Akoʻi ʻa e Moʻoní

ʻI he kamataʻanga ʻo Sepitemá, ʻe fakakau ʻi he Polokalama Ngāue ki he Fakatahá Moʻui mo e Ngāue Fakafaifekaú ha sīpinga tuʻuaki foʻou ʻe fakakaveinga ʻaki ʻa e “Akoʻi ʻa e Moʻoní.” Ko ʻemau taumuʻá ke fakamamafaʻi ʻa e tefitoʻi moʻoni ʻo e Tohi Tapú, ʻo ngāueʻaki ha fehuʻi mo ha konga Tohi Tapu.

Kapau ʻoku tau ʻiloʻi ha mahuʻingaʻia, ʻoku lava ke tau fakatupulekina ha fakatuʻamelie ki heʻetau ʻaʻahi hokó ʻaki hono tuku ha tohi pe ko hono huluʻi ha vitiō mei he jw.org. ʻOku totonu ke tau feinga ke foki hili ha ngaahi ʻaho siʻi ke hoko atu ʻi he ʻuluaki fetalanoaʻakí. Ko e tuʻuaki foʻou ko ení mo e konga ʻoku vaheʻi ki he tokotaha akó ʻe makatuʻunga ia ʻi he ngaahi vahe kuo fakanounouʻi ʻi he tohi What Can the Bible Teach Us? (ʻa ia ʻoku teʻeki ala maʻu ʻi he lea faka-Tongá), ko e tatau faingofua eni ʻo e tohi Akoʻi ʻe he Tohi Tapú. Ko e tohi Akoʻi ʻe he Tohi Tapú ʻoku lava ke tau maʻu ai ha ngaahi fakamatala mo ha ngaahi konga Tohi Tapu ke tokoniʻi kitautolu ke fai ha ngaahi toe ʻaʻahi pe fakahoko ha ako Tohi Tapu ʻo ngāueʻaki pē ʻa e Tohi Tapú.

Ko e hala pē ʻe taha ʻoku taki atu ki he moʻuí. (Māt. 7:13, 14) ʻI heʻetau talanoa ki he kakai ʻoku nau ʻi he ngaahi lotu kehekehe mo e puipuituʻa kehekehe, kuo pau ke tau lave ki he ngaahi moʻoni ʻo e Tohi Tapú ʻe fakamānako kia kinautolú. (1 Tīm. 2:4) ʻI heʻetau talanoa lahi ange ʻi he ngaahi kaveinga kehekehe mei he Tohi Tapú pea pōtoʻi ange ʻi heʻetau “tofa totonu ʻa e folofola ʻo e moʻoní,” ʻe tupulaki ange ai ʻetau fiefiá pea tau lavameʻa ʻi hono akoʻi ʻa e moʻoní ki he niʻihi kehé.—2 Tīm.2:15.