“Naʻe Fakamālō ʻa Paula ki he ʻOtuá Peá Ne Maʻu ha Loto-Toʻa”

ʻI he taimi naʻe fanongo ai ʻa e fakatahaʻanga ʻi Lomá ʻoku haʻu ʻa Paulá, naʻe fononga ha kulupu ʻo e fanga tokouá ʻi he maile nai ʻe 40 (kilomita ʻe 64) ke fakafetaulaki kiate ia. Naʻe kaunga fēfē ʻenau ʻofa feilaulauʻi-kitá kia Paulá? “ʻI hono fakatokangaʻi atu kinautolú, naʻe fakamālō ʻa Paula ki he ʻOtuá peá ne maʻu ha loto-toʻa.” (Ngā. 28:15) Neongo naʻe ʻiloa ʻa Paula ʻi hono fakalototoʻaʻi ʻa e fanga tokoua naʻá ne ʻaʻahi ki aí, ʻi he tuʻunga ko ení naʻá ne hoko ko ha pōpula, ko ia ʻa e tokotaha naʻá ne maʻu ʻa e fakalototoʻá.—2 Kol. 13:10.

ʻI he ʻahó ni ko e kau ʻovasia sēketí ʻoku nau fononga mei he fakatahaʻanga ki he fakatahaʻanga ke fakalototoʻaʻi ʻa e fanga tokouá mo e fanga tuofāfiné. Hangē ko e kotoa ʻo e kakai ʻa e ʻOtuá, ʻoku ʻi ai ʻa e taimi ʻoku nau ongoʻi helaʻia, loto-mafasia, mo loto-siʻi. ʻI he ʻaʻahi hoko ʻa e ʻovasia sēketí mo hono uaifí ki hoʻo fakatahaʻangá, ko e hā ʻe lava ke ke faí ke tokoniʻi kinaua ke na loto-toʻá, koeʻuhi ke hoko ʻo “fefakalototoʻaʻaki”?—Loma 1:11, 12.

• 

  Poupouʻi ʻa e ngaahi fakataha ki he ngāue fakamalangá. ʻOku fakalototoʻa ki he ʻovasia sēketí ʻa e taimi ʻoku fai ai ʻe he kau malangá ʻa e ngaahi feilaulau ke maʻu ʻaonga kakato mei he uike makehe ʻo e ngāué. (1 Tes. 1:2, 3; 2:20) Fakakaukau ke tāimuʻa tokoni ʻi he māhina ʻo ʻene ʻaʻahí. ʻE lava ke ke kole ke ke ngāue mo ia mo hono uaifí ʻi he ngāue fakafaifekaú pe ʻave ha taha ʻia kinaua ʻi haʻo ako Tohi Tapu? ʻOkú na fiefia ʻi he ngāue mo ha kau malanga kehekehe kau ai ʻa e faʻahinga ʻoku foʻou pe faʻahinga ʻoku ʻikai fuʻu pōtoʻi ʻi he ngāue fakafaifekaú.

• 

  Anga-talitali kakai. ʻE lava ke ke tokoni ʻi hono ʻai ha nofoʻanga pe ko ha houa kai? ʻOku fakahaaʻi heni ki he ʻovasia sēketí mo hono uaifí ʻokú ke ʻofa ʻiate kinaua. ʻOku ʻikai ke na ʻamanekina ha meʻa lahi ange.—Luke 10:38-42.

• 

  Fanongo mo ngāueʻaki ʻene fakahinohinó mo e akonakí. Ko e ʻovasia sēketí ʻokú ne tokoniʻi anga-ʻofa kitautolu ke sio ki he founga ʻe lava ke fakalakalaka ai ʻetau tauhi kia Sihová. ʻI ha taimi, te ne fiemaʻu nai ke ʻomai ha akonaki fefeka. (1 Kol. 5:1-5) ʻOkú ne maʻu ʻa e fiefia ʻi he taimi ʻoku tau talangofua ai mo fakamoʻulaloá.—Hep. 13:17.

• 

  Fakahaaʻi ʻa e houngaʻia. Tala ange ki he ʻovasia sēketí mo hono uaifí ʻa e anga hoʻo maʻu ʻaonga mei heʻena ngaahi ngāué. ʻE lava ke ke fai eni ʻi hoʻo tala ange kiate kinaua pe fakafou ʻi ha kiʻi tohi pe ko ha kaati.—Kol 3:15.