Fakatupulekina ʻa e Tōʻonga ʻo e Hoko ʻo Tauhi-Taimi
1. Ko e hā ʻa e faʻifaʻitakiʻanga ʻoku fokotuʻu ʻe Sihova ʻi he fekauʻaki mo e tauhi-taimí?
1 ʻOku tauhi-taimi maʻu pē ʻa Sihova. Hangē ko ení, ʻokú ne ʻoange ki heʻene kau sevānití ʻa e ‘tokoni ʻi he taimi totonu.’ (Hep. 4:16) ʻOkú ne toe tokonaki ʻa e ‘meʻakai fakalaumālié ʻi he taimi totonu.’ (Māt. 24:45) Ko ia ʻoku lava ke tau hoko ʻo tuipau ko e ʻaho ko ia ʻo ʻene houhaú “ʻe ʻikai tuai.” (Hap. 2:3) He maʻu ʻaonga ē ka ko kitautolu ʻi he tauhi-taimi ʻa Sihová! (Saame 70:5) Kae kehe, koeʻuhi ko e femoʻuekina mo e taʻehaohaoa ʻa e faʻahinga ʻo e tangatá, ʻoku lava ke hoko ʻa e tauhi-taimí ko e pole moʻoni ia kia kitautolu. Ko e hā ʻoku totonu ai ke tau fakatupulekina ʻa e tōʻonga ʻo e hoko ʻo tauhi-taimí?
2. ʻOku anga-fēfē hono ʻoatu ʻa e lāngilangí kia Sihova ʻi he hoko ʻo tauhi-taimí?
2 Kuo hoko ʻa e tauhi-taimí ʻo kehe ʻi he ngaahi ʻaho fakaʻosi ko ení koeʻuhi ko e kakai tokolahi te nau hoko ko e kau ʻofa kiate kinautolu pē pea ʻikai maʻu ʻa e mapuleʻi-kitá. (2 Tīm. 3:1-3) Ko ia ʻi he taimi ʻoku tauhi-taimi ai ʻa e kau Kalisitiané ki he ngāué, ngaahi ʻapoinimení mo e ngaahi fakatahá ʻoku fakatokangaʻi ia ʻe he niʻihi kehé, pea ʻoatu ai ʻa e lāngilangí kia Sihova. (1 Pita 2:12) ʻOku tau tauhi-taimi maʻu pē ki he ngāue fakamāmaní ka ʻoku tau ʻiloʻi hifo ʻoku tau faʻa tōmui ki he ngaahi meʻa fakateokalatí? Ko e ʻi ai taimi totonu ʻi he ngaahi fakataha faka-Kalisitiané ʻo kau ai ʻa e hivá mo e lotu kamatá, ʻoku fakahāhaaʻi atu ai ʻa e holi ke faʻifaʻitaki ki heʻetau Tamai fakahēvani fokotuʻutuʻu māú.—1 Kol. 14:33, 40.
3. ʻOku anga-fēfē hono fakahāhaaʻi atu ʻi he hoko ʻo tauhi-taimí ʻa e tokaʻi ʻo e niʻihi kehé?
3 Ko e hoko ʻo tauhi-taimí ʻoku toe fakahaaʻi ai ʻa e tokaʻi ʻo e niʻihi kehé. (Fil. 2:3, 4) Ko e fakatātaá, ʻi he taimi ʻoku tau ʻi ai taimi totonu ki he ngaahi fakataha faka-Kalisitiané ʻo kau ai ʻa e ngaahi fakataha ki he ngāue fakamalangá, ʻoku ʻikai ke fuʻu fakahohaʻasi ai ʻa e kaungā lotú. ʻI he tafaʻaki ʻe tahá, kapau ʻoku tau tōʻongaʻaki ʻa e tōmuí, ʻoku fakahāhā atu ai ki he niʻihi kehé ʻoku mahuʻinga ange hotau taimí ʻi haʻanautolú. Ko e tauhi-taimí ʻoku fakahāhaaʻi atu ai ʻa e falalaʻanga, tōtōivi mo e alafalalaʻanga—ko e ngaahi ʻulungaanga ʻoku houngaʻia ai ʻa e faʻahinga takatakai ʻiate kitautolú.
4. Kapau ʻoku tau faʻa tōmui, ʻe lava fēfē ke tau fai ha fakalakalaka?
4 Kapau ʻokú ke faʻa tōmui, fakakaukau ki he ngaahi ʻuhinga ʻokú ke tōmui aí. Fai ha fokotuʻutuʻu maau ʻaki haʻo fokotuʻu ha taimi-tēpile lelei ʻa ia te ke malava ai ke fakakakato ʻa e ngaahi ngāué ʻi honau taimi totonu. (Koh. 3:1, Fil. 1:10) Kole kia Sihova ki ha tokoni. (1 Sio. 5:14) Ko e hoko ʻo tauhi-taimí ko e founga ia ʻe taha ke fakahāhā ai ʻa e houngaʻia ki he ongo fekau lahi taha ʻo e Laó—ke ʻofa ki he ʻOtuá pea mo ʻofa ki hotau kaungāʻapí.—Māt. 22:37-39.