ia ʻokú ne ʻai ke tupu ʻa e tenga ʻo e moʻoní ʻa ia ʻoku tau tō mo fuʻifuʻí. (1 Kol. 3:6, 9) He mahuʻinga ē ki he kau faifekau Kalisitiané ke nau falala ʻi he lotu ki heʻetau Tamai hēvaní!

2. Ko e hā e meʻa ʻe niʻihi ke lotu fekauʻaki mo iá?

² Maʻatautolu: ʻOku totonu ke tau lotu ʻi he taimi taki taha ʻoku tau malanga aí. (Ef. 6:18) Ko e hā e meʻa ʻe niʻihi ke lotu fekauʻaki mo iá? ʻE lava ke tau lotu ke maʻu ha fakakaukau pau fekauʻaki mo hotau feituʻu ngāué pea ke maʻu ha loto-toʻa. (Ng. 4:29) ʻE lava ke tau kole kia Sihova ke ne tataki kitautolu ki he faʻahinga loto-totonu ʻa ia te tau ako Tohi Tapu nai mo iá. Kapau ʻe ʻeke mai ʻe he tokotaha-ʻapí ha fehuʻi, ʻe lava ke tau fai ha lotu nounou fakalongolongo ʻo kole kia Sihova ke ne tokoniʻi kitautolu ke tau fai ha tali feʻungamālie. (Nehe. 2:4) Te tau kole nai ki ha poto ke hanganaki fakamuʻomuʻa ʻetau ngāue fakafaifekaú. (Sem. 1:5) ʻIkai ko ia pē, ʻoku fiefia ʻa Sihova ʻi he taimi ʻoku tau fakakau ai ʻa e lea fakamālō ki he monū ʻi he hoko ko ʻene kau faifekaú.—Kol. 3:15.

3. ʻOku anga-fēfē ʻa hono fakalahi ʻa e ngāue fakamalangá ʻi he lotu maʻá e niʻihi kehé?

³ Maʻá e Niʻihi Kehé: ʻOku totonu ke tau toe “fehufiaʻaki,” naʻa mo e lave ki he hingoa ʻo e kaungā faifekaú ʻi he taimi ʻoku feʻungamālie aí. (Sem. 5:16; Ng. 12:5) ʻOku hanga ʻe he mahamahakí ʻo fakangatangata ʻa e meʻa ʻokú ke fai ʻi he ngāue fakamalangá? Lotu leva maʻá e kaungā faifekau ʻoku moʻui leleí. ʻOua ʻe fakasiʻisiʻia ʻa e mālohi ʻa hoʻo lotu maʻanautolú! ʻOku toe totonu foki ke lotu maʻá e kau maʻu mafaí ke nau loto lelei ki he ngāue fakamalangá koeʻuhi ke hoko ai ʻa hotau fanga tokouá ʻo “moui i he moui fiemalie moe melino.”—1 Tim. 2:1, 2, PM.

4. Ko e hā ʻoku totonu ai ke tau fakakukafi ʻi he lotú?

⁴ Ko hono talaki ʻa e ongoongo leleí ʻi he kotoa ʻo e māmani ʻoku nofoʻí ko ha ngāue kāfakafa ia. Kapau ʻoku tau “fakakukafi i he lotu,” te tau lavaʻi ʻa e ngāué ʻi he tokoni ʻa Sihová.—Loma 12:12, PM.