Sio ki he Kau Palōfitá ko ha Sīpinga—Maika
1. Ko e hā ʻa e fehuʻi naʻe fakakaukauloto nai ki ai ʻa Maiká, ka ko e hā naʻe ʻikai ke laufānō ai ʻene malangá?
1 ‘ʻE fakangata ʻa fē ʻa e fokotuʻutuʻu fakameleʻi ʻo e ngaahi meʻá ni?’ Naʻe fakakaukauloto nai ʻa e palōfita ko Maiká ki ha fehuʻi meimei tatau ʻi heʻene fanongonongo ʻa e pōpoaki fakaefakamaau ʻa Sihova ki he puleʻanga ʻo ʻIsileli mo Siutá. Kae kehe, naʻe ʻikai ke laufānō ʻene malangá. ʻI he 740 K.M., lolotonga ʻa e taimi ʻo e moʻui ʻa Maiká, naʻe fakahoko ai ʻa e ngaahi lea ʻa Sihova ki Samēliá. (Mai. 1:6, 7) Ki mui ai, naʻe fakaʻauha ʻa Selusalema ʻi he taʻu 607 KM. (Mai. 3:12) ʻE lava fēfē ke tau faʻifaʻitaki kia Maika ʻi heʻetau tatali atu ke fakahoko ʻa e ngaahi fakamaau ʻa Sihová ʻi hotau ʻahó ni?
2. Ko e hā ʻa e founga mo e ʻuhinga ke tau fakahaaʻi ai ʻa e anga-kātakí ʻi heʻetau tatali ki he ʻaho ʻo Sihová?
2 Hoko ʻo Anga-Kātaki: Naʻe tohi ʻa Maika: “Ka ko au te u fakasio atu he haʻu ʻa Sihova; te u nofoʻaki tali ki hoku ʻOtua fakamoʻuiʻanga.” (Mai. 7:7) Ko e moʻoni, naʻe ʻikai ke nofo noa ʻa Maika ʻo tatali pē ke hoko mai ʻa e ngataʻangá. Naʻá ne hanganaki femoʻuekina ko ha palōfita ʻa Sihova. ʻI heʻetau tatali ki he ʻaho ʻo Sihová, ʻoku totonu foki ke tau kau ki he “ngaahi tōʻonga māʻoniʻoni mo e ngaahi ngāue ʻo e anga-līʻoa fakaʻotuá.” (2 Pita 3:11, 12) Ko e anga-kātaki ʻa Sihová ʻoku fakaʻatā ai ʻa e taimi ki he faʻahinga tāutahá ke nau fakatomala. (2 Pita 3:9) Ko ia ai, ʻai ke aʻu ki hotau lotó ʻa e ekinaki fakaʻotua ke faʻifaʻitaki ki he kau palōfitá ʻi hono ngāueʻaki ʻa e anga-kātakí.—Sēm. 5:10.
3. Ko e hā ʻoku totonu ai ke tau kōlenga kia Sihova ki hono laumālie māʻoniʻoní?
3 Falala ki he Mālohi ʻo Sihová: Neongo naʻe maʻu ʻe Maika ha ngāue faingataʻa, naʻá ne hanga kia Sihova ki ha mālohi ke fakahoko ia. (Mai. 3:8) Naʻe ʻikai ke hiki noaʻia pē ʻi he Folofola ʻa Sihová ʻo ekinaki kia kitautolu ke falala ki he ʻOtuá ki ha mālohi. ʻOkú ne foaki nima-homo ʻa e mālohi ki he faʻahinga ongosiá koeʻuhi ke nau lava ʻo fakahoko honau ngaahi fatongia fakateokalatí. (Saame 84:5, 7; ʻAi. 40:28-31) Kuó ke hokosia fakafoʻituitui eni ʻi hoʻo ngāue toputapú? ʻOkú ke kolenga maʻu pē kia Sihova ki he tokoni ʻo e mālohi hono laumālie māʻoniʻoní?—Luke 11:13.
4. Ko e hā ʻa e faʻifaʻitakiʻanga tuʻu-ki-muʻa ʻoku ʻomai kia kitautolu ʻi he ʻahó ni ʻe he ʻalunga moʻui ʻa Maiká?
4 ʻI he kotoa ʻene moʻuí, naʻe fakamuʻomuʻa ʻe Maika ʻa e fai ʻo e finangalo ʻo e ʻOtuá. Naʻá ne fakapapauʻi ke faitōnunga ai pē neongo hono ʻātakaiʻi ʻe he ʻulungaanga fakameleʻí. ʻI he tuʻunga meimei tatau ʻoku ʻahiʻahiʻi fakaʻaho ʻetau anga-tonú. Ko ia ai, tau fakaivimālohiʻi ʻetau fakapapau ke “ʻaluʻaki ʻa e huafa ʻo Sihova ko hotau ʻOtua, ʻo lauikuonga pea taʻengata.”—Mai. 4:5.