Ako Fekauʻaki mo e ʻOtuá mei Heʻene Kau Palōfitá

ʻĒPALAHAME

ʻOku taʻefilifilimānako ʻa e ʻOtuá pea ʻokú ne loto ke tāpuakiʻi ʻa e faʻahinga ʻo e tangatá.

Naʻe talaʻofa ʻe he ʻOtuá ki he palōfita ko ʻĒpalahamé “ko e ngaahi fāmili kotoa pē ʻo e māmaní ko e moʻoni ʻe tāpuakiʻi kinautolu fakafou ʻiate koe.”​—Sēnesi 12:3.

Ko e hā ʻoku tau ako mei aí? ʻOku ʻofa lahi ʻaupito ʻa e ʻOtuá ʻiate kitautolu pea loto ke tāpuakiʻi ʻa e ngaahi fāmili kotoa​—kau tangata, kau fefine mo e fānau—​ʻoku nau talangofua kiate iá.

MŌSESE

ʻOku mohu meesi ʻa e ʻOtuá peá ne tāpuakiʻi ʻa e faʻahinga ʻoku feinga ke ʻiloʻi iá.

Naʻe ʻoange ʻe he Māfimafi-Aoniú ki he palōfita ko Mōsesé ʻa e mālohi ke ne fakahoko ʻa e ngaahi mana lahi. Neongo ia, naʻe lotu ʻa Mōsese: “ʻAi au ke u ʻiloʻi ho ngaahi halá, koeʻuhí ke u ʻiloʻi koe pea hokohoko atu ʻa ʻeku maʻu ʻa hoʻo hōifuá.” (ʻEkisoto 33:13) Naʻe hōifua ʻa e ʻOtuá ki he kole naʻe fai ʻe Mōsesé pea tāpuakiʻi ia ke ne ʻiloʻi mo mahinoʻi lahi ange ʻEne ngaahi foungá mo hono ʻulungāngá. Ko e fakatātaá, naʻe ʻiloʻi ʻe Mōsese ko e Tokotaha-Fakatupú “ko ha ʻOtua mohu meesi mo manavaʻofa.”​—ʻEkisoto 34:6, 7.

Ko e hā ʻoku tau ako mei aí? ʻOku loto ʻa e ʻOtuá ke tāpuakiʻi kitautolu kotoa​—kau tangata, kau fefine mo e fānau—​kapau ʻoku tau feinga ke hoko ʻo ʻiloʻi lelei ange ia. ʻOkú ne fakahaaʻi mai ʻi he Folofola Māʻoniʻoní ʻa e founga ke lotu ai kiate iá pea ʻokú ne vēkeveke ke fakahaaʻi mai ʻene hōifuá mo e tāpuakí.

SĪSŪ

ʻOku lava ke tau maʻu ʻa e ngaahi tāpuaki tuʻuloa ʻa e ʻOtuá kapau te tau ako fekauʻaki mo Sīsū mo e meʻa naʻá ne faí mo akoʻí.

ʻOku maʻu ʻi he Folofola ʻa e ʻOtuá ʻa e ngaahi fakaikiiki fekauʻaki mo e moʻui mo e akonaki ʻa Sīsuú. Naʻe ʻoange ʻe he ʻOtuá kia Sīsū ʻa e mālohi ke ne fakahoko ʻa e ngaahi mana fakaofo, hangē ko hono fakamoʻui ʻa e kuí, tulí mo e heké. Naʻe aʻu ʻo ne fokotuʻu mai ʻa e kau maté. Naʻe fakahaaʻi ai ʻe Sīsū ʻa e ngaahi tāpuaki ʻe ʻomai ʻe he ʻOtuá ki he faʻahinga kotoa ʻo e tangatá ʻi he kahaʻú. Naʻá ne fakamatalaʻi ʻa e founga ʻe lava ke tau maʻu ai ʻa e ngaahi tāpuaki ko iá: “Ko ʻeni ia ʻe maʻu ai ʻa e moʻui taʻengatá, ko ʻenau hoko ʻo ʻiloʻi koe, ko e ʻOtua moʻoni pē taha, pea mo e tokotaha ko ia naʻá ke fekau maí, ʻa Sīsū Kalaisi.”​—Sione 17:3.

Naʻe manavaʻofa, kaungāongoʻi mo anga-lelei ʻa Sīsū. Ko e kau tangata mo e kau fefine, kei siʻi mo e taʻumotuʻa, naʻa nau ʻaukolo kiate ia koeʻuhi ko ʻene fakaafe fakalotomāfaná: “Ako meiate au, he ʻoku ou anga-malū mo loto-fakatōkilalo, pea te mou maʻu ha fakaivifoʻou kiate kimoutolu.” (Mātiu 11:29) ʻI he ʻikai hangē ko e niʻihi ʻi he taimi ʻo Sīsuú ʻa ia naʻa nau ngaohikoviʻi ʻa e kakai fefiné, naʻá ne fakafeangai ki he kakai fefiné ʻi he anga-lelei, fakangeingeia mo anga-fakaʻapaʻapa.

Ko e hā ʻoku tau ako mei aí? Naʻe fakahaaʻi ʻe Sīsū ʻa e ʻofa lahi ki he kakaí, peá ne fokotuʻu mai ha faʻifaʻitakiʻanga tuʻu-ki-muʻa ʻi he founga ʻoku totonu ke tau fefakafeangaiʻaki aí.

ʻOKU ʻIKAI KO E ʻOTUÁ ʻA SĪSŪ

ʻOku akoʻi mai ʻi he Folofola Māʻoniʻoní “ko hono moʻoní kiate kitautolú ʻoku taha pē ʻa e ʻOtuá” pea ko Sīsū Kalaisi ʻa e talafekau anga-fakatōkilalo ʻa e ʻOtuá. (1 Kolinitō 8:6) Naʻe fakahaaʻi mahino ʻe Sīsū ko e ʻOtuá ʻokú ne māʻolunga ange ʻiate ia pea ko e ʻOtuá naʻá ne fekauʻi mai ia ki he māmaní.​—Sione 11:41, 42; 14:28.a