Ngāueʻaki Ola Lelei ʻa e Ngaahi Konga ʻo e Tohi Akoʻi ʻe he Tohi Tapú
ʻI hono ako ʻe he tokotaha akó ʻa e meʻa ʻoku akoʻi moʻoni ʻe he Tohi Tapú pea ngāueʻaki ʻa e meʻa ʻokú ne akó, te ne tupu mo fakatupulekina ha fua fakalaumālie. (Saame 1:1-3) ʻOku lava ke tau tokoniʻi ʻetau tokotaha akó ke fakalakalaka ʻaki hono ngāueʻaki ha niʻihi ʻo e ngaahi konga mahuʻinga mei he tohi Akoʻi ʻe he Tohi Tapú.
Fehuʻi Talateu: Ko e vahe taki taha ʻoku kamataʻaki ha ngaahi fehuʻi ʻa ia ʻe tali ʻi he vahé. ʻE lava ke ke ʻeke ʻa e ngaahi fehuʻi ko iá ʻo ʻikai fakataumuʻa ki ha tali ka ke langaʻi ʻa e fieʻilo ʻa e tokotaha akó ki hoʻomo lāulea hokó. Pe ʻe lava ke ke fakaafeʻi ia ke ne fai ha fakamatala nounou ki he fehuʻi taki taha. Kapau te ne fakahaaʻi ha fakakaukau hala, ʻoku ʻikai fiemaʻu ke ke fakatonutonuʻi ia he taimi ko ení. Ko ʻene ngaahi talí ʻe tokoniʻi ai koe ke ke ʻiloʻi ʻa e ngaahi poini ke tokanga ki ai mo fakamamafaʻí.—Pal. 16:23; 18:13.
ʻApenitiki: Kapau ʻoku mahinoʻi mo tali ʻe he tokotaha akó ʻa e fakamatala ʻi he vahé, ʻe lava ke ke fakalototoʻaʻi ia ke ne vakaiʻi ʻa e ʻapenitiki ʻoku fekauʻaki mo e fakamatala ko iá. ʻI he ako hono hokó, te ke vaheʻi ha kiʻi taimi ke fakapapauʻi ʻokú ne mahinoʻi ia. Kae kehe, kapau ʻe ʻaonga kiate ia, ʻoku totonu ke ke vaheʻi ha taimi ʻi he lolotonga ʻa e akó ke lāulea ki he ʻapenitikí pe ko ha konga ʻaki hono lau ʻa e ngaahi palakalafí pea ʻeke ʻa e fehuʻi naʻá ke ʻosi teuteú.
Puha Fakamanatu: Ko e puha fakamanatu ʻi he ngataʻanga ʻo e vahe taki taha ʻoku ʻi ai ʻa e tali ki he ngaahi fehuʻi talateú. ʻE lava ke ke ngāueʻaki ʻa e konga ko ení ke fakapapauʻi ʻoku lava ʻe he tokotaha akó ʻo mahinoʻi lelei mo fakamatalaʻi ʻa e ngaahi poini tefitó. Lau leʻo-lahi ʻa e tali taki taha fakataha mo e ngaahi konga Tohi Tapu ʻoku haá. Fakaafeʻi leva hoʻo tokotaha akó ke ngāueʻaki ʻa e (ngaahi) konga Tohi Tapú ke fakamatalaʻiʻaki ʻa e ʻuhinga ʻoku moʻoni ai e talí.—Ngā. 17:2, 3.