Te ke Faʻifaʻitaki ki he Faivelenga ʻa Sihova mo Sīsuú ʻi he Lolotonga e Faʻahitaʻu Fakamanatu ko Ení?

1. Ko e hā ʻoku fai ai ʻe he Kau Fakamoʻoni ʻa Sihová ʻa e feinga makehe lolotonga ʻa e faʻahitaʻu Fakamanatú?

¹ ʻOku fakahoko faivelenga ʻe Sihova ʻene taumuʻá. ʻI he lave ki he niʻihi ʻo e ngaahi tāpuaki ʻo e Puleʻanga ʻo e ʻOtuá, ʻoku pehē ʻi he ʻAisea 9:7: “Ko e fuaʻa [pe faivelenga] ʻa Sihova Sapaoti te ne fai ʻa e meʻa ko ia.” ʻI he tuʻunga meimei tatau, lolotonga ʻa e ngāue fakafaifekau ʻi he māmaní ʻa e ʻAlo ʻo e ʻOtuá, naʻá ne faivelenga ʻaupito ʻi he lotu moʻoní. (Sione 2:13-17; 4:34) ʻI he taʻu taki taha lolotonga ʻa e faʻahitaʻu Fakamanatú, ko e laui miliona ʻo e kau malanga takatakai ʻi he māmaní ʻoku nau fai ʻa e feinga makehe ke faʻifaʻitaki ki he faivelenga ʻa Sihova mo Sīsuú ʻi hono fakalahi atu ʻenau ngāue fakafaifekaú. Te ke kau ʻi he haʻohaʻonga ʻo kinautolú?

2. ʻE ueʻi kitautolu ʻe he faivelengá ke fai ʻa e hā ʻi he kamataʻanga ʻo Maʻasi 7?

² Feingangāue ki he Fakamanatú: ʻI he taʻú ni ko e feingangāue ke tuʻuaki ʻa e Fakamanatú ʻe kamata ʻi he ʻaho Tokonaki, 7 ʻo Maʻasí. Palani he taimí ni ke kau faivelenga ʻi he ngāue fakafaifekaú. ʻE fiefia lahi ʻaupito ʻa e fakatahaʻangá ʻi heʻenau kau longomoʻui ke ngāueʻi ʻenau feituʻu ngāué ʻi he lahi taha ʻe ala lavá. Fai ha feinga mālohi ke fakaafeʻi hoʻo kau ako Tohi Tapú, toe ʻaʻahí, kaungāngāué, kāingá mo e kaungāakó ʻaki hono ʻoange kia kinautolu ha tohi fakaafe pe ngāueʻaki ʻa e jw.org.

3. ʻE lava fēfē ke tau fakalahi atu ʻetau ngāue fakafaifekaú lolotonga ʻa Maʻasi mo ʻEpelelí?

³ Tāimuʻa Tokoni: ʻE toe ueʻi kitautolu ʻe he faivelengá ke fakalahi atu ʻetau ngāue fakafaifekaú. ʻOku ʻikai ha veiveiua ko e tokolahi te nau malava ke tāimuʻa tokoni ʻi he lolotonga ʻo Maʻasi mo ʻEpelelí, ʻa ia ʻe malava ke tau maʻu ʻa e faingamālie ke fili ki he houa pē ʻe 30. ʻI hoʻo lotu fakafāmilí pe ako fakafoʻituituí, lotu maʻu pē ʻo kau ki he founga ʻe lava ke ke fai ai ení. (Pal. 15:22) Ko hoʻo faivelenga ʻi he feingangāue ko ení ʻoku lava ke ne ueʻi ai ʻa e niʻihi kehé ke nau kau faivelenga ʻi he ngāué. Kapau ʻokú ke fai ha ngaahi feʻunuʻaki fakafoʻituitui koeʻuhí ke ke kau lahi ange ʻi he ngāué, ʻokú ke faʻifaʻitaki ai ki he faivelenga ʻa Sīsuú.—Mk. 6:31-34.

4. Ko e hā ʻa e ngaahi tāpuaki ʻe maʻu mei he faʻifaʻitaki ki he faivelenga ʻa Sihova mo Sīsuú?

⁴ Ko ʻetau faʻifaʻitaki ki he faivelenga ʻa Sihova mo Sīsū ʻi he lolotonga ʻa e faʻahitaʻu Fakamanatu ko ení ʻe ʻomai ai ʻa e ngaahi tāpuaki lahi. ʻE tokolahi ange ʻa e kakai ʻe faifakamoʻoni ki ai ʻi he feituʻu ngāué. Te tau maʻu ai ʻa e fiefia mo e fiemālie ʻi he hoko ʻo tauhi kia Sihova mo e foaki atu ki he niʻihi kehé. (Ngā. 20:35) Ko e meʻa mahuʻinga tahá, te tau fakahōifuaʻi ai hotau ʻOtua faivelengá mo hono ʻAló.