Toʻutupu​—Ko Sihova Ho Kaumeʻa Ofi Tahá?

Ko e hā ʻa e ngaahi ʻulungaanga ʻokú ke fakamahuʻingaʻi ʻi hoʻo kumi ki ha kaungāmeʻa? Ngalingali ʻokú ke fakamahuʻingaʻi ʻa e mateaki, anga-lelei mo e nima-homo. ʻOku fakahāhā kotoa eni ʻe Sihova. (ʻEki. 34:6; Ngā. 14:17) ʻOkú Ne fanongo mai ʻi he taimi ʻokú ke lotu ange ai kiate iá. ʻOkú Ne tokoniʻi koe ʻi ha taimi pē ʻokú ke fiemaʻu aí. (Saame 18:19, 35) ʻOkú Ne fakamolemoleʻi ho ngaahi fehālākí. (1 Sio. 1:9) He Kaumeʻa fakaofo ē ko Sihova!

ʻE lava fēfē ke ke hoko ko ha kaumeʻa ʻo Sihova? Ako fekauʻaki mo iá ʻaki hoʻo lau ʻene Folofolá. Talanoa fekoekoeʻi mo ia. (Saame 62:8; 142:2) Fakahaaʻi ʻokú ke fakamahuʻingaʻi ʻa e meʻa ʻoku mahuʻinga kia Sihová hangē ko hono ʻAló, ko hono Puleʻangá mo ʻene ngaahi talaʻofa ki he kahaʻú. Talanoa ki he niʻihi kehé fekauʻaki mo iá. (Teu. 32:3) Kapau te ke fakatupulekina ha kaungāmeʻa ofi mo Sihova te ne hoko ko hoʻo Kaumeʻa ʻo taʻengata.​—Saame 73:25, 26, 28.

SIO ʻI HE VITIŌ TOʻUTUPU​—“MOU ʻAHIʻAHIʻI KE MOU ʻILO ʻOKU LELEI ʻA SIHOVA,” PEA TALI LEVA ʻA E NGAAHI FEHUʻI KO ENÍ:

• 

  ʻE lava fēfē ke ke mateuteu ki he fakatapuí mo e papitaisó?

• 

  ʻE lava fēfē ke tokoniʻi koe ʻe he niʻihi kehé ʻi he fakatahaʻangá ke tauhi kia Sihová?

• 

  ʻOku anga-fēfē hono fakaivimālohiʻi ho vahaʻangatae mo Sihová ʻe he ngāue fakafaifekaú?

• 

  Ko e hā ʻa e ngaahi ngāue ʻi he kautaha ʻa Sihová ʻe lava ke ke fakahokó?

• Ko e hā ʻa e meʻa ʻokú ke ʻofa ai ʻia Sihová?