ʻE Fai ha Fakamoʻoni Mālohi
1. ʻI he tānaki atu ki he malangá, ko e hā nai ha toe meʻa ʻe maongo ki he kau ʻaʻahí ʻi he Fakamanatú? Fakamatalaʻi.
1 ʻAfē? ʻI he pō ʻo e Fakamanatú. Kuo fai ha feinga lahi ke fakaafeʻi ʻa e kakaí ke nau maʻu fakataha mo kitautolu. Ko e meʻa ʻoku fanongo ki ai ʻa e kau fakaafé ʻoku ʻikai ko e meʻa pē ia ʻe maongo kia kinautolú. Hili hono maʻu ʻa e fakamanatú, naʻe lave fakahangatonu ha fefine ʻe taha ki he meʻa naʻá ne sio ki aí—ko e anga-fakakaumeʻa ʻa e tokotaha kotoa pea fakaʻofoʻofa mo maʻa ʻa e fale naʻe langa mo tokangaʻi ʻe he kau ngāue polé. Ko ia ai, ko e kotoa ʻo kitautolú, ʻo ʻikai ko e tokotaha-malangá pē, te tau kau ʻi hono fai ha fakamoʻoni ʻi he kātoanga mahuʻinga taha ko eni ʻo e taʻú.—Ef. 4:16.
2. ʻE anga-fēfē nai haʻatau fai taki taha kotoa ha fakamoʻoni ki he kau ʻaʻahí?
2 Talitali Loto-Māfana ʻa e Kau ʻAʻahí: Ko ʻetau malimali loto-māfaná fakataha mo ha mālō e lelei fiefia ki he kau ʻaʻahí ʻe ʻoatu ai ha fakamoʻoni. (Sione 13:35) Neongo kapau heʻikai malava ke ke lea ki he tokotaha kotoa, te ke kei malava pē ʻo talitali loto-māfana mo fakafeʻiloaki atu koe ki he kakai ofi atú. (Hep. 13:1, 2) Tokanga ki he kau ʻaʻahi ko ia ʻoku hangehangē ʻoku ʻikai ke nau ʻiloʻi ha tahá. Ngalingali naʻa nau maʻu ha tohi fakaafe lolotonga ʻa e feingangāué. Te ke ʻeke nai, “Ko ho ʻuluaki taimi eni hení?” Fakaafeʻi kinautolu ke mou taʻutu fakataha, peá ke tala ange te ke tali ha ngaahi fehuʻi pē nai ʻoku nau maʻu. Kapau ʻe pau ke mavahe vave hoʻo fakatahaʻangá kae lava ke ngāueʻaki ʻe ha fakatahaʻanga ʻe taha ʻa e falé, te ke pehē nai: “Te u saiʻia ke ʻilo ko e hā hoʻo fakakaukau fekauʻaki mo e polokalamá. ʻOku ʻi ai ha founga ʻe lava ke u fetuʻutaki atu ai kia koe?”
3. ʻE anga-fēfē nai haʻatau talitali lelei ʻa e faʻahinga ko ia ʻoku ʻikai longomoʻuí?
3 Talitali Lelei ʻa e Faʻahinga ʻIkai Longomoʻuí: ʻOku ʻikai ha veiveiua ʻe ʻi ai ʻa e kau malanga ʻikai longomoʻui, kau ai ʻa e niʻihi ʻoku fakangatangata ʻenau feohi mo e fakatahaʻangá ki heʻenau maʻu fakataʻu pē ʻa e Fakamanatú. Talitali lelei kinautolu, pea ʻai ke nau ʻilo ʻokú ke fiefia moʻoni ke sio kia kinautolu. (Loma 15:7) ʻE lava ke ʻalu leva ʻa e kau mātuʻá ki honau ʻapí ki mui ai ke fakalototoʻaʻi kinautolu ke hokohoko atu ʻenau feohi mo e fakatahaʻangá. Ko ʻemau lotú ia ke ueʻi ʻa e tokolahi ʻi he kau maʻu fakatahá ke nau fakalāngilangiʻi ʻa e ʻOtuá ʻo ʻikai koeʻuhí pē ko e meʻa ʻoku nau fanongo ki aí kae toe pehē foki koeʻuhi ko ʻenau sio ʻo ‘mamata ki heʻetau ngaahi ngaue leleí.’ —1 Pita 2:12.