ʻOua ʻe Toumoua
1. Ko e hā ʻoku fiemaʻu ki ai ʻa e loto-toʻá, pea ko e hā hono ʻuhingá?
1 Kuo faifai ange peá ke toumoua ʻi he faifakamoʻoni ʻi he ʻapiakó koeʻuhí naʻá ke ilifia ʻi hano manukiʻi koe? ʻOku fiemaʻu moʻoni ʻa e loto-toʻa ke lea ai, tautefito kapau ʻokú ke mā. Ko e hā te ne tokoniʻi koé?
2. ʻI heʻene haʻu ki he faifakamoʻoni ʻi he ʻapiakó, ʻoku anga-fēfē kau ki ai ʻa e fakafuofua leleí?
2 Ngāueʻaki e Fakafuofua Lelei: Neongo ʻoku lava moʻoni ke vakai ki he ʻapiakó ko ho feituʻu ngāue fakafoʻituituí ia, manatuʻi ʻoku ʻikai ʻamanekina ia ke kamataʻi ʻa e fetalanoaʻaki fakalaumālié mo e tokotaha kotoa pē hangē ko ia ʻokú ke faʻa fai ʻi he malanga mei he fale ki he falé. Ngāueʻaki e fakafuofua leleí ke fakapapauʻi e taimi ke lea aí. (Koh. 3:1, 7) Ko e kaveinga ʻo ha fetalanoaʻaki fakakalasi pe ʻasainimeni fakaako ʻe ʻoatu nai ai kiate koe ha faingamālie ke fakahaaʻi ai hoʻo tuí. Pe ʻe ʻeke atu nai ʻe ha kaungāako ʻa e ʻuhinga ʻoku ʻikai te ke kau ai ʻi ha ngaahi meʻa pau. Kuo fakahaaʻi ʻe he kau Kalisitiane ʻe niʻihi ki heʻenau kau faiakó ʻi he kamataʻanga ʻo e taʻu fakaakó ko e Kau Fakamoʻoni ʻa Sihova kinautolu pea ʻoange ki he kau faiakó ʻa e ʻū tohi ʻoku fakamatalaʻi ai ʻetau ngaahi tuí. Kuo tuku ʻe he niʻihi ʻenau ʻū tohí ʻi heʻenau tesí koeʻuhi ke fakaʻaiʻai ai ha ngaahi fehuʻi mei he kaungāakó.
3. ʻE lava fēfē ke ke mateuteu ke fai ha fakamoʻoni ʻi he ʻapiakó?
3 Mateuteu: Kapau ʻokú ke mateuteu, ʻe fakalahi ai hoʻo loto-maʻú. (1 Pita 3:15) Ko ia feinga ke tomuʻa fakakaukau ki he ngaahi fehuʻi ʻe malanga hake nai, pea fakakaukau fekauʻaki mo e founga ʻe lava ke ke tali aí. (Pal. 15:28) Kapau ʻe ala lava, tuku hoʻo Tohi Tapú mo ha tohi ʻe niʻihi, hangē ko e tohi Reasoning, tohi ʻEke ʻe he Toʻutupú, mo e tohi fekauʻaki mo e fakatupú ʻi he ʻapiakó, koeʻuhi ke ke lava ʻo lave ki ai ʻi he taimi ʻe fiemaʻu aí. Kole ki hoʻo ongo mātuʻá ke fakakau ha ngaahi konga ʻahiʻahi he lolotonga hoʻomou lotu fakafāmilí.
4. Ko e hā ʻoku totonu ai ke hokohoko atu hoʻo faifakamoʻoni ʻi he ʻapiakó?
4 Fakakaukau Pau: ʻOua ʻe pehē ʻe manukiʻi maʻu pē koe ʻe ho kaungāakó ʻi he taimi ʻokú ke lave ai ki he moʻoní. Ko e niʻihi ʻoku ngalingali te nau leleiʻia ʻiate koe ʻi hoʻo loto-toʻá pea aʻu nai ʻo fanongo atu kiate koe. Kae ʻoua ʻe loto-siʻi kapau heʻikai ke tali ʻe ha taha. ʻE hōhōʻia ʻa Sihova ʻi hoʻo feingá. (Hep. 13:15, 16) Hokohoko atu ʻa e kole ke ne tokoniʻi koe ke loto-toʻa pe ‘ʻoua ʻaupito ʻe māluʻia ʻi he malangá’ (Ng. 4:29; 2 Tīm. 1:7, 8) Sioloto atu ki hoʻo fiefia ʻi he taimi ʻe fanongo atu ai ha tahá. Ko e tokotaha ko iá ʻe aʻu nai ʻo ne hoko ko ha kaungāsevāniti ʻa Sihova!