MOʻUI KO HA KALISITIANE
Malanga mo Faiako—Mātuʻaki Mahuʻinga ʻi he Ngaohi Ākongá
Naʻe fekau ʻe Sīsū ki hono kau muimuí ke nau ō ʻo ngaohi ākonga. (Māt. 28:19) ʻOku kau ki heni ʻa e malanga mo e faiako. ʻI he taimi ki he taimi ʻoku totonu ke tau ʻeke hifo kiate kitautolu, ‘ʻE lava fēfē ke u fakalakalaka ʻi he ongo tafaʻaki mātuʻaki mahuʻinga ko eni ʻo e ngāue ngaohi ākongá?’
MALANGA
ʻI he ʻikai ke tatali ke haʻu ʻa e kakaí kiate kitautolú, kuo pau ke tau kumi longomoʻui ki he faʻahinga ʻoku “tāú.” (Māt. 10:11) ʻI heʻetau kau ki he ngāue fakafaifekaú, ʻoku tau tokanga ki he ngaahi faingamālie ke lea ai ki he kakai ʻoku “ʻi ai ʻi he taimi ko iá”? (Ngā. 17:17) Naʻe hoko ʻa Litia ko ha ākonga tupu mei he malanga tōtōivi ʻa e ʻapositolo ko Paulá.—Ngā. 16:13-15.
“Tūtuuʻi hoʻo tengá ʻi he pongipongí pea ʻoua naʻa tuku ke mālōlō ho nimá kae ʻoua ke aʻu ki he efiafí” (Tml. 11:6)
SIO ʻI HE VITIŌ HOKOHOKO ATU ʻA E MALANGÁ “ʻO ʻIKAI TUKU”—ʻI HE FOUNGA ʻIKAI ANGA-MAHENÍ MO E FALE KI HE FALÉ, PEA TALI LEVA ʻA E NGAAHI FEHUʻI KO ENÍ:
ʻI heʻene ngāue tuʻumaʻu fakaʻahó, naʻe anga-fēfē hono fakahāhā ʻe Semi naʻá ne feinga tōtōivi ke tō ʻa e tenga ʻo e moʻoní?
Ko e hā kuo pau ai ke tau kītaki ʻi he founga kotoa pē ʻo e malangá?
Ko hai ʻe lava ke ke vahevahe ki ai ʻa e pōpoaki ʻo e Puleʻangá he lolotonga hoʻo ngāue tuʻumaʻu fakaʻahó?
FAIAKO
Ke ngaohi ākongá, kuo pau ke tau fai ʻa e meʻa lahi ange ʻo ʻikai ko e tuku pē ha tohi ki he kakaí. Ke tokoniʻi kinautolu ke nau fakalakalaka fakalaumālié, ʻoku fiemaʻu ke tau fai ha ngaahi toe ʻaʻahi mo fakahoko ha ngaahi ako Tohi Tapu. (1 Kol. 3:6-9) Kae fēfē kapau ʻoku ʻikai loko ola lelei ʻetau feinga tōtōivi ke akoʻi ʻa e moʻoni ʻo e Puleʻangá ki ha taha? (Māt. 13:19-22) ʻOku totonu ke hokohoko atu ʻetau kumi ki he faʻahinga ʻoku hangē honau lotó ko e “kelekele leleí.”—Māt. 13:23; Ngā. 13:48.
“Naʻá ku tō ʻe au, naʻe fuʻifuʻi ʻe ʻApolosi, ka ko e ʻOtuá naʻá ne hanganaki ʻai ia ke tupú” (1 Kol. 3:6)
SIO ʻI HE VITIŌ HOKOHOKO ATU ʻA E MALANGÁ “ʻO ʻIKAI TUKU”—ʻI HE FEITUʻU KAKAÍ MO E NGAOHI ĀKONGÁ, PEA TALI LEVA ʻA E NGAAHI FEHUʻI KO ENÍ:
Naʻe anga-fēfē hono fuʻifuʻi ʻe Mone mo Mele ʻa e tenga ʻo e moʻoní ʻi he loto ʻo ʻIsikeli mo Kalé?
Ko e hā ʻoku totonu ko ʻetau taumuʻa ia ʻi he tafaʻaki kotoa ʻo e ngāue fakafaifekaú, kau ai ʻa e faifakamoʻoni ʻi he feituʻu kakaí?
ʻE anga-fēfē ʻetau fakamamafaʻi lahi ange ʻa hono akoʻi ʻa e moʻoní ki he niʻihi kehé?