Maluʻi Ho Konisēnisí
1. Ko e hā ʻa e kaveinga ʻo e ʻaho ʻasemipilī makehe ki he taʻu fakangāue 2013, pea ko e hā ʻa e taumuʻa ʻo e polokalamá?
1 ʻI he ʻaho taki taha, ʻoku tau eʻa atu ai ki he ngaahi tuʻunga ʻa ia ʻe lava ke ne ʻai ke tau maumauʻi ʻa hotau konisēnisí. Ko e ʻuhinga ia ʻoku ʻai ai ʻi he polokalama ʻo e ʻaho ʻasemipilī makehe ki he taʻu fakangāue 2013, ʻa ia ʻe kamata ʻi Sepitema 1, 2012, ʻa e kaveinga ko e “Maluʻi Ho Konisēnisí.” (1 Tīm. 1:19) Ko e polokalamá kuo faʻufaʻu iá ke tokoniʻi kitautolu taki taha ke tau fai ha tokanga fakamātoato ki he anga ʻo ʻetau ngāueʻaki ʻa e meʻaʻofa fakaofo ko eni mei hotau Tokotaha-Fakatupú.
2. Ko e hā ʻa e ngaahi fehuʻi mahuʻinga ʻe tali ʻi he lolotonga ʻa e polokalamá?
2 Kumi ki he Ngaahi Poini ko Ení: Ko e polokalamá ʻe tali ai ʻa e ngaahi fehuʻi tefito ʻe fitu ʻo fekauʻaki mo e konisēnisí:
• Ko e hā ʻoku fakatuʻutāmaki ki he konisēnisí?
• ʻE lava fēfē ke tau akoʻi ʻa hotau konisēnisí?
• ʻOku malava fēfē ke hoko ʻo maʻa mei he toto ʻo e tangata kotoa pē?
• Ko e hā ʻoku fakahaaʻi atu ʻo fekauʻaki mo kitautolu ʻi heʻetau fakakaukau mo e ngāue ki he ngaahi tefitoʻi moʻoni Fakatohitapú?
• ʻE lava fēfē ke tau fakaʻehiʻehi mei hono fakalotomamahiʻi ʻa e niʻihi kehé ʻi he ngaahi meʻa fakakonisēnisí?
• Fānau, ʻe lava fēfē ke mou tuʻu fakamakatuʻu ʻi he taimi ʻo e tenge ke fakangalokú?
• Ko e hā ʻa e ngaahi tāpuaki ʻoku hoko ki he faʻahinga ko ia ʻoku nau muimui ʻi honau konisēnisi ʻoku tataki ʻe he laumālié?
3. ʻE lava fēfē ke tau maʻu ʻaonga mei he polokalamá?
3 ʻI he tokoni ʻa Sihová ʻe lava ke tau matuʻuaki ai ʻa e ngaahi feinga ʻa Sētane ke ne fakameleʻi hotau konisēnisí. Fakafou ʻi he Folofola ʻa e ʻOtuá mo ʻene kautahá, ʻoku tala mai ai kiate kitautolu ʻe heʻetau Tamai fakahēvani ʻofá: “Ko eni ʻa e hala, fou ai.” (ʻAi. 30:21) Ko e polokalamá ni ko e founga ia ʻe taha ʻoku tokonaki mai ai ʻe Sihova ʻa e tataki ko iá. Ko ia ai, fai ha ngaahi fokotuʻutuʻu ke maʻu ʻa e polokalamá kotoa. Tokanga lelei, pea fakakaukau ki he founga ke ngāueʻaki fakafoʻituitui ai ʻa e fakahinohinó. Talanoa fakafāmili ʻo fekauʻaki mo e polokalamá. Ko ʻetau ngāueʻaki ʻa e fakahinohino ʻoku tau maʻú ʻe fakaivimālohiʻi ai kitautolu ke tau hokohoko atu hono “tauhi maʻu ha konisēnisi lelei” pea tokoniʻi ai kitautolu ke fakaʻehiʻehi mei hono fakataueleʻi ʻe he ngaahi mālie taimi nounou ʻo e māmani ʻa Sētané ke tau afe mei he hala totonú.—1 Pita 3:16.