Sio ki he Kau Palōfitá ko ha Sīpinga—Sioeli

1. ʻE lava fēfē ke tau faʻifaʻitaki ki he anga-fakatōkilalo ʻa Sioelí ʻi heʻetau malangá?

¹ Ko hai ʻa e palōfita ko Sioelí? Naʻá ne fakahaaʻi ko iá “ko e foha ʻo Petueli.” (Sioeli 1:1) Naʻe fakamamafaʻi ʻe he palōfita anga-fakatōkilalo ko ení ʻa e pōpoaki ʻa Sihová kae ʻikai ko hono tuʻunga ko ha talafekau. ʻI he tuʻunga meimei tatau, ʻi heʻetau ngāue fakafaifekaú ʻoku ʻikai ke tau kumi hotau lāngilangi fakafoʻituituí pe tokaʻi kitá, ʻoku tau fakahangataha ʻa e tokangá kia Sihova mo e Tohi Tapú. (1 Kol. 9:16; 2 Kol. 3:5) Tānaki atu ki aí, ʻoku tau maʻu ʻa e mālohi ʻi he pōpoaki ʻoku tau fanongonongó. Ko e hā ʻa e ngaahi tafaʻaki ʻo e kikite ʻa Sioelí ʻe lava ke ne ʻai ke tau maʻu ʻa e ʻamanaki mo faivelenga ʻi he ʻaho ní?

2. Ko e hā ʻa e meʻa ʻoku totonu ke ueʻi kitautolu ke faí ʻi he ofi mai ʻa e ʻaho ʻo Sihová?

² “ʻOku Ofi ʻa e ʻAho ʻo Sihova.” (Sioeli 1:15): Neongo naʻe hiki ʻa e ngaahi leá ni ʻi he laui afeʻi taʻu kuo maliu atú, ʻoku tau moʻui ʻi he taimi ʻoku fakahoko fakaʻosi ai ʻa e kikité ni. Ko e ngaahi tuʻunga hōloa ʻo e māmaní, taʻemahuʻingaʻiá mo e manuki ʻoku tau fetaulaki mo ia ʻi hotau feituʻu ngāué ko e ngaahi fakamoʻoni mahino ia ko e ngaahi ʻaho fakaʻosi ʻo e fokotuʻutuʻu fulikivanu ko ení ʻoku tuʻunuku mai. (2 Tīm. 3:1-5; 2 Pita 3: 3, 4) ʻI he taimi ʻoku tau fakalaulauloto ai ki he ofi mai ʻa e ngataʻangá, ʻoku ʻikai ha toe meʻa ʻoku mahuʻinga ange ka ko e fakamuʻomuʻa ʻi heʻetau moʻuí ʻa e ngāue fakafaifekaú.—2 Pita 3:11, 12.

3. Ko e hā ʻoku tautefito ai e mahuʻinga ʻa e ngāue fakafaifekaú ʻi heʻetau fakaofiofi atu ki he mamahi lahí?

³ “Ko Sihova ko e Hufanga ki Hono Kakai.” (Sioeli 3:16): Ko e foʻi lea “ngaue” ʻoku fakamatala ki ai ʻa e vēsí ʻe lava ke ngāueʻaki pē ia ʻi he fakahoko ʻe Sihova ʻa e fakamāú lolotonga ʻa e mamahi lahí. ʻOku tau maʻu ʻa e fiemālie ʻi he ʻilo ʻe fakahaofi ʻe Sihova ʻene kau sevāniti faitōnungá lolotonga ʻa e taimi ko iá. (Fkh. 7: 9, 14) ʻI heʻetau kau ʻi he ngāue fakamalangá pea hokosia ʻa e founga hono poupouʻi mo fakaivimālohiʻi kitautolu ʻe Sihová ʻokú ne langa hake ai ʻetau tuí mo e kātakí pea tokoniʻi kitautolu lolotonga ʻo e hoko mai ʻa e mamahi lahí.

4. Ko e hā ʻoku lava ai ke tau fiefia mo hanga ki he kahaʻú mo e falala-paú?

⁴ Neongo ko e pōpoaki ʻa Sioelí ʻoku fakamatalaʻi ʻe he niʻihi ʻoku fakapōpōʻuli, ka ʻoku hoko ia ko e ʻamanaki fisifisimuʻa ʻo e fakahaofí ki he kakai ʻa e ʻOtuá. (Sioeli 2:32) Ko ia ai, tau hanga ki he kahaʻú mo e falala-pau mo fanogonogo faivelenga ʻa e ongoongo lelei ʻa e Puleʻanga ʻo e ʻOtuá ʻi heʻetau tokanga ki he ngaahi lea ʻi he Sioeli 2:23, PM: “Fiefia ia Jihova, ko ho mou Otua.”