ʻE Anga-Fēfē Hoʻo Mateuteu ki he Fakamanatú?

Kamata ʻi he taʻú ni, te tau maʻu ai ha taimi lahi ange ke mateuteu ai ki he Fakamanatu ʻo e pekia ʻa Kalaisí. ʻI he taimi ʻe tō ai ʻa e ʻaho ʻo e Fakamanatú ʻi he lolotonga ʻo e uiké, ko e Fakataha ki he Moʻuí mo e Ngāue Fakafaifekaú ʻe ʻikai ke toe fai ia ʻi he uike ko iá. ʻI he taimi ʻe tō ai ʻa e Fakamanatú ʻi he fakaʻosinga ʻo e uiké, ʻe ʻikai ke toe fai ʻa e malanga ia maʻá e kakaí mo e ako Taua Leʻó. Te ke lava ʻo ngāueleleiʻaki ʻa e taimi ko iá? Hangē pē ko ia ʻi he ʻuluaki senitulí, kuo pau ke fai ha ngaahi teuteu koeʻuhi ke fakahoko ʻa e kātoanga mahuʻinga ko ení. (Luke 22:7-13; km 3/15 1) Ka, ko kitautolu kotoa ʻoku totonu ke tau teuteu hotau lotó. ʻE lava fēfē ke tau fai eni?

• Fakakaukauloto ki he mahuʻinga ʻo e kau ki aí.—1 Kol. 11:23-26

• Lotu pea fakakaukau ki ho vahaʻangatae mo Sihová.—1 Kol. 11:27-29; 2 Kol. 13:5

• Lau mo fakalaulauloto ki he ngaahi maʻuʻanga fakamatala Fakatohitapu ʻoku lāulea ʻo fekauʻaki mo e ʻuhinga ʻo e Fakamanatú.—Sione 3:16; 15:13

Ko e kau malanga ʻe niʻihi ʻoku nau lau mo fakalaulauloto ki he lau Tohi Tapu ki he Fakamanatú ʻoku hā ʻi he Ko Hono Vakaiʻi Fakaʻaho ʻa e Tohi Tapú. ʻOku lau ʻe he niʻihi ia ʻa e ngaahi konga Tohi Tapu ʻoku hā ʻi he sātí. Ko e niʻihi ia ʻoku nau fakamanatu ʻa e ngaahi kupu ʻi he Taua Leʻo ʻoku lāulea ai ki he Fakamanatú pea mo e ʻofa ʻa Sihova mo Sīsū ʻoku fakahāhā mai kiate kitautolú. Pe ko e hā pē ʻa e faʻahinga founga ako ʻokú ke filí, ʻofa ke ne ʻai koe ke ke toe ofi ange ai kia Sihova pea mo hono ʻAló.