MOʻUI KO HA KALISITIANE
Founga Hono Ngāueʻaki ʻa e Sīpinga Fetalanoaʻakí
Talu mei Sanuali 2018, kuo hā ʻa e sīpinga fetalanoaʻakí ʻi he peesi ʻuluaki ʻo e Ko ʻEtau Moʻui Faka-Kalisitiané mo e Ngāue Fakafaifekaú—Polokalama Ngāue ki he Fakatahá. ʻOku lava fēfē ke tau ngāueʻaki iá?
Fakahoko ʻo e Konga ʻa e Tokotaha Akó: ʻOku totonu ke ke ngāueʻaki ʻa e fehuʻi, konga Tohi Tapu, mo e fehuʻi ki he ʻaʻahi hokó mei he sīpinga fetalanoaʻaki. Kae kehe, ʻoku ʻikai ʻuhinga ení kuo pau ke ke faʻifaʻitaki fakafoʻilea ki he sīpinga fetalanoaʻaki ʻi he vitioó. ʻE lava nai ke ke ngāueʻaki ha tuʻunga, talateu, mo ha fakaʻuhinga kehe. ʻE lava nai ke ke toe tuʻuaki ha tohi mei he Puha Meʻangāue Fakafaiakó, neongo kapau ʻoku ʻikai lave ki ai ʻi he fakahinohino ʻo e kongá.
ʻI he Ngāue Fakafaifekaú: Ko e sīpinga fetalanoaʻakí ʻoku fakataumuʻa ke ʻoatu ha fokotuʻu ʻaonga. Kapau ʻoku fakahāhā ʻe ha tokotaha ha mahuʻingaʻia loto-moʻoni pea loto ke ʻilo lahi ange, ʻe lava ke ke hokohoko atu ʻa e fetalanoaʻakí, ʻo ngāueʻaki nai ʻa e sīpinga toe ʻaʻahí. ʻE lava ke ke feʻunuʻaki ʻa e sīpinga fetalanoaʻakí pe ngāueʻaki ha meʻa kehe. Fēfē ha kaveinga mei he māhina ki muʻá pe ko ha konga Tohi Tapu kehe ʻoku fakamānako ange ki he faʻahinga ho feituʻú? ʻOku fakamānako ange ki he kakai ʻi ho feituʻú ha meʻa ʻoku lolotonga hoko pe ha meʻa ʻi he ongoongó? Tatau ai pē pe ko e hā ʻa e founga te ke ngāueʻaki ʻa e sīpinga fetalanoaʻakí, ʻoku totonu ko hoʻo taumuʻá ke ‘fai ʻa e meʻa kotoa pē maʻá e ongoongo leleí, koeʻuhí ke vahevahe atu ia ki he niʻihi kehé.’—1 Kol. 9:22, 23.